തിരുവനന്തപുരം: സംസ്ഥാനത്തെ സർക്കാർ ഓഫീസുകളുടെ പ്രവൃത്തി ദിനങ്ങൾ ആഴ്ചയിൽ അഞ്ചായി നിജപ്പെടുത്തുന്നത് സംബന്ധിച്ച ചർച്ചകൾക്കായി ചീഫ് സെക്രട്ടറി വീണ്ടും സർവ്വീസ് സംഘടനകളുടെ യോഗം വിളിച്ചു. വെള്ളിയാഴ്ച രാവിലെ 10 മണിക്ക് ഓൺലൈനായാണ് യോഗം ചേരുന്നത്. നേരത്തെ നിശ്ചയിച്ചിരുന്നെങ്കിലും ചില കാരണങ്ങളാൽ മാറ്റിവെച്ച ചർച്ചയാണ് ഇപ്പോൾ നടക്കുന്നത്.(Will the working day in government offices be reduced to 5 days? Chief Secretary calls another crucial meeting)
പ്രവൃത്തി ദിനങ്ങൾ ആറിൽ നിന്ന് അഞ്ചായി കുറയ്ക്കണമെന്ന് ഭരണ പരിഷ്കാര കമ്മീഷനും ശമ്പള കമ്മീഷനും നേരത്തെ ശുപാർശ ചെയ്തിരുന്നു. ഇതിന് പകരമായി നിർദ്ദേശങ്ങൾ മുന്നോട്ട് വച്ചു. നിലവിലുള്ള ജോലി സമയം പ്രതിദിനം ഒരു മണിക്കൂർ വർദ്ധിപ്പിക്കുക. ഈ നിർദ്ദേശത്തോട് സർവ്വീസ് സംഘടനകൾക്ക് വിയോജിപ്പില്ല. ശനിയാഴ്ച അവധി നൽകുന്നതിന് പകരമായി നിലവിലുള്ള ചില പൊതു അവധി ദിവസങ്ങൾ വെട്ടിക്കുറയ്ക്കുക.
ജോലി സമയം കൂട്ടുന്നതിനെ സംഘടനകൾ സ്വാഗതം ചെയ്യുന്നുണ്ടെങ്കിലും, പൊതു അവധി ദിവസങ്ങൾ കുറയ്ക്കുന്നതിനെ അവർ ശക്തമായി എതിർക്കുകയാണ്. ഓരോ സംഘടനയിൽ നിന്നും ഓരോ പ്രതിനിധിയെ വീതം പങ്കെടുപ്പിച്ച് നടത്തുന്ന ഈ യോഗത്തിൽ ഇക്കാര്യത്തിൽ ഒരു സമവായമുണ്ടാകുമോ എന്നാണ് സർക്കാർ ഉറ്റുനോക്കുന്നത്.
