മലയാളികളുടെ പ്രിയനടൻ ഫഹദ് ഫാസിൽ നായകനാകുന്ന ഏറ്റവും പുതിയ ബിഗ് ബജറ്റ് ഫാന്റസി എന്റർടെയിനർ ചിത്രം ‘ഡോണ്ട് ട്രബിൾ ദ ട്രബിൾ’ ന്റെ ടീസർ പുറത്തിറങ്ങി. ബാഹുബലി ഉൾപ്പെടെയുള്ള വിസ്മയ ചിത്രങ്ങൾ സമ്മാനിച്ച ആർക്കാ മീഡിയ വർക്ക്സും, സംവിധായകൻ എസ്. എസ്. രാജമൗലിയും ചേർന്നാണ് ഈ ചിത്രം നിർമ്മിക്കുന്നത് ( Don’t Trouble The Trouble). നവാഗതനായ ശശാങ്ക് യെലേട്ടി സംവിധാനം ചെയ്യുന്ന ചിത്രം പ്രേക്ഷകർ ഏറെ പ്രതീക്ഷയോടെയാണ് കാത്തിരിക്കുന്നത്.
ഒരു കൊച്ചു പെൺകുട്ടിക്ക് മാജിക് കാണിച്ചുകൊടുക്കുന്ന ഫഹദ് ഫാസിലിലൂടെയാണ് ടീസർ ആരംഭിക്കുന്നത്. പെൺകുട്ടിയെ അപ്രത്യക്ഷയാക്കുന്ന ഒരു വലിയ മാജിക് കാണിക്കാമെന്ന് ഫഹദ് വാഗ്ദാനം ചെയ്യുന്നതോടെയാണ് കഥയിൽ ആകാംക്ഷനിറയുന്ന സംഭവങ്ങൾ അരങ്ങേറുന്നത്. ഫഹദ് ഫാസിലിന്റെ അസാമാന്യമായ ശൈലിയിലുള്ള തമാശ നിറഞ്ഞ കഥാപാത്രവും ബാലതാരവുമായുള്ള അദ്ദേഹത്തിന്റെ രസകരമായ കോമ്പിനേഷനും ടീസറിന് വലിയ ശ്രദ്ധ നേടിക്കൊടുത്തിട്ടുണ്ട്.
കാല ഭൈരവയുടെ പശ്ചാത്തല സംഗീതവും ചിത്രത്തിന്റെ ദൃശ്യഭംഗിയും ടീസറിൽ എടുത്തുനിൽക്കുന്നു. ഫാന്റസിയും ഹ്യൂമറും ഇമോഷണൽ രംഗങ്ങളും സമന്വയിപ്പിച്ച് ഒരുക്കുന്ന ഈ ചിത്രം 2026 സെപ്റ്റംബർ 11-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യുമെന്ന് അണിയറപ്രവർത്തകർ ഔദ്യോഗികമായി അറിയിച്ചു. എസ്. എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവർ ചേർന്നാണ് ചിത്രം നിർമ്മിക്കുന്നത്.
Summary: The teaser for Fahadh Faasil’s upcoming big-budget fantasy entertainer, ‘Don’t Trouble The Trouble,’ directed by newcomer Shashank Yeleti and produced by Arka Media Works and S.S. Rajamouli, has been released. Featuring Fahadh in a whimsical and comedic role, the film is set for a worldwide theatrical release on September 11, 2026.
