വിത്തുകൾ പാകാനും തൈകൾ നടാനുമുള്ള സമയമാണിത്. സാധാരണയായി വിത്തുകൾ മുളപ്പിക്കാനും ചെടിച്ചട്ടികൾക്കായും നാം വലിയ തോതിൽ പ്ലാസ്റ്റിക് ഉൽപ്പന്നങ്ങളെയാണ് ആശ്രയിക്കാറുള്ളത്. എന്നാൽ ഇവ കാലക്രമേണ വിഘടിച്ച് ‘മൈക്രോപ്ലാസ്റ്റിക്സ്’ ‘ആയി മാറുകയും മണ്ണിലെ സൂക്ഷ്മജീവികളെ നശിപ്പിക്കുകയും ചെയ്യുന്നു. ഈ വിഷാംശം ചെടികളിലൂടെ നമ്മുടെ ഭക്ഷണത്തിലും ശരീരത്തിലും എത്തിയേക്കാം. (Eco-friendly Gardening Tips)
മണ്ണിലെ പ്ലാസ്റ്റിക് മലിനീകരണം കുറയ്ക്കാൻ പൂന്തോട്ടത്തിൽ ഉപയോഗിക്കാവുന്ന ചില ബദൽ മാർഗ്ഗങ്ങൾ താഴെ പറയുന്നവയാണ്:
1. വിത്തുകൾ പാകാൻ ‘സോയിൽ ബ്ലോക്കിംഗ്’:
പ്ലാസ്റ്റിക് ട്രേകൾക്ക് പകരം മണ്ണ് കൊണ്ട് തൈകൾ നടാനുള്ള ബ്ലോക്കുകൾ നിർമ്മിക്കാം. ലോഹം കൊണ്ട് നിർമ്മിച്ച ‘സോയിൽ ബ്ലോക്കിംഗ് കിറ്റുകൾ’ ഉപയോഗിച്ച് കമ്പോസ്റ്റും വളവും ചേർത്ത മിശ്രിതം ക്യൂബ് ആകൃതിയിലുള്ള കട്ടകളാക്കി മാറ്റാം. ഇതിൽ വിത്തുകൾ പാകാം. ഇവയ്ക്ക് ചട്ടികളില്ലാത്തതിനാൽ വേരുകൾ വട്ടം ചുറ്റി നശിക്കാതെ
കൂടുതൽ കരുത്തോടെ വളരും.
2. പ്രകൃതിദത്ത ചട്ടികൾ:
പ്ലാസ്റ്റിക് ചട്ടികൾക്ക് പകരം ടെറാക്കോട്ട, മരം എന്നിവ കൊണ്ട് നിർമ്മിച്ചവ തിരഞ്ഞെടുക്കുക. ചകിരിനാര്, ഉണങ്ങിയ ചാണകം എന്നിവ കൊണ്ട് നിർമ്മിച്ച ജൈവചട്ടികളും വിപണിയിൽ ലഭ്യമാണ്. ഇവ തൈകളോടൊപ്പം തന്നെ മണ്ണിൽ നടാം.
3. ഫാബ്രിക് ഗ്രോ ബാഗുകൾ:
സിന്തറ്റിക് നാരുകൾക്ക് പകരം സ്വാഭാവിക നാരുകൾ കൊണ്ട് നിർമ്മിച്ച ഫാബ്രിക് ബാഗുകൾ ഉപയോഗിക്കാം. ഉരുളക്കിഴങ്ങ്, തക്കാളി തുടങ്ങിയവ വളർത്താൻ ഇവ ഏറെ അനുയോജ്യമാണ്.
4. ജൈവവളവും കമ്പോസ്റ്റും:
പ്ലാസ്റ്റിക് കവറുകളിൽ വരുന്ന വളം വാങ്ങുന്നതിന് പകരം വീട്ടിൽ തന്നെ കമ്പോസ്റ്റ് നിർമ്മിക്കുക. ഇത് പ്ലാസ്റ്റിക് കവറുകളുടെ ഉപയോഗം കുറയ്ക്കാൻ സഹായിക്കും. കടയിൽ നിന്ന് വാങ്ങുകയാണെങ്കിൽ വലിയ തോതിൽ വാങ്ങുന്നത് കവറുകളുടെ എണ്ണം കുറയ്ക്കും.
5. മറ്റ് ഉപകരണങ്ങൾ:
- ലാൻഡ്സ്കേപ്പ് ഫാബ്രിക് ഒഴിവാക്കുക: പ്ലാസ്റ്റിക് ഷീറ്റുകൾക്ക് പകരം മരപ്പൊടി, ഉണങ്ങിയ ഇലകൾ, ചരൽ എന്നിവ ഉപയോഗിച്ച് പുതയിടുക.
- താങ്ങുകൾ: തക്കാളിക്കും മറ്റ് പടർന്നു വളരുന്ന ചെടികൾക്കും മുള, മരം അല്ലെങ്കിൽ ലോഹം കൊണ്ടുള്ള കമ്പുകൾ ഉപയോഗിക്കുക. പ്ലാസ്റ്റിക് കയറുകൾക്ക് പകരം ചണം അല്ലെങ്കിൽ ഹെമ്പ് നൂലുകൾ ഉപയോഗിക്കാം.
- മാർക്കറുകൾ: ചെടികളുടെ പേര് എഴുതി വെക്കാൻ പ്ലാസ്റ്റിക് സ്റ്റിക് ഉപയോഗിക്കുന്നതിന് പകരം തടി കൊണ്ടുള്ള സ്റ്റിക് അല്ലെങ്കിൽ ഐസ്ക്രീം സ്റ്റിക് ഉപയോഗിക്കാം.
പൂർണ്ണമായും പ്ലാസ്റ്റിക് ഒഴിവാക്കാൻ കഴിഞ്ഞില്ലെങ്കിലും, ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് സാധനങ്ങൾ ഒഴിവാക്കി വർഷങ്ങളോളം ഈടുനിൽക്കുന്നവ തിരഞ്ഞെടുക്കുന്നത് വലിയൊരു മാറ്റത്തിന് തുടക്കമിടും.
