ഗൾഫ് മലയാളി യാത്രക്കാർക്ക് വലിയ ആശ്വാസമേകി കോഴിക്കോട് നിന്നും ഒമാനിലെ സലാല, കുവൈറ്റ് എന്നിവിടങ്ങളിലേക്കുള്ള വിമാന സർവീസുകൾ പുനരാരംഭിച്ച് എയർ ഇന്ത്യ എക്സ്പ്രസ് (Air India Express Gulf Flights Resumed). ഇതോടെ പശ്ചിമേഷ്യൻ (West Asia) മേഖലയിലേക്കുള്ള തങ്ങളുടെ മുഴുവൻ വിമാന സർവീസുകളും കമ്പനി പൂർണ്ണതോതിൽ പുനഃസ്ഥാപിച്ചു. കോഴിക്കോട് നിന്നും സലാലയിലേക്കുള്ള സർവീസ് ജൂലൈ രണ്ടിന് വിജയകരമായി പുനരാരംഭിച്ചു കഴിഞ്ഞു. കോഴിക്കോട് – കുവൈറ്റ് സർവീസുകൾ ജൂലൈ മൂന്നിനും, ബെംഗളൂരുവിൽ നിന്നും കുവൈറ്റിലേക്കുള്ള നേരിട്ടുള്ള വിമാന സർവീസ് ജൂലൈ നാലിനും പുനരാരംഭിക്കും.
പുതിയ സമയക്രമം അനുസരിച്ച് ചൊവ്വ, വ്യാഴം ദിവസങ്ങളിൽ കോഴിക്കോട് നിന്നും രാവിലെ 11 മണിക്ക് സലാലയിലേക്കും ഉച്ചകഴിഞ്ഞ് 2:15ന് തിരികെ കോഴിക്കോട്ടേക്കുമാണ് വിമാനം പറക്കുക. കോഴിക്കോട് നിന്നും കുവൈറ്റിലേക്കുള്ള പ്രതിവാര വിമാനം വെള്ളിയാഴ്ചകളിൽ രാവിലെ 7:30ന് കോഴിക്കോട് നിന്നും പുറപ്പെട്ട്, 11:05ന് കുവൈറ്റിൽ നിന്നും തിരികെ തിരിച്ച് വൈകിട്ട് 6:50ന് കോഴിക്കോട് എത്തിച്ചേരും. ബെംഗളൂരു – കുവൈറ്റ് വിമാനം വെള്ളിയാഴ്ചകളിൽ പുലർച്ചെ 2:25ന് പുറപ്പെട്ട് രാവിലെ 4:50ന് കുവൈറ്റിൽ ലാൻഡ് ചെയ്യും. അതേ ദിവസം രാവിലെ 5:50ന് കുവൈറ്റിൽ നിന്നും തിരികെ പുറപ്പെടുന്ന വിമാനം ഉച്ചയ്ക്ക് 1:25ന് ബെംഗളൂരുവിൽ തിരിച്ചെത്തും. യാത്രക്കാർക്ക് എയർ ഇന്ത്യ എക്സ്പ്രസ് വെബ്സൈറ്റ്, മൊബൈൽ ആപ്പ് എന്നിവ വഴി ടിക്കറ്റുകൾ ബുക്ക് ചെയ്യാം.
