തിരുവനന്തപുരം: കേരളത്തിന്റെ പതിമൂന്നാം മുഖ്യമന്ത്രിയായി കോൺഗ്രസ് നേതാവ് വി.ഡി. സതീശൻ സത്യപ്രതിജ്ഞ ചെയ്ത് അധികാരമേറ്റു. തിരുവനന്തപുരം സെൻട്രൽ സ്റ്റേഡിയത്തിൽ നടന്ന പ്രൗഢഗംഭീരമായ ചടങ്ങിൽ ഗവർണർ രാജേന്ദ്ര ആർലേക്കർ മുൻപാകെയാണ് അദ്ദേഹം സത്യവാചകം ചൊല്ലിയത്. മുഖ്യമന്ത്രിക്ക് തൊട്ടുപിന്നാലെ മറ്റ് 20 മന്ത്രിമാരും ഒരേ വേദിയിൽ ഒരുമിച്ച് സത്യപ്രതിജ്ഞ ചെയ്തു. 1982-ലെ കെ. കരുണാകരൻ സർക്കാരിന് ശേഷം ആറ് പതിറ്റാണ്ടിനിടയിൽ ആദ്യമായാണ് യു.ഡി.എഫ് മന്ത്രിസഭയിലെ മുഴുവൻ അംഗങ്ങളും ഒരേ വേദിയിൽ ഒന്നിച്ച് സത്യപ്രതിജ്ഞ ചെയ്യുന്നത് എന്ന ചരിത്രപരമായ പ്രത്യേകതയും ഈ ചടങ്ങിനുണ്ട്.(VD Satheesan Cabinet Oath Ceremony Shibu Baby John CP John Solemn Oath Sunny Joseph Minister)
മന്ത്രിസഭയിൽ മുഖ്യമന്ത്രി ഉൾപ്പെടെ 19 പേർ ദൈവനാമത്തിൽ സത്യപ്രതിജ്ഞ ചെയ്തപ്പോൾ, ആർ.എസ്.പി (RSP) നേതാവ് ഷിബു ബേബി ജോണും സി.എം.പി (CMP) നേതാവ് സി.പി. ജോണും ‘സഗൗരവം’ സത്യവാചകം ചൊല്ലി അധികാരമേറ്റു. മുഖ്യമന്ത്രിക്ക് പിന്നാലെ രണ്ടാമനായി മുസ്ലിം ലീഗ് നിയമസഭാ കക്ഷി നേതാവ് പി.കെ. കുഞ്ഞാലിക്കുട്ടിയാണ് സത്യപ്രതിജ്ഞ ചെയ്തത്. ഏറ്റവും ഒടുവിലായി മന്ത്രിസഭയിലെ ഏറ്റവും പ്രായം കുറഞ്ഞ അംഗമായ ഒ.ജെ. ജനീഷും സത്യപ്രതിജ്ഞ പൂർത്തിയാക്കി.
ആർ.എസ്.പി സംസ്ഥാന സെക്രട്ടറിയായ ഷിബു ബേബി ജോണിന് ഇത് മന്ത്രിപദവിയിൽ രണ്ടാമൂഴമാണ്. യു.ഡി.എഫിന്റെ പ്രമുഖ രാഷ്ട്രീയ തന്ത്രജ്ഞനായ സി.എം.പി നേതാവ് സി.പി. ജോണിന് ഇത് കന്നി ദൗത്യമാണ്. തന്റെ രാഷ്ട്രീയ ജീവിതത്തിൽ ഇതാദ്യമായാണ് അദ്ദേഹം എം.എ.ൽ.എയാകുന്നതും മന്ത്രിപദവിയിലെത്തുന്നതും. തിരുവനന്തപുരം മണ്ഡലത്തിൽ സി.പി.എം സ്ഥാനാർത്ഥി സുധീർ കരമനയെ അട്ടിമറിച്ചാണ് സി.പി. ജോണിന്റെ ഈ ചരിത്ര വിജയം.
