ക്വാലാലംപൂർ–കോഴിക്കോട് സെക്ടറിൽ എയർഏഷ്യ ബെർഹാഡ് 2026 മെയ് 7 മുതൽ ഇനിയൊരു അറിയിപ്പ് ഉണ്ടാകുന്നതുവരെ സർവീസ് നിർത്തിവച്ചിരിക്കുന്നതിൽ ഇടപെടണമെന്ന് ടി.വി.ഇബ്രാഹിം എം. എൽ. എ മുഖ്യമന്ത്രി വി.ഡി. സതീഷനും കേന്ദ്ര സിവിൽ ഏവിയേഷൻ മന്ത്രിക്കും നൽകിയ നിവേദനത്തിൽ ആവശ്യപ്പെട്ടു (Kuala Lumpur Kozhikode AirAsia service suspended).
മലബാർ മേഖലയിലെ ജനങ്ങൾക്ക് അത്യന്താപേക്ഷിതമായ ഒരു അന്താരാഷ്ട്ര വ്യോമബന്ധമായിരുന്നു ഈ സർവീസ്. ഇരു ദിശകളിലുമായി ഏകദേശം 85 മുതൽ 95 ശതമാനം വരെ യാത്രക്കാരുടെ സാന്നിധ്യം (Passenger Load Factor) ഈ സർവീസിന് സ്ഥിരമായി ലഭിച്ചിരുന്നു. ആഴ്ചയിൽ നാല് ദിവസം മാത്രമാണ് സർവീസ് നടത്തിയിരുന്നതെങ്കിലും, തുടർച്ചയായും ശക്തമായ യാത്രക്കാരുടെ ആവശ്യം നിലനിന്നിരുന്നു. അതിനാൽ ഈ റൂട്ടിന്റെ വാണിജ്യ സാധ്യതയും തന്ത്രപ്രധാനമായ പ്രാധാന്യവും വ്യക്തമാണ്.
കോഴിക്കോട് വിമാനത്താവളത്തെ വിദൂര കിഴക്കൻ രാജ്യങ്ങളുമായും തെക്കുകിഴക്കൻ ഏഷ്യൻ മേഖലയുമായും നേരിട്ട് ബന്ധിപ്പിച്ചിരുന്ന ഏക സർവീസ് ഇതായിരുന്നു. തൊഴിൽ, വ്യാപാരം, വിനോദസഞ്ചാരം, വിദ്യാഭ്യാസം, ചികിത്സ തുടങ്ങിയ ആവശ്യങ്ങൾക്കായി മലബാർ മേഖലയിലെ ആയിരക്കണക്കിന് ആളുകൾ ഈ സർവീസിനെ ആശ്രയിച്ചിരുന്നു. കൂടാതെ മലേഷ്യയിലും സമീപ രാജ്യങ്ങളിലുമുള്ള സന്ദർശകർക്ക് കേരളത്തിലേക്കുള്ള യാത്ര എളുപ്പമാക്കിക്കൊണ്ട്, പ്രത്യേകിച്ച് ആയുർവേദ-വെൽനെസ് ടൂറിസം മേഖലയുടെ വളർച്ചയ്ക്കും ഈ സർവീസ് വലിയ സംഭാവന നൽകിയിരുന്നു.
ഈ ഏക നേരിട്ടുള്ള അന്താരാഷ്ട്ര സർവീസ് നിർത്തലാക്കിയത് യാത്രക്കാർക്ക് വലിയ ബുദ്ധിമുട്ടുകൾ സൃഷ്ടിച്ചിരിക്കുകയാണ്. മാത്രമല്ല, മേഖലയുടെ അന്താരാഷ്ട്ര കണക്റ്റിവിറ്റിയെയും പ്രതികൂലമായി ബാധിച്ചിട്ടുണ്ട്. വടക്കൻ കേരളത്തിലെ വിനോദസഞ്ചാരം, വ്യാപാരം, നിക്ഷേപ സാധ്യതകൾ എന്നിവയിലും ഇതിന്റെ ദൂരവ്യാപകമായ സാമ്പത്തിക പ്രത്യാഘാതങ്ങൾ ഉണ്ടാകാനിടയുണ്ട്.
