ചെന്നൈ: കാനഡയിലെ ജീവിതവും വരുമാനവും ഉപേക്ഷിച്ച് ചെന്നൈ സ്വദേശിയായ സുദർശൻ എന്ന യുവാവ് ഇന്ത്യയിലേക്ക് മടങ്ങിയത് സോഷ്യൽ മീഡിയയിൽ വലിയ രീതിയിലുള്ള സംവാദങ്ങൾക്ക് വഴിതുറന്നിരിക്കുകയാണ് ( Chennai Man Returns From Canada). വിദേശരാജ്യങ്ങളിലെ വൈകാരികമായ ഒറ്റപ്പെടലും ഏകാന്തതയും അവിടെനിന്ന് ലഭിക്കുന്ന സാമ്പത്തിക നേട്ടങ്ങളേക്കാൾ വലുതാണെന്ന് വ്യക്തമാക്കുന്ന സുദർശന്റെ ഇൻസ്റ്റാഗ്രാം വീഡിയോയാണ് ഇപ്പോൾ വൈറലായിരിക്കുന്നത്. താൻ സ്വയം ഇന്ത്യയിലേക്ക് നാടുകടത്തപ്പെട്ടതാണെന്ന് വിശേഷിപ്പിച്ച യുവാവ്, കൂടെ ചെലവഴിക്കാൻ ആരുമില്ലെങ്കിൽ പിന്നെ പണം കൊണ്ട് എന്ത് പ്രയോജനമാണുള്ളതെന്നും കാനഡ കടുത്ത മാനസിക വിമ്മിഷ്ടം ഉണ്ടാക്കുന്ന രാജ്യമാണെന്നും വീഡിയോയിലൂടെ തുറന്നടിച്ചു. നാട്ടിൽ തിരിച്ചെത്തിയ ശേഷമാണ് താൻ ഏറെ നാളുകൾക്ക് ശേഷം സന്തോഷത്തോടെ പുഞ്ചിരിക്കുന്നതെന്നും അദ്ദേഹം കൂട്ടിച്ചേർത്തു.
ഈ വീഡിയോ സോഷ്യൽ മീഡിയയിൽ വലിയ രീതിയിലുള്ള പ്രതികരണങ്ങൾക്കാണ് കാരണമായിരിക്കുന്നത്. പാശ്ചാത്യ രാജ്യങ്ങളിൽ താമസിച്ച് സമാനമായ രീതിയിൽ ഒറ്റപ്പെടലും കമ്മ്യൂണിറ്റിയുടെ അഭാവവും അനുഭവിക്കുന്ന നിരവധി യുവ ഇന്ത്യക്കാർ സുദർശന്റെ നിലപാടിനെ പിന്തുണച്ച് രംഗത്തെത്തിയിട്ടുണ്ട്. കാനഡ വിട്ട് രണ്ട് വർഷം മുൻപ് ഇന്ത്യയിൽ തിരിച്ചെത്തിയ ഒരാൾ കുറിച്ചത്, കഠിനാധ്വാനം ചെയ്താൽ ഇന്ത്യയിൽ എല്ലാമുണ്ടെന്നും സന്തോഷമുള്ളിടത്ത് ജീവിക്കുന്നതാണ് നല്ലതെന്നുമാണ്. എന്നാൽ ഇതിന് വിപരീതമായി, കാനഡ മികച്ച ജീവിത സാഹചര്യങ്ങളും സുരക്ഷിതത്വവും മികച്ച അവസരങ്ങളും നൽകുന്നുണ്ടെന്ന് വാദിക്കുന്നവരും കുറവല്ല. ഉയർന്ന ശമ്പളമുള്ള വിദേശ ജോലികൾ മാത്രമാണ് ആത്യന്തികമായ വിജയമെന്ന പരമ്പരാഗത ധാരണകളെ തിരുത്തുന്നതാണ് പുതിയ തലമുറയിലെ പ്രവാസി യുവാക്കൾക്കിടയിൽ നടക്കുന്ന ഈ തുറന്ന ചർച്ചകൾ.
View this post on Instagram
