തിരുവനന്തപുരം: രാജ്യത്തെ മെഡിക്കൽ കോഴ്സുകളിലേക്കുള്ള പ്രവേശന പരീക്ഷയായ നീറ്റ് യുജി ഇന്ന് നടക്കും. ഉച്ചയ്ക്ക് 2 മണി മുതൽ 5 മണി വരെയാണ് പരീക്ഷാ സമയം. രാജ്യത്തിനകത്തും പുറത്തുമായി ഏകദേശം 20 ലക്ഷത്തിലധികം വിദ്യാർത്ഥികളാണ് ഇത്തവണ പരീക്ഷ എഴുതുന്നത്.(The NEET UG 2026 exam is conducted today, May 3, 2026)
രാവിലെ 11 മണി മുതൽ ഒന്നര വരെയാണ് വിദ്യാർത്ഥികൾക്ക് പരീക്ഷാ കേന്ദ്രങ്ങളിൽ പ്രവേശനം അനുവദിക്കുക. ഒന്നരയ്ക്ക് ശേഷം എത്തുന്നവരെ യാതൊരു കാരണവശാലും പ്രവേശിപ്പിക്കില്ല. പരീക്ഷാ കേന്ദ്രങ്ങളിൽ നാഷണൽ ടെസ്റ്റിംഗ് ഏജൻസിയുടെ കർശനമായ സുരക്ഷാ പ്രോട്ടോക്കോൾ പാലിക്കും. പോലീസ് സബ് ഡിവിഷനുകൾക്ക് കീഴിലുള്ള സ്കൂളുകളിൽ ആവശ്യമായ പോലീസ് സേവനം ഉറപ്പാക്കിയിട്ടുണ്ട്.
ചോദ്യപേപ്പറുകൾ അടങ്ങിയ ട്രങ്കുകൾക്കും പരീക്ഷയ്ക്ക് ശേഷമുള്ള ഉത്തരക്കടലാസുകൾക്കും ആവശ്യമായ പോലീസ് സംരക്ഷണം നൽകാൻ ഡി.വൈ.എസ്.പിമാർക്ക് നിർദ്ദേശം നൽകി. പരീക്ഷാ കേന്ദ്രങ്ങളിലേക്ക് എത്തുന്നതിനും തിരികെ പോകുന്നതിനും കെ.എസ്.ആർ.ടി.സി പ്രധാന ഡിപ്പോകളിൽ നിന്ന് പ്രത്യേക സർവീസുകൾ ഉറപ്പാക്കും. പരീക്ഷാ കേന്ദ്രങ്ങളിൽ തടസ്സമില്ലാതെ വൈദ്യുതി ലഭ്യമാക്കാൻ കെ.എസ്.ഇ.ബിക്ക് നിർദ്ദേശം നൽകി. എല്ലാ സെന്ററുകളിലും വിദ്യാർത്ഥികൾക്കായി കുടിവെള്ള സൗകര്യം ഒരുക്കുമെന്ന് പരീക്ഷാ സൂപ്രണ്ടുമാർ അറിയിച്ചു. നാഷണൽ ടെസ്റ്റിംഗ് ഏജൻസി അനുവദിച്ചിട്ടുള്ള 23 കേന്ദ്രങ്ങളിലാണ് സംസ്ഥാനത്ത് പരീക്ഷ നടക്കുന്നത്.
