ന്യൂഡൽഹി: ഇന്ത്യയുടെ കാത്തിരിപ്പായ ആദ്യ ബുള്ളറ്റ് ട്രെയിനിന്റെ (Bullet Train) ഔദ്യോഗിക ഡിസൈൻ ഇന്ത്യൻ റെയിൽവേ പുറത്തുവിട്ടു (India first bullet train design photo). ഡൽഹിയിലെ റെയിൽവേ മന്ത്രാലയ ആസ്ഥാനത്താണ് ട്രെയിനിന്റെ അത്യാധുനിക ചിത്രം ആദ്യമായി പ്രദർശിപ്പിച്ചത്. മന്ത്രാലയത്തിലെ ഗേറ്റ് നമ്പർ 4-ൽ ഈ ചിത്രം സ്ഥാപിച്ചതായി റെയിൽവേ വൃത്തങ്ങളെ ഉദ്ധരിച്ച് പ്രമുഖ വാർത്താ ഏജൻസിയായ എഎൻഐ (ANI) റിപ്പോർട്ട് ചെയ്തു.
മുംബൈയ്ക്കും അഹമ്മദാബാദിനും ഇടയിലാണ് രാജ്യത്തെ ആദ്യത്തെ ബുള്ളറ്റ് ട്രെയിൻ സർവീസ് നടത്തുക. ജാപ്പനീസ് റെയിൽവേയുടെ (Japanese Railway) സാങ്കേതിക സഹായത്തോടെ രൂപകൽപ്പന ചെയ്ത ഈ പദ്ധതി ഇന്ത്യൻ സാഹചര്യങ്ങൾക്കും കാലാവസ്ഥയ്ക്കും അനുയോജ്യമായ രീതിയിലാണ് പരിഷ്കരിച്ചിരിക്കുന്നത്.
‘മേക്ക് ഇൻ ഇന്ത്യ’ കരുത്തിൽ നിർമ്മാണം
പൂർണ്ണമായും ‘മേക്ക് ഇൻ ഇന്ത്യ’ (Make in India) പദ്ധതിയുടെ ഭാഗമായാവും ഈ ബുള്ളറ്റ് ട്രെയിനുകൾ നിർമ്മിക്കുക. ചെന്നൈയിലെ ഇന്റഗ്രൽ കോച്ച് ഫാക്ടറിയും (ICF Chennai) ബാംഗ്ലൂരിലെ ബിഇഎംഎൽ ലിമിറ്റഡും (BEML Limited) സംയുക്തമായാണ് മണിക്കൂറിൽ 280 കിലോമീറ്റർ വേഗതയിൽ സഞ്ചരിക്കാൻ ശേഷിയുള്ള ഈ അത്യാധുനിക ട്രെയിൻ സെറ്റുകൾ വികസിപ്പിക്കുന്നത്. പദ്ധതിക്ക് ആവശ്യമായ 1,389.5 ഹെക്ടർ ഭൂമിയും ഇതിനകം പൂർണ്ണമായി ഏറ്റെടുത്തുകഴിഞ്ഞു.
508 കിലോമീറ്റർ നീളുന്ന പാത; 12 സ്റ്റേഷനുകൾ
മുംബൈ-അഹമ്മദാബാദ് ഹൈ സ്പീഡ് റെയിൽ (MAHSR) പ്രോജക്റ്റ് മഹാരാഷ്ട്ര, ഗുജറാത്ത് എന്നീ സംസ്ഥാനങ്ങളിലൂടെയും കേന്ദ്രഭരണ പ്രദേശമായ ദാദ്ര, നഗർ ഹവേലിയിലൂടെയുമാണ് കടന്നുപോകുന്നത്. ആകെ 508 കിലോമീറ്റർ ദൈർഘ്യമുള്ള ഈ റൂട്ടിൽ 12 സ്റ്റേഷനുകളാവും ഉണ്ടാകുക.
സ്റ്റേഷനുകൾ: മുംബൈ, താനെ, വിരാർ, ബോയിസാർ, വാപ്പി, ബില്ലിമോറ, സൂറത്ത്, ഭരുച്, വഡോദര, ആനന്ദ്, അഹമ്മദാബാദ്, സബർമതി.
നിർമ്മാണ പുരോഗതി ഇങ്ങനെ:
ഗുജറാത്തിലെ എട്ട് സ്റ്റേഷനുകളിലെ (വാപ്പി, ബില്ലിമോറ, സൂറത്ത്, ഭരുച്, ആനന്ദ്, വഡോദര, അഹമ്മദാബാദ്, സബർമതി) പ്രാരംഭ നിർമ്മാണ ജോലികൾ ഇതിനകം പൂർത്തിയായി. മഹാരാഷ്ട്രയിലെ താനെ, വിരാർ, ബോയിസാർ എന്നിവിടങ്ങളിൽ ജോലികൾ അതിവേഗം പുരോഗമിക്കുകയാണ്. മുംബൈയിലെ ബന്ദ്ര കുർള കോംപ്ലക്സ് (BKC) സ്റ്റേഷനിലെ ഖനന ജോലികളും പൂർത്തീകരണത്തോടടുത്തു.
ഈ റൂട്ടിലെ 17 പാലങ്ങളുടെ നിർമ്മാണം പൂർത്തിയായിട്ടുണ്ട്. ഗുജറാത്തിലെ നർമ്മദ, മൈഹി, താപ്തി, സബർമതി എന്നീ നദികൾക്ക് കുറുകെയുള്ള നാല് പ്രധാന പാലങ്ങളുടെയും മഹാരാഷ്ട്രയിലെ മറ്റ് നാല് പാലങ്ങളുടെയും നിർമ്മാണ പ്രവർത്തനങ്ങൾ ഇപ്പോൾ യുദ്ധകാലാടിസ്ഥാനത്തിൽ നടക്കുകയാണ്.
Story Summary: The Indian Railways has officially unveiled the design of the country’s first bullet train, with its image displayed at the Ministry of Railways headquarters. The Mumbai-Ahmedabad High-Speed Rail (MAHSR) project, spanning 508 km across Maharashtra and Gujarat, will feature 12 stations. Under the ‘Make in India’ initiative, ICF Chennai and BEML Bengaluru will jointly develop the train sets capable of running at 280 km/h, utilizing Japanese technology adapted for Indian conditions.
