കണ്ണൂർ: പറശ്ശിനിക്കടവിലെ ലോഡ്ജിൽ സ്ത്രീയെ മരിച്ച നിലയിൽ കണ്ടെത്തിയതിന് പിന്നാലെ, കൂടെയുണ്ടായിരുന്നയാളെയും മരിച്ച നിലയിൽ കണ്ടെത്തി. കണ്ണപുരം അയ്യോത്ത് സ്വദേശി കെ.വി. സീമ (50) ആണ് ലോഡ്ജ് മുറിയിൽ മരിച്ചത്. ഇവരോടൊപ്പം ഉണ്ടായിരുന്ന അയ്യോത്തെ കടേൽപറമ്പിൽ വീട്ടിൽ കെ.പി. വിജയനെ തൂങ്ങിമരിച്ച നിലയിൽ കണ്ടെത്തുകയായിരുന്നു.(Woman’s body found in lodge, Man found dead after)
ബുധനാഴ്ചയാണ് സീമയും വിജയനും പറശ്ശിനിക്കടവിലെ ലോഡ്ജിൽ മുറിയെടുത്തത്. ഇവർ നേരത്തെയും ഇവിടെ താമസിച്ചിട്ടുണ്ടെന്ന് ലോഡ്ജ് അധികൃതർ പറയുന്നു. വൈകുന്നേരത്തോടെ മുറി പുറത്തുനിന്ന് പൂട്ടി വിജയൻ പുറത്തേക്ക് പോയി. രാത്രിയായിട്ടും ഇയാൾ മടങ്ങിയെത്താത്തതിനെ തുടർന്ന് ലോഡ്ജ് ജീവനക്കാർ ഫോണിൽ ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫ് ആയിരുന്നു.
സംശയം തോന്നിയ അധികൃതർ പോലീസിൽ വിവരമറിയിച്ചു. തുടർന്ന് പോലീസ് എത്തി മുറി തുറന്നപ്പോഴാണ് സീമയെ മരിച്ച നിലയിൽ കണ്ടെത്തിയത്. വിജയനായി തിരച്ചിൽ നടത്തുന്നതിനിടെയാണ് ഇന്ന് മാട്ടൂലിൽ ഇയാളെ മരിച്ച നിലയിൽ കണ്ടെത്തിയത്.
