പട്ന: ബിഹാറിലെ സസാരാം റെയിൽവേ സ്റ്റേഷനിൽ നിർത്തിയിട്ടിരുന്ന പാസഞ്ചർ ട്രെയിനിന് തീപിടിച്ചു. സസാരാമിൽ നിന്ന് പട്നയിലേക്ക് പുറപ്പെടാൻ തയ്യാറെടുക്കുകയായിരുന്ന ഫാസ്റ്റ് പാസഞ്ചർ ട്രെയിനിന്റെ ഒരു കോച്ചിലാണ് തിങ്കളാഴ്ച രാവിലെ ആറ് മണിയോടെ തീപിടുത്തമുണ്ടായത് ( Bihar Sasaram Railway Station Train Fire). സ്റ്റേഷനിലെ ആറാം നമ്പർ പ്ലാറ്റ്ഫോമിൽ വാഹനം കിടക്കുമ്പോഴായിരുന്നു സംഭവം. തീപിടുത്തത്തെ തുടർന്ന് പ്ലാറ്റ്ഫോമിലുണ്ടായിരുന്ന യാത്രക്കാർ പരിഭ്രാന്തരായി ഓടിയെങ്കിലും അപകടത്തിൽ ആർക്കും പരിക്കുകളോ ജീവഹാനിയോ സംഭവിച്ചിട്ടില്ല.
റെയിൽവേ പോലീസും ഫയർഫോഴ്സും സംയുക്തമായി നടത്തിയ ശ്രമത്തിനൊടുവിലാണ് തീ പൂർണ്ണമായും നിയന്ത്രണവിധേയമാക്കിയത്. അപകടത്തിൽ ട്രെയിനിന്റെ ഒരു കോച്ച് പൂർണ്ണമായും കത്തിയമർന്നു. പ്രാഥമിക അന്വേഷണത്തിൽ ഷോർട്ട് സർക്യൂട്ടാണ് തീപിടുത്തത്തിന് കാരണമായതെന്നാണ് സൂചന. കേടുപാടുകൾ സംഭവിച്ച കോച്ച് ട്രെയിനിൽ നിന്ന് വേർപെടുത്തിയ ശേഷം വിശദമായ പരിശോധനകൾ നടത്തി സർവീസ് പുനരാരംഭിക്കാനുള്ള നടപടികൾ റെയിൽവേ അധികൃതർ സ്വീകരിച്ചു വരികയാണ്. കഴിഞ്ഞ ദിവസം മധ്യപ്രദേശിലെ രത്ലാമിന് സമീപം ഡൽഹിയിലേക്കുള്ള രാജധാനി എക്സ്പ്രസിന്റെ എസി കോച്ചിന് തീപിടിച്ചതിന് പിന്നാലെയാണ് വീണ്ടുമൊരു ട്രെയിൻ അപകടം കൂടി റിപ്പോർട്ട് ചെയ്യുന്നത്. തുടർച്ചയായുണ്ടാകുന്ന തീപിടുത്തങ്ങളുടെ പശ്ചാത്തലത്തിൽ കോച്ചുകളിലെ അഗ്നിശമന സംവിധാനങ്ങളെക്കുറിച്ച് രാജ്യവ്യാപകമായി സുരക്ഷാ ഓഡിറ്റ് നടത്താൻ റെയിൽവേ മന്ത്രാലയം തീരുമാനിച്ചിട്ടുണ്ട്.
Summary: A passenger train bound for Patna caught fire at Bihar’s Sasaram railway station early Monday morning, completely destroying one coach. The incident occurred on platform six around 6 am, shortly before its scheduled departure, triggered by a suspected short circuit. While the blaze caused panic among passengers, no casualties were reported as railway police and fire fighters quickly brought the flames under control. This incident comes a day after a similar fire broke out in a Rajdhani Express coach in Madhya Pradesh, prompting railway authorities to launch a nationwide fire safety audit.