അതിനാൽ, ഈ വിഷയത്തിൽ ഇന്ത്യാ ഗവൺമെന്റിന്റെ സിവിൽ ഏവിയേഷൻ മന്ത്രാലയത്തോടും എയർഏഷ്യ ബെർഹാഡിന്റെ മാനേജ്മെന്റിനോടും ആവശ്യമായ ഇടപെടൽ നടത്തി, കോഴിക്കോട് അന്താരാഷ്ട്ര വിമാനത്താവളത്തിൽ നിന്നുള്ള എയർഏഷ്യ സർവീസുകൾ തുടർന്നും നിലനിർത്തുന്നതിനും പുനഃസ്ഥാപിക്കുന്നതിനും ആവശ്യമായ നടപടികൾ സ്വീകരിക്കണമെന്ന് വിനീതമായി അഭ്യർത്ഥിക്കുന്നു.
കൂടാതെ, തന്ത്രപ്രധാനമായ അന്താരാഷ്ട്ര വ്യോമപാതകൾക്ക് സർക്കാർ പിന്തുണ ഉറപ്പാക്കുന്ന ഒരു നയപരമായ ഇടപെടലും പരിഗണിക്കേണ്ടതുണ്ടെന്ന് സമർപ്പിക്കുന്നു. ആഭ്യന്തര വ്യോമബന്ധം ശക്തിപ്പെടുത്തുന്നതിനായി നടപ്പിലാക്കുന്ന UDAN പദ്ധതിക്ക് സമാനമായി, വിനോദസഞ്ചാരം, വ്യാപാരം, പ്രവാസി സമൂഹം എന്നിവയ്ക്ക് പ്രാധാന്യമുള്ള തെരഞ്ഞെടുത്ത അന്താരാഷ്ട്ര റൂട്ടുകൾക്കായി പ്രത്യേക പിന്തുണാ സംവിധാനം കേന്ദ്ര സർക്കാർ പരിഗണിക്കേണ്ടതാണ്. ഇത്തരം റൂട്ടുകൾക്ക് Viability Gap Funding (VGF) ഉൾപ്പെടെയുള്ള പ്രോത്സാഹനങ്ങൾ നൽകുന്നത് അന്താരാഷ്ട്ര കണക്റ്റിവിറ്റി വർധിപ്പിക്കാനും, വിനോദസഞ്ചാര വളർച്ച പ്രോത്സാഹിപ്പിക്കാനും, സാമ്പത്തിക പ്രവർത്തനങ്ങൾ സജീവമാക്കാനും, മലബാർ പോലുള്ള പ്രദേശങ്ങളുടെ സമഗ്ര വികസനത്തിന് സഹായകരമാകാനും ഇടയാക്കും.
വടക്കൻ കേരളത്തിലെ ജനങ്ങളുടെ അന്താരാഷ്ട്ര യാത്രാ-കണക്റ്റിവിറ്റി താൽപര്യങ്ങൾ സംരക്ഷിക്കുന്നതിനായി കേരള സർക്കാർ ഈ വിഷയത്തിൽ അടിയന്തര ക പ്രാധാന്യത്തോടെ ഇടപെട്ട് എല്ലാ പിന്തുണയും നൽകണമെന്നും ടി.വി ഇബ്രാഹിം എം. എൽ. എ. ആവശ്യപ്പെട്ടു.
Story Summary: Kondotty MLA T.V. Ibrahim has submitted a memorandum to Chief Minister V.D. Satheesan and the Union Civil Aviation Minister, seeking immediate intervention to restore AirAsia Berhad’s Kuala Lumpur–Kozhikode service, which has been suspended since May 7, 2026. Highlighting its 85–95% Passenger Load Factor and its role as the only direct link connecting Malabar to South-East Asia, the MLA warned of severe economic and tourism impacts. He also suggested a central support system with Viability Gap Funding (VGF) for strategic international routes, similar to the domestic UDAN scheme.
