കൊല്ലം: നിയമസഭാ തിരഞ്ഞെടുപ്പിൽ സ്ഥാനാർത്ഥിത്വം നിഷേധിക്കപ്പെട്ടതിൽ കോൺഗ്രസ് നേതൃത്വത്തിനെതിരെ രൂക്ഷവിമർശനവുമായി ഐഎൻടിയുസി സംസ്ഥാന അധ്യക്ഷൻ ആർ. ചന്ദ്രശേഖരൻ രംഗത്തെത്തി (R Chandrasekharan INTUC Congress Candidates). തന്നെ അഴിമതിക്കാരനായി ചിത്രീകരിക്കാൻ ബോധപൂർവമായ ശ്രമം നടക്കുന്നുണ്ടെന്നും പാർട്ടിക്കുള്ളിൽ ആർക്കും എന്തും പറയാമെന്ന സാഹചര്യമാണുള്ളതെന്നും അദ്ദേഹം ആരോപിച്ചു. കൊല്ലത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
തന്റെ പേര് സ്ഥാനാർത്ഥി പട്ടികയിൽ നിന്നും വെട്ടിയോ എന്ന് വ്യക്തമല്ലെങ്കിലും, ഐഎൻടിയുസിക്ക് ലഭിക്കേണ്ട പരിഗണന പാർട്ടി ഗൗരവമായി പരിശോധിക്കണമെന്ന് അദ്ദേഹം ആവശ്യപ്പെട്ടു. തനിക്ക് മുൻപുണ്ടായിരുന്ന എല്ലാ ഐഎൻടിയുസി സംസ്ഥാന അധ്യക്ഷന്മാരും തിരഞ്ഞെടുപ്പുകളിൽ മത്സരിച്ചിട്ടുണ്ട്. തനിക്ക് സീറ്റ് കിട്ടിയില്ലെങ്കിലും കുഴപ്പമില്ല, എന്നാൽ കിട്ടിയവരെ ആക്ഷേപിക്കുന്ന നിലപാടാണ് ചിലർ സ്വീകരിക്കുന്നത്. കോൺഗ്രസിനുള്ളിൽ കൃത്യമായ നിയന്ത്രണമില്ലാത്തതാണ് ഇത്തരം പ്രവണതകൾക്ക് കാരണമെന്നും അദ്ദേഹം കൂട്ടിച്ചേർത്തു.
