കൊല്ലം: തിരഞ്ഞെടുപ്പിൽ പരാജയപ്പെട്ടിട്ടും താൻ എംഎൽഎ ആയിരുന്നപ്പോൾ കൊല്ലത്തെ ഓഫീസിന് മുന്നിൽ സ്ഥാപിച്ചിരുന്ന ഔദ്യോഗിക ബോർഡ് ഇതുവരെയും മാറ്റാൻ തയ്യാറാകാത്ത നടനും സിപിഎം നേതാവുമായ എം. മുകേഷിനെതിരെ വ്യാപക പ്രതിഷേധം (Actor M Mukesh MLA Board Controversy). സംഭവത്തിൽ അതൃപ്തി രേഖപ്പെടുത്തി യൂത്ത് കോൺഗ്രസ് നേതൃത്വം കൊല്ലം ജില്ലാ കളക്ടർക്കും കൊല്ലം വെസ്റ്റ് എസ്എച്ച്ഒയ്ക്കും ഔദ്യോഗികമായി പരാതി നൽകി. ജനങ്ങൾ തോൽപ്പിച്ചിട്ടും ഇപ്പോഴും അതിന്റെ ‘ഹാങ്ങോവർ’ വിടാൻ തയ്യാറാകാത്ത വ്യക്തിയാണ് മുൻ എംഎൽഎ എന്ന് യൂത്ത് കോൺഗ്രസ് പരിഹസിച്ചു.
നിലവിൽ കൊല്ലം നിയോജകമണ്ഡലത്തിൽ ജനങ്ങൾ വമ്പിച്ച ഭൂരിപക്ഷത്തിൽ വിജയിപ്പിച്ചെടുത്ത ഒരു ഫുൾടൈം എംഎൽഎയായി ബിന്ദു കൃഷ്ണ ചുമതലയേറ്റിട്ടുണ്ട്. എന്നിട്ടും നിയമവിരുദ്ധമായി മുൻപ് സ്ഥാപിച്ച ബോർഡ് നിലനിർത്തുന്നത് വഴി ജനങ്ങളെ തെറ്റിദ്ധരിപ്പിക്കാനാണ് മുകേഷ് ശ്രമിക്കുന്നതെന്ന് യൂത്ത് കോൺഗ്രസ് സംസ്ഥാന വൈസ് പ്രസിഡന്റ് അഡ്വ. വിഷ്ണു സുനിൽ പന്തളം കടുത്ത ഭാഷയിൽ വിമർശിച്ചു.
“അന്തസ്സ് വേണമടോ, അന്തസ്സ്…”
വിഷയത്തിൽ മുകേഷിനെതിരെ കടുത്ത പരിഹാസവുമായി അഡ്വ. വിഷ്ണു സുനിൽ പന്തളം സോഷ്യൽ മീഡിയയിൽ പങ്കുവെച്ച കുറിപ്പ് ഇതിനകം വലിയ ചർച്ചയായിട്ടുണ്ട്. “കൊല്ലം നിയോജകമണ്ഡലം നിവാസികൾക്ക് അവർ വമ്പിച്ച ഭൂരിപക്ഷത്തിൽ വിജയിപ്പിച്ച ഒരു ഫുൾടൈം എംഎൽഎ ശ്രീമതി. ബിന്ദു കൃഷ്ണ ഉണ്ട്. മുൻ എംഎൽഎ ആയിട്ടും ഇന്നും ഹാങ്ങോവർ വിടാൻ തയ്യാറാകാതെ എംഎൽഎ എന്ന് എഴുതിയ ബോർഡ് മാറ്റാതെ മുൻ പാർടൈം എംഎൽഎ എം. മുകേഷ്; അന്തസ്സ് വേണമടൊ, അന്തസ്സ്……” എന്ന് വിഷ്ണു സുനിൽ പന്തളം തന്റെ കുറിപ്പിലൂടെ തുറന്നടിച്ചു.
പദവി ഒഴിഞ്ഞ ശേഷവും ഔദ്യോഗിക ചിഹ്നങ്ങളും ബോർഡുകളും ദുരുപയോഗം ചെയ്യുന്നത് ഭാരതീയ ന്യായ സംഹിത (BNS) പ്രകാരം കൃത്യമായി ശിക്ഷാർഹമായ കുറ്റമാണെന്ന് പരാതിയിൽ ചൂണ്ടിക്കാണിക്കുന്നു. മുകേഷിന്റെ ഓഫീസിന് മുന്നിലെ ബോർഡ് അടിയന്തിരമായി നീക്കം ചെയ്യാൻ അധികൃതർ തയ്യാറാകണമെന്നും അല്ലാത്തപക്ഷം ശക്തമായ ജനകീയ പ്രതിഷേധങ്ങളുമായി യൂത്ത് കോൺഗ്രസ് തെരുവിലിറങ്ങുമെന്നും സംഘടന മുന്നറിയിപ്പ് നൽകി. എന്നാൽ ഈ വിവാദത്തോട് മുകേഷോ പ്രാദേശിക സിപിഎം നേതൃത്വമോ ഇതുവരെയും ഔദ്യോഗികമായി പ്രതികരിച്ചിട്ടില്ല.
Story Summary: Youth Congress has filed official complaints with the Kollam District Collector and the Kollam West SHO against actor and CPM leader M. Mukesh for failing to remove the ‘MLA’ board from his office despite losing the election. Mocking Mukesh for not overcoming his election defeat hangover, Youth Congress State Vice President Adv. Vishnu Sunil Panthalam pointed out that Kollam now has a full-time MLA, Bindu Krishna. He emphasized that misusing the official title post-term is a punishable offense under the Bharatiya Nyaya Sanhita (BNS).
