ഗുഡ്ഗാവ്: ഒരു മെട്രോ നഗരത്തിലെ ജീവിതച്ചെലവ് എത്രത്തോളമുണ്ടാകുമെന്ന് കൃത്യമായി കാണിച്ചുതരുന്ന ഒരു യുവതിയുടെ ഇൻസ്റ്റാഗ്രാം വീഡിയോ ഇപ്പോൾ വൈറലായിരിക്കുകയാണ് (Gurgaon Cost of Living). ഗുഡ്ഗാവിലെ ഒരു ചെറുകിട ബിസിനസ്സ് ഉടമയായ അനുഷ്ക പങ്കുവെച്ച വീഡിയോയിൽ, തനിക്കും ഭർത്താവിനും ഒരു മാസം ഏകദേശം 80,000 രൂപയോളം ചെലവ് വരുന്നതായാണ് വ്യക്തമാക്കുന്നത്. പലർക്കും ഇത് വിശ്വസിക്കാൻ പ്രയാസമാണെങ്കിലും ഗുഡ്ഗാവ് പോലുള്ള നഗരങ്ങളിൽ ഇത് യാഥാർത്ഥ്യബോധമുള്ളതാണെന്നാണ് ഭൂരിഭാഗം പേരുടെയും അഭിപ്രായം.
അനുഷ്കയുടെ വീഡിയോ പ്രകാരം അവരുടെ പ്രധാന മാസച്ചെലവുകളിൽ ഏറ്റവും ഉയർന്ന തുക വാടകയിനത്തിലാണ്. സെമി ഫർണിഷ്ഡ് ആയ 2BHK ഫ്ലാറ്റിന് മെയിന്റനൻസ് ഉൾപ്പെടെ 37,000 രൂപയാണ് ഇവർ നൽകുന്നത്. കൂടാതെ പലചരക്ക് സാധനങ്ങൾക്കായി 10,000 മുതൽ 15,000 രൂപ വരെയും, വീട് വൃത്തിയാക്കാൻ എത്തുന്ന ജോലിക്കാരിയുടെ ശമ്പളമായി 2,500 രൂപയും മാറ്റിവെക്കുന്നു. യാത്രാച്ചെലവുകൾക്കായി 6,000 മുതൽ 8,000 രൂപ വരെയും, വൈദ്യുതിയും വെള്ളവും ഉൾപ്പെടെയുള്ള ബില്ലുകൾക്കായി 5,600 രൂപയും ഇവർക്ക് ഓരോ മാസവും ആവശ്യമായി വരുന്നുണ്ട്.
ഭക്ഷണത്തിനും ഷോപ്പിംഗിനുമായി ഗണ്യമായ തുക ഇവർ ചിലവാക്കുന്നുണ്ട്. ഓൺലൈൻ വഴിയും നേരിട്ടും നടത്തുന്ന ഷോപ്പിംഗിന് ഏകദേശം 10,000 രൂപയും, ഹോട്ടൽ ഭക്ഷണത്തിനും ഓൺലൈൻ ഓർഡറുകൾക്കുമായി 4,000 മുതൽ 5,000 രൂപ വരെയും ചെലവാകുന്നു. ഇതെല്ലാം കൂട്ടി നോക്കുമ്പോൾ ഏകദേശം 75,000 – 80,000 രൂപയോളം വരുമെന്ന് അനുഷ്ക പറയുന്നു. ഈ തുകയിൽ തങ്ങളുടെ സമ്പാദ്യം ഉൾപ്പെടുത്തിയിട്ടില്ലെന്നും അവർ വ്യക്തമാക്കി. വീഡിയോ വൈറലായതോടെ മുംബൈ പോലുള്ള നഗരങ്ങളിൽ ഇതിന്റെ ഇരട്ടി ചെലവാകുമെന്നും, ഗുഡ്ഗാവിലെ വാടക നിരക്ക് ഇത്രയും ഉയരുന്നത് ആശങ്കാജനകമാണെന്നും നിരവധി പേർ കമന്റ് ചെയ്തു.
View this post on Instagram
