ബെംഗളൂരു: കർണാടക മുഖ്യമന്ത്രി സ്ഥാനത്തുനിന്ന് ഒഴിയുന്നതിന് പകരമായി കോൺഗ്രസ് ഹൈക്കമാൻഡ് മുന്നോട്ടുവെച്ച രാജ്യസഭാ സീറ്റും ദേശീയ രാഷ്ട്രീയത്തിലേക്കുള്ള ക്ഷണവും സിദ്ധരാമയ്യ നിരസിച്ചതായി റിപ്പോർട്ട് (Karnataka CM Siddaramaiah Resignation). ദേശീയ രാഷ്ട്രീയത്തിലേക്ക് മാറാൻ തനിക്ക് താല്പര്യമില്ലെന്നും കർണാടക സംസ്ഥാന രാഷ്ട്രീയത്തിൽ തന്നെ തുടരാനാണ് ആഗ്രഹമെന്നും അദ്ദേഹം പാർട്ടി കേന്ദ്ര നേതൃത്വത്തെ അറിയിച്ചു. നിലവിലെ ഉപമുഖ്യമന്ത്രി ഡി.കെ. ശിവകുമാറിന് മുഖ്യമന്ത്രി സ്ഥാനം കൈമാറുന്നതിന്റെ ഭാഗമായി സിദ്ധരാമയ്യ ഉടൻ തന്നെ പദവി രാജിവെച്ചേക്കുമെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. കോൺഗ്രസ് അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി എന്നിവരുമായി ദില്ലിയിൽ നടത്തിയ നിർണ്ണായക ചർച്ചകൾക്ക് ശേഷമാണ് പാർട്ടി താല്പര്യം മുൻനിർത്തി സ്ഥാനം ഒഴിയാൻ അദ്ദേഹം സന്നദ്ധത പ്രകടിപ്പിച്ചത്.
2023-ലെ നിയമസഭാ തിരഞ്ഞെടുപ്പ് വിജയത്തിന് ശേഷം കഴിഞ്ഞ മൂന്ന് വർഷമായി കർണാടക മുഖ്യമന്ത്രിയായി സേവനമനുഷ്ഠിക്കുകയാണ് സിദ്ധരാമയ്യ. ഹൈക്കമാൻഡ് നിർദ്ദേശപ്രകാരം ഉടൻ തന്നെ കോൺഗ്രസ് നിയമസഭാ കക്ഷി യോഗം വിളിച്ചുചേർക്കുമെന്നും, അതിൽ അദ്ദേഹം തന്റെ രാജിക്കാര്യം ഔദ്യോഗികമായി പ്രഖ്യാപിക്കുമെന്നുമാണ് പാർട്ടിക്കുള്ളിൽ നിന്നുള്ള വിവരങ്ങൾ. കർണാടകയിൽ ഏറ്റവും കൂടുതൽ കാലം മുഖ്യമന്ത്രിയായിരുന്ന ഡി. ദേവരാജ് അരശിന്റെ റെക്കോർഡ് സിദ്ധരാമയ്യ അടുത്തിടെ മറികടന്നിരുന്നു. സിദ്ധരാമയ്യ സ്ഥാനം ഒഴിയുന്നതോടെ കർണാടക കോൺഗ്രസിലെ പ്രബലനായ ഡി.കെ. ശിവകുമാറിന് മുഖ്യമന്ത്രി പദവിയിലേക്കുള്ള വഴി തെളിയുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
Summary: Karnataka Chief Minister Siddaramaiah has reportedly agreed to step down from his post but rejected Congress high command’s offer for a Rajya Sabha seat. Expressing his desire to remain in state politics rather than moving to national politics, he has consented to the leadership transition following high-level talks in Delhi. Current Deputy Chief Minister D.K. Shivakumar is expected to take over the top post after an upcoming Congress Legislative Party meeting.
