മൂവാറ്റുപുഴ: നഗരത്തിന്റെ വിവിധ ഭാഗങ്ങളിൽ വെച്ച് ആളുകളെ കടിച്ചു പരിക്കേൽപ്പിച്ച തെരുവ് നായയ്ക്ക് പേവിഷബാധ (Rabies) ഉണ്ടായിരുന്നുവെന്ന് സ്ഥിരീകരണം (Muvattupuzha Stray Dog Attack). പോസ്റ്റ്മോർട്ടം റിപ്പോർട്ടിലാണ് ഇക്കാര്യം വ്യക്തമായത്. കഴിഞ്ഞ ദിവസമാണ് ഈ നായ ചത്തത്. നായയുടെ കടിയേറ്റ 13 പേർക്കും ഇതിനോടകം തന്നെ ആദ്യ ഡോസ് വാക്സിൻ നൽകിയിട്ടുണ്ട്. പ്രതിരോധ നടപടികൾ കൃത്യസമയത്ത് ആരംഭിച്ചതിനാൽ ആശങ്കപ്പെടേണ്ട സാഹചര്യമില്ലെന്ന് ഡോക്ടർമാർ വ്യക്തമാക്കി.
നായയ്ക്ക് പേവിഷബാധ സ്ഥിരീകരിച്ചതിന് പിന്നാലെ മൂവാറ്റുപുഴ നഗരസഭ അടിയന്തര യോഗം ചേർന്നു. സർക്കാർ ആശുപത്രി, വെറ്റിനറി ആശുപത്രി പ്രതിനിധികളും ആരോഗ്യ ഉദ്യോഗസ്ഥരും യോഗത്തിൽ പങ്കെടുത്തു. പ്രദേശത്ത് സമാന ലക്ഷണങ്ങളുള്ള മറ്റൊരു നായയെ കൂടി കണ്ടെത്തിയിട്ടുണ്ട്. ഇതിനെ പിടികൂടാനായി വിദഗ്ധരായ ഡോഗ് ക്യാച്ചേഴ്സിനെ നിയോഗിച്ചു. കൂടാതെ നഗരപരിധിയിലുള്ള മുഴുവൻ തെരുവ് നായകൾക്കും അടിയന്തരമായി വാക്സിനേഷൻ നൽകാനും യോഗത്തിൽ തീരുമാനമായി. വളർത്തുമൃഗങ്ങളുള്ളവർ അവയ്ക്ക് വാക്സിൻ എടുത്തിട്ടുണ്ടെന്ന് ഉറപ്പുവരുത്തണമെന്നും ലക്ഷണങ്ങൾ കണ്ടാൽ ഉടൻ അധികൃതരെ അറിയിക്കണമെന്നും നഗരസഭ നിർദ്ദേശിച്ചു.
Story Summary: Rabies has been confirmed in a stray dog that bit 13 people in Muvattupuzha, following a post-mortem examination. All victims have received their first dose of the vaccine, and health officials stated there is no immediate cause for panic. The Muvattupuzha Municipality held an emergency meeting to coordinate preventive measures, including hiring dog catchers to track another symptomatic dog and launching a vaccination drive for all strays in the area.
