റിപ്പോർട്ട്: അൻവർ ഷരിഫ്
വാഴക്കാട്: ചാലിയാർ പുഴയുടെ അനന്തസാധ്യതകൾ പൂർണ്ണമായി പ്രയോജനപ്പെടുത്തിക്കൊണ്ട് ജലഗതാഗത സൗകര്യം ഉൾപ്പെടെയുള്ള വികസന പദ്ധതികൾക്ക് അടിയന്തിരമായി തുടക്കം കുറിക്കുമെന്ന് കൊണ്ടോട്ടി നിയോജകമണ്ഡലം എം.എൽ.എ ടി.പി. അഷറഫലി വ്യക്തമാക്കി (Vazhakkad Grama Panchayat Janasabha). വാഴക്കാട് ഗ്രാമപഞ്ചായത്തിന്റെ നേതൃത്വത്തിൽ സംഘടിപ്പിച്ച എട്ടാമത് ജനസഭ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഭരണസംവിധാനത്തിന്റെ ഗുണഫലങ്ങളും വിവിധ വികസന പദ്ധതികളും സമൂഹത്തിന്റെ താഴെക്കിടയിലുള്ള സാധാരണക്കാരിലേക്ക് നേരിട്ടെത്തിക്കാൻ ജനസഭ പോലുള്ള ജനകീയ വേദികൾ ഏറെ സഹായകമാണെന്നും അദ്ദേഹം ചൂണ്ടിക്കാട്ടി.
ഗ്രാമപഞ്ചായത്ത് പ്രസിഡന്റ് ആരിഫ കണ്ടാംതൊടി അധ്യക്ഷത വഹിച്ച ചടങ്ങിൽ കെ.പി. സുലൈമാൻ ഹാജി മുഖ്യാതിഥിയായി പങ്കെടുത്തു. വൈസ് പ്രസിഡന്റ് അഡ്വ. എം.കെ. നൗഷാദ് സ്വാഗതപ്രസംഗം നിർവ്വഹിച്ച ജനസഭയിൽ വിവിധ വികസന പ്രശ്നങ്ങൾ ചർച്ച ചെയ്യുകയും പരിഹാരങ്ങൾ കണ്ടെത്തുകയും ചെയ്തു. ഇതിനോടൊപ്പം തന്നെ, നാന്നൂറോളം പേർക്ക് മരുന്നുകൾ വാങ്ങുന്നതിനുള്ള സാമ്പത്തിക സഹായവും വിതരണം ചെയ്തു. ജില്ലാ പഞ്ചായത്ത് മെമ്പർ ജൈസൽ എളമരം, സ്ഥിരം സമിതി അധ്യക്ഷരായ മുസ്തഫ വാഴക്കാട്, സി.ഇ. മുംതാസ് ബീഗം, എം. പുഷ്പ എന്നിവരും ബ്ലോക്ക് പഞ്ചായത്ത് അംഗങ്ങളായ ആയിഷ മാരത്ത്, വജീദ ജെബിൻ, ഷമീന സലീം എന്നിവരും ചടങ്ങിൽ സന്നിഹിതരായിരുന്നു. വിവിധ രാഷ്ട്രീയ പാർട്ടി പ്രതിനിധികളായ എം.സി സിദ്ദീഖ് മാസ്റ്റർ, കെ.എം.എ റഹിമാൻ, ആദം ചെറുവട്ടൂർ തുടങ്ങിയവരും വാഴക്കാട് ഗ്രാമപഞ്ചായത്തിലെ ജനപ്രതിനിധികളും ആശംസകൾ നേർന്ന് സംസാരിച്ചു.
Summary: Kondotty MLA T.P. Ashraf Ali has announced the launch of comprehensive development initiatives, including new inland water transport systems, by leveraging the untapped potential of the Chaliyar River. Addressing the eighth ‘Janasabha’ (public assembly) hosted by the Vazhakkad Grama Panchayat, the MLA emphasized that such grassroots-level platforms are vital for bridging the gap between governance and citizens, ensuring that administrative benefits reach the marginalized population.
