ന്യൂഡൽഹി: സമൂഹമാധ്യമങ്ങളിൽ വൻ തരംഗമായി മാറിയ ആക്ഷേപഹാസ്യ രാഷ്ട്രീയ മുന്നണിയായ ‘കോക്രോച്ച് ജനത പാർട്ടി’യുടെ (CJP) ഇൻസ്റ്റഗ്രാം അക്കൗണ്ട് ഹാക്ക് ചെയ്യപ്പെട്ടു (Cockroach Janata Party Instagram hacked). 21 ദശലക്ഷത്തിലധികം (2.1 കോടി) ഫോളോവേഴ്സുള്ള പ്രധാന അക്കൗണ്ടാണ് ഹാക്ക് ചെയ്യപ്പെട്ടതെന്ന് സിജെപി സ്ഥാപകൻ അഭിജിത് ദീപ്കെ എക്സ് (ട്വിറ്റർ) പോസ്റ്റിലൂടെ വ്യക്തമാക്കി. നിലവിൽ അക്കൗണ്ടിലേക്കുള്ള ആക്സസ് പൂർണ്ണമായി നഷ്ടപ്പെട്ടുവെന്നും വീണ്ടെടുക്കാനുള്ള ശ്രമങ്ങൾ പരാജയപ്പെട്ടുവെന്നും അദ്ദേഹം അറിയിച്ചു. ഇതിന് പുറമെ പാർട്ടിക്ക് വേണ്ടി തുടങ്ങിയ ബാക്കപ്പ് ഇൻസ്റ്റാഗ്രാം അക്കൗണ്ട് ‘മെറ്റ’ കമ്പനി നീക്കം ചെയ്തതായും അദ്ദേഹം വെളിപ്പെടുത്തി.
അടുത്തിടെ ബിജെപിയുടെ ഔദ്യോഗിക ഇൻസ്റ്റഗ്രാം അക്കൗണ്ടിനേക്കാൾ കൂടുതൽ ജനപ്രീതിയിലേക്ക് സിജെപി കുതിച്ചിരുന്നു. ഇതിന് പിന്നാലെയാണ് അക്കൗണ്ട് പൂട്ടിക്കാനുള്ള നീക്കങ്ങൾ സജീവമായത്. നേരത്തെ മൂന്ന് തവണ അക്കൗണ്ട് പൂട്ടിക്കാൻ ശ്രമം നടന്നിരുന്നതായി സിജെപി ചൂണ്ടിക്കാട്ടിയിരുന്നു. രണ്ടു ലക്ഷത്തിലധികം ഫോളോവേഴ്സുള്ള ഇവരുടെ പ്രധാന എക്സ് (ട്വിറ്റർ) അക്കൗണ്ട് കേന്ദ്ര സർക്കാർ ഇടപെട്ട് നേരത്തെ പൂട്ടിച്ചിരുന്നു. തുടർന്ന് ആരംഭിച്ച ‘കോക്രോച്ച് ഈസ് ബാക്ക്’ എന്ന പുതിയ എക്സ് അക്കൗണ്ടിലും ലക്ഷത്തിലധികം ഫോളോവേഴ്സ് ദിവസങ്ങൾക്കുള്ളിൽ എത്തിയിരുന്നു.
എന്താണ് കോക്രോച്ച് ജനത പാർട്ടി (CJP)?
ചീഫ് ജസ്റ്റിസ് സൂര്യകാന്ത് യാദവ് കോടതി നടപടികൾക്കിടെ യുവാക്കളെ പാറ്റകളോട് (കോക്രോച്ച്) ഉപമിച്ചതിൽ പ്രതിഷേധിച്ചാണ് ഈ ഡിജിറ്റൽ രാഷ്ട്രീയ മുന്നണി രൂപം കൊണ്ടത്. “യാതൊരു തൊഴിലുമില്ലാത്ത ചില യുവാക്കളുണ്ട്. അവരിൽ ചിലർ മാധ്യമപ്രവർത്തകരും ചിലർ സോഷ്യൽ മീഡിയ, ആർടിഐ ആക്ടിവിസ്റ്റുകളുമായി സമൂഹത്തെ ആക്രമിക്കുന്നു. ഇവർ ‘കോക്രോച്ചു’കളും ‘പരാന്നഭോജികളു’മാണ്” എന്നായിരുന്നു ചീഫ് ജസ്റ്റിസിന്റെ പരാമർശം. ഇതിനെതിരെ ആക്ഷേപഹാസ്യ രൂപേണയാണ് യുവാക്കൾ പാർട്ടിക്ക് രൂപം നൽകിയത്. ഭൂമിയിലെ ഏത് വലിയ പ്രതിസന്ധിയെയും ആണവ യുദ്ധത്തെപ്പോലും അതിജീവിക്കാൻ കഴിയുന്ന ജീവിയാണ് പാറ്റയെന്നും അതുകൊണ്ടാണ് ഇതിനെ പ്രതിരോധത്തിന്റെ പ്രതീകമാക്കിയതെന്നും സ്ഥാപകർ വ്യക്തമാക്കുന്നു.
Story Summary: The official Instagram account of the satirical political front ‘Cockroach Janata Party’ (CJP), which had over 21 million followers, has been hacked. Founder Abhijit Dipke confirmed that they lost access to the page and that Meta also removed their backup Instagram account.
