ന്യൂഡൽഹി: കേരളത്തിൽ യുഡിഎഫ് അധികാരത്തിലെത്തുമെന്ന് കോൺഗ്രസ് നേതാവ് ശശി തരൂർ എംപി. സംസ്ഥാനത്ത് 75-ൽ അധികം സീറ്റുകൾ നേടി യുഡിഎഫ് കരുത്തുതെളിയിക്കുമെന്നും അദ്ദേഹം പ്രത്യാശ പ്രകടിപ്പിച്ചു (Shashi Tharoor). നിലവിൽ പുറത്തുവന്ന എക്സിറ്റ് പോൾ ഫലങ്ങളെ അദ്ദേഹം പൂർണ്ണമായും തള്ളിക്കളഞ്ഞു.
താൻ എക്സിറ്റ് പോളുകളുടെ ആരാധകനല്ലെന്ന് വ്യക്തമാക്കിയ തരൂർ, ഇത്തരം സർവ്വേകൾക്കായി സാമ്പിളുകൾ ശേഖരിക്കുന്ന രീതി ശാസ്ത്രീയമല്ലെന്ന് ആരോപിച്ചു. പലയിടങ്ങളിലും ആളുകൾ തങ്ങളുടെ കൃത്യമായ അഭിപ്രായം രേഖപ്പെടുത്താൻ തയ്യാറാകില്ല. ബംഗാളിലെ സാഹചര്യം ഉദാഹരണമായി ചൂണ്ടിക്കാട്ടിയ അദ്ദേഹം, അവിടെ പലരും പ്രതികരിക്കാൻ പോലും തയ്യാറായിട്ടില്ലെന്നും ഇത് ഫലങ്ങളെ സ്വാധീനിക്കുമെന്നും കൂട്ടിച്ചേർത്തു.
അതേസമയം, എക്സിറ്റ് പോളുകളിൽ മുഖ്യമന്ത്രി സ്ഥാനത്തേക്ക് പ്രതിപക്ഷ നേതാവ് വി.ഡി. സതീശന് ലഭിച്ച വലിയ പിന്തുണയെ സ്വാഗതം ചെയ്ത് മുസ്ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ രംഗത്തെത്തി. ഇത് ജനവികാരമാണെന്ന് കരുതുന്നതായും അദ്ദേഹം പറഞ്ഞു. യുഡിഎഫ് അധികാരം ലഭിച്ചാൽ ജനവികാരം കൂടി പരിഗണിച്ചാകും മുഖ്യമന്ത്രി സ്ഥാനത്തിന്റെ കാര്യത്തിലടക്കം തീരുമാനമെടുക്കുകയെന്നും സാദിഖലി തങ്ങൾ വ്യക്തമാക്കി.
Story Summary: Congress leader Shashi Tharoor predicted a UDF victory in Kerala with over 75 seats, dismissing exit polls as unscientific. Meanwhile, Panakkad Sadiq Ali Shihab Thangal backed V.D. Satheesan, stating that the public preference for him as Chief Minister in exit polls reflects genuine popular sentiment.
