ന്യൂഡൽഹി: അത്യാധുനിക ആയുധങ്ങൾ സംയുക്തമായി വികസിപ്പിക്കുന്നതിനും ഉൽപ്പാദിപ്പിക്കുന്നതിനുമുള്ള ചർച്ചകൾക്കിടെ, തന്ത്രപ്രധാനമായ പ്രതിരോധ സാങ്കേതികവിദ്യകൾ പാകിസ്താനുമായി പങ്കുവെക്കരുതെന്ന് ഇറ്റലിക്ക് ഇന്ത്യയുടെ കർശന നിർദ്ദേശം. ഭീകരവാദത്തിന് പാകിസ്താൻ നൽകുന്ന പിന്തുണ ചൂണ്ടിക്കാട്ടിയാണ് ഇന്ത്യയുടെ ഈ ഉറച്ച നിലപാട്.(India firmly told Italy that defence technology must not be shared with Pakistan)
ഇന്ത്യൻ പ്രതിരോധ മന്ത്രി രാജ്നാഥ് സിംഗും ഇറ്റാലിയൻ പ്രതിരോധ മന്ത്രി ഗൈഡോ ക്രോസെറ്റോയും തമ്മിൽ നടന്ന ഉഭയകക്ഷി കൂടിക്കാഴ്ചയിലാണ് ഈ വിഷയം ഉന്നയിക്കപ്പെട്ടത്. ഇന്ത്യൻ പങ്കാളികളുമായി ചേർന്ന് മാത്രമായി ആയുധങ്ങൾ വികസിപ്പിക്കാൻ തയ്യാറാണെന്ന് ഇറ്റലി അറിയിച്ചു. പശ്ചിമേഷ്യൻ സംഘർഷം ഉൾപ്പെടെയുള്ള പ്രാദേശിക, ആഗോള വിഷയങ്ങളും ചർച്ചയിൽ വിഷയമായി.
മുൻകാലങ്ങളിൽ ഇറ്റലി പാകിസ്താന് നൽകിയ പ്രതിരോധ സഹായങ്ങളിൽ ഇന്ത്യ ആശങ്ക പ്രകടിപ്പിച്ചു. കടൽയുദ്ധത്തിനുള്ള ഉപകരണങ്ങൾ, ഹെലികോപ്റ്ററുകൾ, ഡ്രോണുകൾ, ഉപരിതലത്തിൽ നിന്ന് വായുവിലേക്ക് തൊടുക്കാവുന്ന മിസൈലുകൾ എന്നിവ ഇറ്റാലിയൻ കമ്പനികൾ പാകിസ്താന് നൽകിയിരുന്നു. ഇത് ഇന്ത്യയുടെ സുരക്ഷയെ ബാധിക്കുമെന്നാണ് ന്യൂഡൽഹിയുടെ പക്ഷം. വിവിഐപി ഹെലികോപ്റ്റർ കുംഭകോണത്തെത്തുടർന്ന് പത്ത് വർഷത്തോളം ഇന്ത്യയിൽ വിലക്ക് നേരിട്ട ഇറ്റാലിയൻ കമ്പനിയായ ‘ലിയോനാർഡോ’ ഇപ്പോൾ സജീവമായി തിരിച്ചെത്തിയിട്ടുണ്ട്. അദാനി ഡിഫൻസ് ആന്റ് എയ്റോസ്പേസുമായി ചേർന്ന് നാവികസേനയ്ക്കായുള്ള ഹെലികോപ്റ്റർ കരാറുകളിൽ കമ്പനി താല്പര്യം പ്രകടിപ്പിച്ചിട്ടുണ്ട്.
ഇന്ത്യയുടെ ആത്മനിർഭർ ഭാരത് പദ്ധതിക്ക് കീഴിൽ സംയുക്ത ഉൽപ്പാദനത്തിനുള്ള സാധ്യതകൾ തേടും. അത്യാധുനിക നാവിക തോക്കുകൾ, ടോർപ്പിഡോകൾ, പരിശീലന വിമാനങ്ങൾ എന്നിവ നൽകാൻ ഇറ്റലിക്ക് താല്പര്യമുണ്ട്. സാങ്കേതികവിദ്യ കൈമാറി ഇന്ത്യയിൽ തന്നെ ഉൽപ്പാദന കേന്ദ്രങ്ങൾ തുടങ്ങുന്നതിനെക്കുറിച്ചും ചർച്ചകൾ നടന്നു. 2026-27 കാലയളവിലേക്കുള്ള ഉഭയകക്ഷി സൈനിക സഹകരണ പദ്ധതി ഇരുരാജ്യങ്ങളും കൈമാറി. ഇറ്റാലിയൻ പ്രതിരോധ വ്യവസായ സംഘം ഇന്ത്യൻ കോസ്റ്റ് ഗാർഡ് ഉൾപ്പെടെയുള്ളവരുമായി ചർച്ചകൾ നടത്തി. ഭാവിയിലെ സൈനിക സഹകരണം കൂടുതൽ ശക്തമാക്കാൻ ഈ സന്ദർശനം വഴിയൊരുക്കുമെന്നാണ് വിലയിരുത്തൽ.
