ന്യൂഡൽഹി: രാജ്യതലസ്ഥാനത്ത് ചൂട് റെക്കോർഡുകൾ ഭേദിച്ച് മുന്നേറുന്നു. ചൊവ്വാഴ്ച ഡൽഹിയിൽ കടുത്ത ഉഷ്ണതരംഗം അനുഭവപ്പെടുകയും ഉയർന്ന താപനില 46 ഡിഗ്രി സെൽഷ്യസ് രേഖപ്പെടുത്തുകയും ചെയ്തു. ഇത് സാധാരണയായി ഈ സമയത്ത് ഉണ്ടാകാറുള്ള ചൂടിനേക്കാൾ 4.7 ഡിഗ്രി സെൽഷ്യസ് കൂടുതലാണ്. നഗരത്തിൽ വരും ദിവസങ്ങളിലും ചൂട് അത്യന്തം അപകടകരമായ രീതിയിൽ തുടരുമെന്ന സൂചനയെത്തുടർന്ന് കേന്ദ്ര കാലാവസ്ഥാ വകുപ്പ് ഡൽഹിയിൽ ഓറഞ്ച് അലർട്ട് പ്രഖ്യാപിച്ചു. ഈ മാസം 25 വരെ ഈ കടുത്ത ജാഗ്രതാ നിർദ്ദേശം തുടരും.(Delhi Heatwave Orange Alert Issued As Temperature Crosses Forty Six Degrees)
കാലാവസ്ഥാ വകുപ്പിന്റെ കണക്കുകൾ പ്രകാരം ചൊവ്വാഴ്ച ഡൽഹി റിഡ്ജിലെ ഒബ്സർവേറ്ററിയിലാണ് ഏറ്റവും ഉയർന്ന ചൂട് അനുഭവപ്പെട്ടത്; 46.5 ഡിഗ്രി സെൽഷ്യസ്. ഇവിടെ കുറഞ്ഞ താപനില 28.1 ഡിഗ്രി സെൽഷ്യസ് ആയിരുന്നു. സഫ്ദർജങ് സ്റ്റേഷനിൽ ഉയർന്ന താപനില 45.1 ഡിഗ്രി സെൽഷ്യസും കുറഞ്ഞ താപനില 28.2 ഡിഗ്രി സെൽഷ്യസും രേഖപ്പെടുത്തി. മുൻ ദിവസത്തേക്കാൾ 1.5 ഡിഗ്രി സെൽഷ്യസിന്റെ വർദ്ധനവാണ് ഇവിടെയുണ്ടായത്. പാലം സ്റ്റേഷനിൽ 45.1 ഡിഗ്രി സെൽഷ്യസും, ലോധി റോഡ് സ്റ്റേഷനിൽ സാധാരണയേക്കാൾ 6.2 ഡിഗ്രി സെൽഷ്യസ് ഉയർന്ന് 45.2 ഡിഗ്രി സെൽഷ്യസും ചൂട് രേഖപ്പെടുത്തിയിട്ടുണ്ട്. ബുധനാഴ്ച ഉയർന്ന താപനില 44 ഡിഗ്രി സെൽഷ്യസ് വരെ ഉയർന്നേക്കാമെന്നാണ് പ്രവചനം.
സമതല പ്രദേശങ്ങളിൽ ഉയർന്ന താപനില 40 ഡിഗ്രി സെൽഷ്യസിന് മുകളിൽ പോവുകയും, അത് സാധാരണ താപനിലയേക്കാൾ 4.5 മുതൽ 6.4 ഡിഗ്രി സെൽഷ്യസ് വരെ കൂടുകയും ചെയ്യുന്ന സാഹചര്യത്തിലാണ് കാലാവസ്ഥാ വകുപ്പ് ഔദ്യോഗികമായി ഉഷ്ണതരംഗം പ്രഖ്യാപിക്കുന്നത്. വരും ദിവസങ്ങളിൽ ചൂട് ഇനിയും കടുക്കുമെന്നതിനാൽ നിർജ്ജലീകരണം ഒഴിവാക്കാൻ ജനങ്ങൾ അനാവശ്യമായി വെയിലത്തിറങ്ങരുതെന്നും കൃത്യമായ മുൻകരുതലുകൾ എടുക്കണമെന്നും അധികൃതർ നിർദ്ദേശിച്ചിട്ടുണ്ട്.
Story Summary
The India Meteorological Department has issued an orange alert for New Delhi until May 25 as a severe heatwave gripped the national capital, sending temperatures soaring up to 46.5°C. Residents have been advised to take precautions as temperatures are running nearly five degrees above normal in several areas.
