തിരുവനന്തപുരം: മലയാള സാഹിത്യത്തിൽ തനതായ വിപ്ലവവീര്യവും മനുഷ്യസ്നേഹവും അടയാളപ്പെടുത്തിയ മഹാനായ എഴുത്തുകാരൻ പി. കേശവദേവിന്റെ സ്മരണാർത്ഥം നൽകിവരുന്ന 21-ാമത് പി. കേശവദേവ് സാഹിത്യ-ഡയാബ്സ്ക്രീൻ പുരസ്കാരങ്ങൾ പ്രഖ്യാപിച്ചു (P Kesavadev Awards 2026). പ്രശസ്ത നോവലിസ്റ്റും കഥാകാരനും പത്രപ്രവർത്തകനുമായ സുഭാഷ് ചന്ദ്രനാണ് സാഹിത്യത്തിനുള്ള പുരസ്കാരം നേടിയിരിക്കുന്നത്. 50,000 രൂപയും ആർട്ടിസ്റ്റ് ബി.ഡി. ദത്തൻ രൂപകൽപന ചെയ്ത ശില്പവും പ്രശസ്തിപത്രവും അടങ്ങുന്നതാണ് സാഹിത്യ അവാർഡ്.
സമൂഹത്തിൽ ഫലപ്രദമായ ആരോഗ്യ വിദ്യാഭ്യാസം പകർന്നുനൽകുന്ന വ്യക്തിത്വങ്ങളെ ആദരിക്കുന്നതിനായുള്ള 2026-ലെ പി. കേശവദേവ് ഡയാബസ്ക്രീൻ കേരള പുരസ്കാരത്തിന് ഡോ. തങ്കം സുബ്രഹ്മണ്യൻ അർഹയായി. സ്വന്തം ജീവൻ പണയം വെച്ചും മറ്റുള്ളവരെ രക്ഷിക്കാൻ മുന്നിട്ടിറങ്ങിയ ഡോ. തങ്കത്തിന്റെ നിസ്വാർത്ഥ സേവനമനസ്സിനെയാണ് പി. കേശവദേവ് ട്രസ്റ്റ് ഈ അവാർഡിലൂടെ ആദരിക്കുന്നത്. 50,000 രൂപയും ആർട്ടിസ്റ്റ് ബി.ഡി. ദത്തൻ രൂപകൽപന ചെയ്ത ശില്പവും പ്രശസ്തിപത്രവും അടങ്ങുന്നതാണ് ഡയാബ്സ്ക്രീൻ പുരസ്കാരം.
വരുന്ന ജൂൺ 17-ാം തീയതി വൈകുന്നേരം 4 മണിക്ക് തിരുവനന്തപുരം ഹിൽട്ടൺ ഗാർഡൻ ഇൻ ഹാളിൽ വെച്ച് നടക്കുന്ന ചടങ്ങിൽ ബഹുമാനപ്പെട്ട കേരള മുഖ്യമന്ത്രി വി.ഡി. സതീശൻ പുരസ്കാരങ്ങൾ സമ്മാനിക്കും. പി. കേശവദേവ് ട്രസ്റ്റ് ചെയർപേഴ്സൺ സീതാലക്ഷ്മി ദേവ്, ട്രസ്റ്റ് മാനേജിങ് ട്രസ്റ്റി ഡോ. ജ്യോതിദേവ് കേശവദേവ്, സാഹിത്യ പുരസ്കാര സമിതി ചെയർപേഴ്സൺ ഡോ. ജോർജ് ഓണക്കൂർ എന്നിവർ വാർത്താ സമ്മേളനത്തിലാണ് അവാർഡ് വിവരങ്ങൾ അറിയിച്ചത്.
Story Summary: The 21st P. Kesavadev Awards for 2026 have been announced. Renowned novelist Subhash Chandran won the Literary Award, while Dr. Thankam Subramanyan was selected for the Diabscreen Kerala Award for her selfless healthcare education services. Kerala Chief Minister V.D. Satheesan will present the awards on June 17 in Thiruvananthapuram.
