കൊച്ചി: അറബിക്കടലിന്റെ ആഴങ്ങളിൽ നിന്ന് പുതിയൊരു മത്സ്യ ഇനത്തെക്കൂടി കണ്ടെത്തി. ലക്ഷദ്വീപ് കടലിന്റെ കിഴക്കൻ ഭാഗത്ത് 350 മുതൽ 500 മീറ്റർ വരെ ആഴത്തിൽ നിന്നുമാണ് ഈ മത്സ്യത്തെ കണ്ടെത്തിയത്. കേന്ദ്ര സമുദ്ര മത്സ്യ ഗവേഷണ സ്ഥാപനത്തിലെ ശാസ്ത്രജ്ഞരാണ് ഈ സുപ്രധാന കണ്ടെത്തലിന് പിന്നിൽ.(New deep-sea fish species Cyttopsis indica discovered in Arabian Sea by CMFRI)
‘ഇന്ത്യൻ ഡോറി’ എന്ന് പൊതുവായി അറിയപ്പെടുന്ന ഈ മത്സ്യത്തിന് ‘സിറ്റോപ്സിസ് ഇൻഡിക’ (Cyttopsis indica) എന്നാണ് ശാസ്ത്രീയമായി പേര് നൽകിയിരിക്കുന്നത്. ഡോ. ആർ. രതീഷ് കുമാറിന്റെ നേതൃത്വത്തിലുള്ള ഗവേഷക സംഘം, കൊല്ലം ശക്തികുളങ്ങര ഹാർബറിൽ എത്തിയ ട്രോളിങ് ബോട്ടുകളിൽ നിന്ന് ശേഖരിച്ച ആറ് മത്സ്യങ്ങളുടെ സാമ്പിളുകൾ ഉപയോഗിച്ചാണ് പഠനം നടത്തിയത്.
നേരത്തെ ഇന്ത്യൻ മഹാസമുദ്രത്തിൽ കണ്ടുവരുന്ന ഇത്തരം മത്സ്യങ്ങളെ അറ്റ്ലാന്റിക് സമുദ്രത്തിൽ കാണപ്പെടുന്ന ‘സിറ്റോപ്സിസ് റോസിയ’ എന്ന വിഭാഗത്തിൽ ആയിരുന്നു ഉൾപ്പെടുത്തിയിരുന്നത്. എന്നാൽ സിഎംഎഫ്ആർഐയിലെ ഗവേഷകർ നടത്തിയ വിശദമായ ജനിതക പഠനങ്ങളിലൂടെ ഇവ തമ്മിലുള്ള വ്യക്തമായ വ്യത്യാസങ്ങൾ തിരിച്ചറിയുകയും, ഇത് പുതിയൊരു ഇനമാണെന്ന് സ്ഥിരീകരിക്കുകയുമായിരുന്നു.
Story Summary
Researchers at the Central Marine Fisheries Research Institute (CMFRI) have identified a new deep-sea fish species, Cyttopsis indica, commonly known as ‘Indian Dory’, in the eastern part of the Lakshadweep Sea. The discovery was made by a team led by Dr. R. Ratheesh Kumar, who identified the species through genetic analysis of specimens collected from trawlers at Kollam’s Sakthikulangara harbor.
