തിരുവനന്തപുരം: നെടുമങ്ങാട് ഒന്നരവയസ്സുകാരൻ ക്രൂരമായ മർദനമേറ്റ് മരിച്ച സംഭവത്തിൽ അതിരൂക്ഷമായ ഭാഷയിൽ പ്രതികരണവുമായി പ്രമുഖ നടി സീമ ജി നായർ. സ്വന്തം സുഖത്തിന് വേണ്ടി ചോരക്കുഞ്ഞിനെ ക്രൂര പീഡനത്തിന് വിട്ടുകൊടുത്ത അമ്മയെ ‘മനുഷ്യമൃഗം’ എന്ന് പോലും വിളിക്കാൻ കഴിയില്ലെന്നും, ഇത്തരം മനുഷ്യപിശാചുക്കൾ നരകിച്ചു മരിക്കണമെന്നും സോഷ്യൽ മീഡിയയിൽ പങ്കുവെച്ച ഹൃദയം നുറുങ്ങുന്ന കുറിപ്പിൽ സീമ ജി നായർ കുറിച്ചു (Seema G Nair facebook post child death). കുട്ടിയുടെ ശരീരത്തിൽ 51 ഓളം മുറിവുകളുണ്ടെന്ന പോസ്റ്റ്മോർട്ടം റിപ്പോർട്ട് കേട്ട് മനസ്സ് മരവിച്ചുപോയെന്നും താരം വ്യക്തമാക്കി.
ഒരു കുഞ്ഞിന് ജന്മം നൽകാൻ ഭാഗ്യമില്ലാതെ ലക്ഷക്കണക്കിന് ദമ്പതികൾ കാത്തിരിക്കുമ്പോൾ, കിട്ടിയ ഭാഗ്യത്തെ തല്ലിക്കെടുത്തിയ അമ്മയ്ക്കെതിരെയും കാമുകനെതിരെയും വിട്ടുവീഴ്ചയില്ലാത്ത നടപടി വേണമെന്നാണ് സീമ ജി നായരുടെ ആവശ്യം. ഇവർക്ക് ഒരുകാലത്തും ജാമ്യം ലഭിക്കരുതെന്നും താരം കൂട്ടിച്ചേർത്തു.
സീമ ജി നായരുടെ ഫേസ്ബുക്ക് കുറിപ്പിന്റെ പൂർണ്ണരൂപം:
”മകനേ വിട… ഇങ്ങനെ ഒരു സ്ത്രീയുടെ ഗര്ഭപാത്രത്തില് ജനിക്കാനായിരുന്നോ നിന്റെ വിധി? ഒന്നര വയസ്സിനുള്ളില് നീ അനുഭവിച്ചു തീര്ത്ത വേദനകള്ക്ക് ഒരു കണക്കും ഉണ്ടായിരുന്നില്ലല്ലോ. ഈ കുഞ്ഞുശരീരത്തില് 51 മുറിവുകളോളം ഉണ്ടായിരുന്നുവെന്നു പോസ്റ്റുമാര്ട്ടം റിപ്പോര്ട്ട് കേട്ടപ്പോള് മരവിച്ചുപോയി ഞങ്ങള്. നിന്റെ കുഞ്ഞുകൈകള് തല്ലിയൊടിച്ചു പ്ലാസ്റ്റര് ഇട്ടപ്പോള്, നിന്റെ അമ്മ എന്ന് പറയുന്നവള് അതെടുത്തു സ്റ്റാറ്റസ് ആക്കി! രണ്ടു കയ്യും ഒരേരീതിയില് ഒടിഞ്ഞപ്പോള് ആരും തിരക്കിയില്ലേ എന്ത് സംഭവിച്ചുവെന്ന്?? ഒരു കുഞ്ഞിന് ജന്മം കൊടുക്കാന് ഭാഗ്യം ഇല്ലാത്ത എത്രയോ പേര് ഇവിടെയുണ്ട്, എന്തിനാ ദൈവമേ ഇങ്ങനെയുള്ള സ്ത്രീകള്ക്ക് ഇതിനുള്ള ഭാഗ്യം കൊടുക്കുന്നത്??
‘അമ്മ’ എന്ന വാക്കിന് ഒരുപാടര്ത്ഥം ഉണ്ട്. സ്വന്തം സുഖത്തിനു വേണ്ടി നീ ബലികൊടുത്തത് ഒരു പാവം കുഞ്ഞിനെയായിരുന്നു. നിന്റെ രക്തത്തിനെ കൊല്ലാകൊല ചെയ്യാന് അവന് നീ ഇട്ടുകൊടുത്തില്ലേ ഈ പൊന്നു കുഞ്ഞിനെ? ഓരോ ഉപദ്രവങ്ങള് തുടരുമ്പോഴും ആ കുഞ്ഞ് നിന്റെ മുന്നില് ആയിരിക്കില്ലേ കരഞ്ഞിട്ടുണ്ടാവുക? മനുഷ്യമൃഗം എന്ന് പോലും നിന്നെ വിളിക്കാന് പറ്റില്ല, അതിന്റെ മുകളില് വല്ല വാക്കുകള് ഉണ്ടെങ്കില് അതുപയോഗിക്കാം. ഇങ്ങനെയുള്ള മനുഷ്യ പിശാചുക്കള് ഇനിയൊരിക്കലും വെളിച്ചം കാണരുത്. ഒരിക്കലും ഇവള്ക്കും, അവനും, ജാമ്യം കിട്ടരുത്. നരകിക്കണം, നരകിച്ചു മരിക്കണം.”
കുട്ടിയുടെ മരണവുമായി ബന്ധപ്പെട്ട് അമ്മയെയും കാമുകനെയും പോലീസ് ഇതിനകം അറസ്റ്റ് ചെയ്ത് ജയിലിൽ റിമാൻഡിൽ അയച്ചിട്ടുണ്ട്. കുഞ്ഞിന്റെ രണ്ട് കൈകളും ഒടിഞ്ഞ നിലയിലായിരുന്നുവെന്നും ശരീരമാസകലം മാരകമായ മുറിവുകളുണ്ടായിരുന്നുവെന്നുമാണ് പോലീസ് അന്വേഷണത്തിൽ വ്യക്തമായത്. സംഭവത്തിൽ സംസ്ഥാന വ്യാപകമായി കടുത്ത പ്രതിഷേധമാണ് ഉയരുന്നത്.
Story Summary: Actress Seema G Nair shared a heartbreaking post on the tragic death of a one-and-a-half-year-old child in Nedumangad. She lashed out at the mother, calling her a “human demon” who allowed her own blood to be tortured for her personal pleasure, demanding that the accused should never get bail.
