മുഖ്യമന്ത്രിക്കെതിരായ സുധാകരന്റെ പരാമർശം അപലപനീയം: മന്ത്രി പി. രാജീവ്
Mar 17, 2023, 06:51 IST
തിരുവനന്തപുരം: മുഖ്യമന്ത്രി പിണറായി വിജയനെതിരെ കെപിസിസി പ്രസിഡന്റ് കെ. സുധാകരൻ നടത്തിയ പരാമർശം അപലപനീയമെന്ന് മന്ത്രി പി. രാജീവ്. പൊതുപ്രവർത്തന മര്യാദകൾക്ക് നിരക്കാത്തതും രാഷ്ട്രീയ നേതാവ് ഒരു സാഹചര്യത്തിലും നടത്താൻപാടില്ലാത്തതുമായ പരാമർശം ആണ് സുധാകരന്റെ എന്നും മന്ത്രി പറഞ്ഞു.
സ്ഥിരമായി പ്രതിപക്ഷത്തിരിക്കേണ്ടിവരുമെന്ന ചിന്ത കേരളത്തിലെ കോൺഗ്രസിന്റെ സമനില തെറ്റിച്ചിരിക്കുന്നു എന്നാണ് കെപിസിസി പ്രസിഡന്റിന്റെയും പ്രതിപക്ഷനേതാവിന്റെയും വാക്കുകൾ സൂചിപ്പിക്കുന്നത്. മുഖ്യമന്ത്രിക്കെതിരെ അധിക്ഷേപ വാക്കുകൾ ചൊരിഞ്ഞുകൊണ്ട് കെപിസിസി പ്രസിഡന്റ് കെ. സുധാകരൻ നടത്തിയ പ്രസംഗവും മന്ത്രിമാരെ വ്യക്തിപരമായി അധിക്ഷേപിച്ചുകൊണ്ട് പ്രതിപക്ഷ നേതാവ് വി.ഡി. സതീശൻ നടത്തുന്ന പ്രസ്താവനകളും പരിഷ്കൃത സമൂഹത്തിന് ചേരുന്നതല്ല. ഇത്തരം പ്രതികരണങ്ങൾ ജനങ്ങൾ കാണുന്നുണ്ടെന്നും വിലയിരുത്തുന്നുണ്ടെന്നും പ്രതിപക്ഷം മനസിലാക്കണമെന്നും മന്ത്രി പറഞ്ഞു.