കെ.പി.സി.സി അധ്യക്ഷൻ സണ്ണി ജോസഫ് വി.ഡി. സതീശൻ മന്ത്രിസഭയിൽ അംഗമായത് കോൺഗ്രസ് രാഷ്ട്രീയത്തിലെ അപൂർവ്വമായ നീക്കമാണ്. കെ.പി.സി.സി പ്രസിഡന്റ് പദവിയിലിരിക്കെ ഒരാൾ മന്ത്രിയാകുന്നത് ഇതാദ്യമായാണ്. സണ്ണി ജോസഫിന്റെ ആദ്യ മന്ത്രി പദവി കൂടിയാണിത്. അതേസമയം, മന്ത്രിസഭയിലെ ഏറ്റവും മുതിർന്ന കോൺഗ്രസ് നേതാവായ രമേശ് ചെന്നിത്തലയ്ക്ക് ഇത് മന്ത്രിയെന്ന നിലയിൽ മൂന്നാമൂഴമാണ്. സംസ്ഥാനത്തിന്റെ സുപ്രധാനമായ ആഭ്യന്തര, വിജിലൻസ് വകുപ്പുകൾ ചെന്നിത്തലയ്ക്കായിരിക്കും എന്നാണ് പുറത്തുവരുന്ന സൂചനകൾ.
മുഖ്യമന്ത്രി വി.ഡി. സതീശൻ, പി.കെ. കുഞ്ഞാലിക്കുട്ടി, രമേശ് ചെന്നിത്തല, സണ്ണി ജോസഫ്, കെ. മുരളീധരൻ, മോൻസ് ജോസഫ്, അനൂപ് ജേക്കബ്, എ.പി. അനിൽകുമാർ, എൻ. ഷംസുദ്ദീൻ, പി.സി. വിഷ്ണുനാഥ്, റോജി എം. ജോൺ, ബിന്ദു കൃഷ്ണ, എം. ലിജു, കെ.എം. ഷാജി, പി.കെ. ബഷീർ, വി.ഇ. അബ്ദുൾ ഗഫൂർ, ടി. സിദ്ദിഖ്, കെ.എ. തുളസി, ഒ.ജെ. ജനീഷ് എന്നിവരാണ് ദൈവനാമത്തിൽ സത്യപ്രതിജ്ഞ ചെയ്ത മറ്റ് മന്ത്രിമാർ.
ദേശീയ-സംസ്ഥാന രാഷ്ട്രീയത്തിലെ പ്രമുഖരുടെ വൻ നിരയാണ് സത്യപ്രതിജ്ഞയ്ക്ക് സാക്ഷ്യം വഹിക്കാൻ തലസ്ഥാനത്ത് എത്തിയത്. കോൺഗ്രസ് അധ്യക്ഷൻ മല്ലികാർജുൻ ഖാർഗെ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി, കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ, തെലങ്കാന മുഖ്യമന്ത്രി എ. രേവന്ത് റെഡ്ഡി തുടങ്ങിയ ദേശീയ നേതാക്കൾ ചടങ്ങിന് മാറ്റുകൂട്ടി. കേരളത്തിലെ രാഷ്ട്രീയ സൗഹാർദ്ദത്തിന്റെ വേദിയായും സെൻട്രൽ സ്റ്റേഡിയം മാറി. പുതിയ പ്രതിപക്ഷ നേതാവായി ചുമതലയേറ്റ മുൻ മുഖ്യമന്ത്രി പിണറായി വിജയൻ, ബി.ജെ.പി സംസ്ഥാന പ്രസിഡന്റ് രാജീവ് ചന്ദ്രശേഖർ, സി.പി.എം സംസ്ഥാന സെക്രട്ടറി എം.വി. ഗോവിന്ദൻ, സി.പി.ഐ സംസ്ഥാന സെക്രട്ടറി ബിനോയ് വിശ്വം എന്നിവരും മുൻനിരയിൽ തന്നെയുണ്ടായിരുന്നു.
Story Summary
VD Satheesan took the oath as the 13th Chief Minister of Kerala alongside 20 ministers at Central Stadium, Thiruvananthapuram. RSP leader Shibu Baby John and CMP leader CP John took a solemn oath, while others swore in the name of God, in a historic joint ceremony attended by Rahul Gandhi and opposition leader Pinarayi Vijayan.