സർവീസുകൾ ആഴ്ചയിൽ മൂന്നാക്കി ഉയർത്തും
തുടക്കത്തിലെ സർവീസുകൾക്ക് ശേഷം ജൂലൈ 5 മുതൽ കോഴിക്കോട് – കുവൈറ്റ് സെക്ടറിലെ സർവീസുകൾ ആഴ്ചയിൽ മൂന്നായി ഉയർത്താൻ കമ്പനി തീരുമാനിച്ചിട്ടുണ്ട്. ഇതോടെ ബുധൻ, വെള്ളി, ഞായർ ദിവസങ്ങളിൽ പുലർച്ചെ 2:15ന് കോഴിക്കോട് നിന്നും കുവൈറ്റിലേക്കും രാവിലെ 5:50ന് കുവൈറ്റിൽ നിന്നും തിരികെ കോഴിക്കോട്ടേക്കും സർവീസുകൾ ലഭ്യമാകും. ജൂലൈ 7 മുതൽ ബെംഗളൂരു – കുവൈറ്റ് സെക്ടറിലും ആഴ്ചയിൽ മൂന്ന് ദിവസമായി സർവീസ് വർദ്ധിപ്പിക്കും. തിങ്കൾ, ചൊവ്വ, ശനി ദിവസങ്ങളിൽ പുലർച്ചെ 2:25ന് ബെംഗളൂരുവിൽ നിന്നും രാവിലെ 5:50ന് കുവൈറ്റിൽ നിന്നുമായിരിക്കും ഈ സർവീസുകൾ. എയർ ഇന്ത്യ എക്സ്പ്രസിന്റെ കുവൈറ്റിലേക്കുള്ള മുഴുവൻ വിമാനങ്ങളും കുവൈറ്റ് അന്താരാഷ്ട്ര വിമാനത്താവളത്തിലെ ടെർമിനൽ നാലിൽ (Terminal 4) നിന്നായിരിക്കും ഓപ്പറേറ്റ് ചെയ്യുക.
സലാലയ്ക്ക് പുറമെ ഒമാനിലെ മസ്കറ്റിലേക്കും (Muscat) എയർ ഇന്ത്യ എക്സ്പ്രസ് വിമാന സർവീസുകൾ പുനഃസ്ഥാപിച്ചിട്ടുണ്ട്. ജൂലൈ 3 മുതൽ ബെംഗളൂരുവിൽ നിന്നായിരിക്കും ഈ സർവീസ്. നിലവിൽ മസ്കറ്റിൽ നിന്നും ഇന്ത്യയിലെ ഏഴ് പ്രമുഖ വിമാനത്താവളങ്ങളിലേക്ക് ആഴ്ചതോറും 40 വിമാന സർവീസുകളാണ് എയർ ഇന്ത്യ എക്സ്പ്രസ് നടത്തുന്നത്.
നിലവിൽ ബഹ്റൈൻ, കുവൈറ്റ്, ഒമാൻ, ഖത്തർ, സൗദി അറേബ്യ, യുഎഇ തുടങ്ങി പശ്ചിമേഷ്യയിലെ 13 പ്രധാന കേന്ദ്രങ്ങളിലേക്ക് ഇന്ത്യയിലെ 18 വിമാനത്താവളങ്ങളിൽ നിന്നായി ആഴ്ചതോറും 780 വിമാന സർവീസുകളാണ് എയർ ഇന്ത്യ എക്സ്പ്രസിനുള്ളത്. അടുത്തിടെ നവിമുംബൈ – അബുദാബി, ഗുവാഹത്തി – അബുദാബി, ഗുവാഹത്തി – ദുബായ്, ബെംഗളൂരു – ഫുക്കറ്റ്, പൂനെ, അമൃത്സർ എന്നിവിടങ്ങളിലേക്കും കമ്പനി പുതിയ സർവീസുകൾ ആരംഭിച്ചിരുന്നു. മലബാറിലെ യാത്രക്കാരെ സംബന്ധിച്ച് ഏറെ നിർണ്ണായകമായ കോഴിക്കോട് വിമാനത്താവളത്തിൽ നിന്നും ബെംഗളൂരുവിലേക്കും ഗൾഫ് മേഖലകളിലെ 13 നഗരങ്ങളിലേക്കുമായി ആഴ്ചതോറും 85 സർവീസുകളാണ് എയർ ഇന്ത്യ എക്സ്പ്രസ് ഇപ്പോൾ വിജയകരമായി നടത്തുന്നത്.
Story Summary:
Air India Express has fully restored its West Asian flight network by resuming services from Kozhikode to Salalah and Kuwait. While the Kozhikode-Salalah route resumed on July 2, flights to Kuwait from Kozhikode and Bengaluru will recommence on July 3 and July 4, respectively, before expanding to thrice-weekly operations later in the week.
