ന്യൂഡൽഹി: ഭക്ഷണവും പലചരക്ക് സാധനങ്ങളും വീട്ടിലെത്തിക്കാൻ പരസ്പരം മത്സരിക്കുന്ന കമ്പനികളാണ് സൊമാറ്റോ, സ്വിഗ്ഗി, ബ്ലിങ്കിറ്റ്, സെപ്റ്റോ, മിൽക്ക് ബാസ്ക്കറ്റ് എന്നിവ. എന്നാൽ ഈ കമ്പനികളിലെ ഡെലിവറി പങ്കാളികൾ ഒത്തുചേർന്ന ഒരു ഇൻസ്റ്റാഗ്രാം വീഡിയോ ഇപ്പോൾ സമൂഹമാധ്യമങ്ങളിൽ തരംഗമാവുകയാണ് ( Delivery Riders Power Rangers Video). പ്രശസ്ത സൂപ്പർഹീറോ പരമ്പരയായ ‘പവർ റേഞ്ചേഴ്സിനെ’ അനുസ്മരിപ്പിക്കുന്ന രീതിയിലാണ് ഈ വീഡിയോ ചിത്രീകരിച്ചിരിക്കുന്നത്.
ഓരോ കമ്പനിയുടെയും വ്യത്യസ്ത നിറത്തിലുള്ള യൂണിഫോം ധരിച്ച ഡെലിവറി ബോയ്സ് ഒന്നിച്ചണിനിരക്കുന്ന വീഡിയോ, ‘ഡെലിവറി മൾട്ടിവേഴ്സ്’ എന്നാണ് വിശേഷിപ്പിക്കപ്പെടുന്നത്. കടുത്ത വേനലിലും മഴയത്തും വിശ്രമമില്ലാതെ ജോലി ചെയ്യുന്ന ഇവരാണ് യഥാർത്ഥ സൂപ്പർഹീറോകൾ എന്ന് വീഡിയോ കണ്ടവർ അഭിപ്രായപ്പെടുന്നു. ഇൻസ്റ്റാഗ്രാമിൽ മാത്രം 3.4 ദശലക്ഷത്തിലധികം ആളുകൾ ഈ വീഡിയോ ഇതിനോടകം കണ്ടുകഴിഞ്ഞു.
View this post on Instagram
കമ്പനികൾ തമ്മിൽ വിപണിയിൽ മത്സരമുണ്ടെങ്കിലും, താഴെത്തട്ടിൽ ജോലി ചെയ്യുന്നവർക്കിടയിലുള്ള ഈ സൗഹൃദം വലിയ രീതിയിൽ പ്രശംസിക്കപ്പെടുന്നുണ്ട്. ഐപിഎൽ ടീമുകളുടെ ജേഴ്സി നിറങ്ങളുമായും ചിലർ ഇവരെ ഉപമിച്ചു. ഇതിനുമുൻപും ബംഗളൂരുവിലെ കനത്ത മഴയത്ത് ഒന്നിച്ച് ജോലി ചെയ്യുന്ന ഡെലിവറി ബോയ്സിന്റെ ചിത്രങ്ങൾ ‘അവഞ്ചേഴ്സ്’ സിനിമയോട് ഉപമിച്ച് വൈറലായിരുന്നു.
