തിരുവനന്തപുരം: കല്ലിയൂരിൽ വീട്ടുപറമ്പിലെ സെപ്റ്റിക് ടാങ്കിന്റെ സ്ലാബ് തകർന്ന് 15 അടിയോളം താഴ്ചയുള്ള കുഴിയിൽ വീണ വയോധികയെ വിഴിഞ്ഞം അഗ്നിരക്ഷാസേനയുടെ സമയോചിത ഇടപെടലിലൂടെ രക്ഷപ്പെടുത്തി. കല്ലിയൂർ സ്വദേശിനിയും സീരിയൽ നടിയുമായ വസന്തകുമാരിയമ്മ (75) ആണ് അപകടത്തിൽപ്പെട്ടത് (Septic Tank Accident Kalliyoor). ഇന്ന് രാവിലെ എട്ട് മണിയോടെയായിരുന്നു സംഭവം. ബക്കറ്റിൽ വെള്ളവുമായി നടന്നു വരുന്നതിനിടെ, കാലപ്പഴക്കം മൂലം ദ്രവിച്ചിരുന്ന ടാങ്കിന്റെ കോൺക്രീറ്റ് സ്ലാബ് പൊട്ടി അവർ ഉള്ളിലേക്ക് വീഴുകയായിരുന്നു.
അപകടം ശ്രദ്ധയിൽപ്പെട്ട വീട്ടുകാർ ഉടൻ തന്നെ ഫയർഫോഴ്സിനെ വിവരമറിയിച്ചു. ഫയർഫോഴ്സ് എത്തുമ്പോൾ ടാങ്കിലെ വെള്ളത്തിൽ മുങ്ങിയ നിലയിലായിരുന്നു വസന്തകുമാരിയമ്മ. വീഴ്ചയിൽ കൈയ്ക്ക് ഗുരുതരമായി പരിക്കേറ്റതിനാൽ പിടിവിട്ട് താഴേക്ക് മുങ്ങിപ്പോകാവുന്ന അതീവ ഗുരുതരാവസ്ഥയിലായിരുന്നു അവർ. ടാങ്കിന്റെ മറ്റ് സ്ലാബുകൾക്കും ബലക്ഷയം സംഭവിച്ചിരുന്നതും ഉള്ളിലെ ഇടുങ്ങിയ സ്ഥലവും രക്ഷാപ്രവർത്തനം ഏറെ പ്രയാസകരമാക്കി. ഫയർഫോഴ്സ് ഉദ്യോഗസ്ഥർ ടാങ്കിനുള്ളിൽ ഇറങ്ങി വയോധികയെ താങ്ങിനിർത്തി, മണിക്കൂറുകൾ നീണ്ട പരിശ്രമത്തിനൊടുവിൽ റോപ്പും ലാഡറും ഉപയോഗിച്ച് അവരെ സുരക്ഷിതമായി പുറത്തെത്തിച്ചു. തുടർന്ന് വിദഗ്ദ്ധ ചികിത്സയ്ക്കായി ആശുപത്രിയിലേക്ക് മാറ്റി.
സീനിയർ ഫയർ റെസ്ക്യൂ ഓഫീസർ സുനിൽ കുമാറിന്റെ നേതൃത്വത്തിൽ സന്തോഷ് കുമാർ, പ്രണവ്, സനൽകുമാർ, ഹരികൃഷ്ണൻ, രാജേഷ്, ജിബിൻ, വിജയരാജ് എന്നിവരടങ്ങിയ സംഘമാണ് രക്ഷാപ്രവർത്തനത്തിന് നേതൃത്വം നൽകിയത്.
Summary: Vasanthakumari Amma, a 75-year-old serial actress from Kalliyoor, Thiruvananthapuram, was miraculously rescued by the Vizhinjam Fire and Rescue Service after falling into a 15-foot deep septic tank when its concrete slab collapsed. Rescuers faced significant challenges due to the precarious state of the surrounding slabs and the confined space, but managed to stabilize the woman—who had sustained a serious arm injury and was submerged—before successfully pulling her out after a hours-long operation. She has been hospitalized for further treatment, and the emergency response team has been widely praised for their swift and expert action.
