ധരംകോട്ട്: ഹിമാചൽ പ്രദേശിലെ പ്രശസ്തമായ വിനോദസഞ്ചാര കേന്ദ്രമായ ധരംകോട്ടിലെ ഹോട്ടലുകളിലും കഫേകളിലും ഇന്ത്യൻ സഞ്ചാരികൾക്ക് നേരെ കടുത്ത വിവേചനം നടക്കുന്നതായി പരാതി (Himachal Pradesh Tourism Discrimination). ഇസ്രായേൽ സ്വദേശികൾ ഉൾപ്പെടെയുള്ള വിദേശ വിനോദസഞ്ചാരികൾക്ക് പ്രാദേശിക ബിസിനസ്സ് സ്ഥാപനങ്ങൾ അമിത മുൻഗണന നൽകുന്നുവെന്നും തങ്ങൾക്ക് സ്വന്തം നാട്ടിൽ ‘മൂന്നാംകിട പൗരന്മാരെപ്പോലെ’ അനുഭവപ്പെട്ടുവെന്നും ഒരു ഇന്ത്യൻ സഞ്ചാരി സോഷ്യൽ മീഡിയയിൽ പങ്കുവെച്ച കുറിപ്പിൽ ആരോപിക്കുന്നു. “നിങ്ങളുടെ ഹിമാചൽ യാത്ര നശിപ്പിക്കാൻ ആഗ്രഹമില്ലെങ്കിൽ ദയവായി ഈ സ്ഥലത്തേക്ക് പോകരുത്” എന്ന തലക്കെട്ടോടെ പങ്കുവെച്ച പോസ്റ്റ് ഇതിനകം തന്നെ ചർച്ചയായിക്കഴിഞ്ഞു. ഓൺലൈനിലെ മനോഹരമായ വീഡിയോകൾ കണ്ട് ഏറെ ആവേശത്തോടെയാണ് ധരംകോട്ട് സന്ദർശിച്ചതെന്നും എന്നാൽ അവിടുത്തെ യാഥാർത്ഥ്യം തികച്ചും വിഭിന്നമായിരുന്നുവെന്നും സഞ്ചാരി വ്യക്തമാക്കുന്നു.
ഇന്ത്യൻ വിനോദസഞ്ചാരികളോട് ഈ പ്രദേശത്തെ കഫേ ജീവനക്കാർ വളരെ മോശമായാണ് പെരുമാറുന്നതെന്നും പണം നൽകാൻ ശേഷിയില്ലാത്ത യാചകരെപ്പോലെയാണ് തങ്ങളെ അവർ കണക്കാക്കിയതെന്നും കുറിപ്പിൽ പറയുന്നു. പല റെസ്റ്റോറന്റുകളിലും തങ്ങൾക്ക് പ്രവേശനം പോലും നിഷേധിക്കപ്പെട്ടു. ഏറെ ബുദ്ധിമുട്ടി ഇരിപ്പിടം ലഭിച്ചപ്പോൾ തന്നെ, തങ്ങൾക്ക് മുൻപ് ഓർഡർ ചെയ്ത ഇസ്രായേലി സഞ്ചാരികൾക്ക് ഭക്ഷണം വേഗത്തിൽ എത്തിച്ചു നൽകി. ഒരേ വിഭവം തന്നെയാണ് ഓർഡർ ചെയ്തതെങ്കിലും വിദേശികൾക്ക് ലഭിച്ച പരിഗണന തങ്ങൾക്ക് ലഭിച്ചില്ല. ഒന്നിലധികം തവണ ഇത് ആവർത്തിച്ചതോടെ യാത്രയുടെ മൂഡ് തന്നെ നഷ്ടപ്പെട്ടതായി വിനോദസഞ്ചാരി കുറിച്ചു. റെഡ്ഡിറ്റിൽ പങ്കുവെച്ച ഈ അനുഭവക്കുറിപ്പ് വൈറലായതോടെ നിരവധി ആളുകളാണ് സമാനമായ അനുഭവങ്ങൾ പങ്കുവെച്ച് രംഗത്തെത്തിയത്.
Please don’t go this place if you don’t want to ruin your Himachal trip..
by
u/Own-Jelly9655 in
india_tourism
കഴിഞ്ഞ ജൂൺ മാസത്തിൽ ധരംകോട്ട് സന്ദർശിച്ചപ്പോൾ ചായ ഓർഡർ ചെയ്ത് കാത്തിരുന്ന തങ്ങളെക്കാൾ മുൻപ്, പിന്നീട് വന്ന രണ്ട് വിദേശികൾക്ക് കഫേ ജീവനക്കാർ ഓർഡർ നൽകിയതായി മറ്റൊരു ഉപഭോക്താവ് സാക്ഷ്യപ്പെടുത്തി. ഇന്ത്യക്കാരെ സ്വാഗതം ചെയ്യാത്ത ഇത്തരം സ്ഥലങ്ങളിലേക്ക് യാത്ര ചെയ്യരുതെന്നും രാജ്യത്തെക്കാൾ പണത്തിന് മുൻഗണന നൽകുന്ന ബിസിനസ്സ് രീതിയാണിതെന്നും സോഷ്യൽ മീഡിയയിൽ വിമർശനങ്ങൾ ഉയരുന്നുണ്ട്. ജനത്തിരക്കേറിയതും പ്രാദേശികമായ തനിമ നഷ്ടപ്പെട്ടതുമായ ധരംശാലയും ധരംകോട്ടും വലിയ നിരാശയാണ് സമ്മാനിക്കുന്നതെന്നാണ് സഞ്ചാരികളുടെ പൊതുവേയുള്ള പ്രതികരണം.
Summary: An Indian tourist has sparked intense online debate after sharing an experience of alleged discrimination at cafes and restaurants in Dharamkot, Himachal Pradesh. In a viral social media post warning travelers to avoid the hill station, the tourist expressed feeling like a “third-class citizen,” claiming that local hospitality businesses consistently prioritize and favor foreign tourists, particularly Israelis.
