ഇടുക്കി: തൊടുപുഴ ജില്ലാ ആശുപത്രിയിൽ 70 വർഷം പഴക്കമുള്ള കെട്ടിടം അതീവ അപകടാവസ്ഥയിൽ. കെട്ടിടത്തിന്റെ മേൽക്കൂര ഭാഗികമായി തകർന്നിട്ടും ഇത് പൊളിച്ചുനീക്കാൻ ജില്ലാ പഞ്ചായത്ത് നടപടി സ്വീകരിക്കുന്നില്ലെന്ന് ആക്ഷേപം ഉയരുന്നു. രോഗികൾക്കും കൂട്ടിരിപ്പുകാർക്കും വലിയ ഭീഷണിയായി ഈ കെട്ടിടം നിലകൊള്ളുകയാണ്.(Thodupuzha District Hospital building in danger)
കെട്ടിടത്തിന്റെ മേൽക്കൂര തകർന്ന് ഏതു നിമിഷവും നിലംപൊത്താവുന്ന അവസ്ഥയിലാണ്. രോഗികളും നാട്ടുകാരും വലിയ ആശങ്കയിലാണ്. കെട്ടിടം അപകടത്തിലായതിനെത്തുടർന്ന് മറ്റ് വിഭാഗങ്ങളെ ഒരു വർഷം മുൻപ് മാറ്റിയെങ്കിലും, തകർന്നു വീഴാറായ ഇതേ കെട്ടിടത്തിലാണ് ഇപ്പോഴും പോലീസ് എയ്ഡ് പോസ്റ്റ് പ്രവർത്തിക്കുന്നത്.
ആശുപത്രിയിലെത്തുന്നവർ തങ്ങളുടെ ഇരുചക്ര വാഹനങ്ങൾ പാർക്ക് ചെയ്യുന്നത് ഈ കെട്ടിടത്തിന് തൊട്ടടുത്താണ്. കെട്ടിടം പൊളിച്ചുനീക്കാൻ എട്ടുമാസം മുൻപ് ജില്ലാ പഞ്ചായത്തിന് അപേക്ഷ നൽകിയതായി അറിയിച്ചു. എന്നാൽ ഇതുവരെ സാക്ഷ്യപത്രമോ, പൊളിക്കുന്നതിനുള്ള എസ്റ്റിമേറ്റോ ജില്ലാ പഞ്ചായത്ത് തയ്യാറാക്കിയിട്ടില്ല.
