കുമളി: മുല്ലപ്പെരിയാർ അണക്കെട്ടിലെ ജലനിരപ്പിൽ നേരിയ വർധനവ് രേഖപ്പെടുത്തി. ശനിയാഴ്ച രാവിലെ ആറിന് ലഭ്യമായ വിവരമനുസരിച്ച് അണക്കെട്ടിലെ നിലവിലെ ജലനിരപ്പ് 112.70 അടിയായി ഉയർന്നു (Mullaperiyar dam water level). വെള്ളിയാഴ്ച ഇത് 112.60 അടി ആയിരുന്നു. എന്നാൽ മുൻവർഷത്തെ അപേക്ഷിച്ച് നോക്കുമ്പോൾ അണക്കെട്ടിലെ ജലത്തിന്റെ അളവിൽ വലിയ കുറവാണ് ഇത്തവണ രേഖപ്പെടുത്തിയിരിക്കുന്നത്. കഴിഞ്ഞ വർഷം ഇതേദിവസം അണക്കെട്ടിൽ 132.75 അടി വെള്ളം ഉണ്ടായിരുന്ന സ്ഥാനത്ത് ഈ വർഷം 20.05 അടി വെള്ളത്തിന്റെ കുറവുണ്ട്.
കഴിഞ്ഞ 24 മണിക്കൂറിനുള്ളിൽ അണക്കെട്ടിലേക്ക് സെക്കൻഡിൽ 452 ഘനയടി വീതം വെള്ളം ഒഴുകിയെത്തിയിട്ടുണ്ട്. ഇതിൽ നിന്നും തമിഴ്നാട് സെക്കൻഡിൽ 256 ഘനയടി വീതം വെള്ളം തങ്ങളുടെ ആവശ്യങ്ങൾക്കായി കൊണ്ടുപോയി. അണക്കെട്ടിന്റെ ക്യാച്ച്മെന്റ് ഏരിയകളിൽ കഴിഞ്ഞ ദിവസങ്ങളിൽ പെയ്ത മഴയാണ് ജലനിരപ്പ് നേരിയ തോതിൽ ഉയരാൻ കാരണമായത്. അണക്കെട്ട് പ്രദേശത്ത് 15.6 മില്ലിമീറ്ററും തേക്കടിയിൽ 6.8 മില്ലിമീറ്ററും കുമളിയിൽ ആറ് മില്ലിമീറ്ററും മഴയാണ് രേഖപ്പെടുത്തിയത്.
അതേസമയം, മുല്ലപ്പെരിയാറിൽ നിന്ന് കൊണ്ടുപോകുന്ന വെള്ളം ശേഖരിക്കുന്ന തമിഴ്നാട്ടിലെ വൈഗ അണക്കെട്ടിലും ജലനിരപ്പ് വളരെ താഴ്ന്ന നിലയിലാണ്. ശനിയാഴ്ച രാവിലെ വൈഗയിലെ ജലനിരപ്പ് 33.96 അടിയായിരുന്നു. കഴിഞ്ഞ വർഷം ഇതേ സമയത്ത് വൈഗ അണക്കെട്ടിൽ 61.98 അടി വെള്ളം ഉണ്ടായിരുന്ന സ്ഥാനത്താണിത്. നിലവിൽ തമിഴ്നാട്ടിലെ കാർഷിക മേഖലകളിലേക്കുള്ള ജലവിതരണത്തെ ഈ കുറവ് ബാധിക്കുമെന്നാണ് വിലയിരുത്തൽ.
Story Summary:
The water level in the Mullaperiyar dam rose slightly to 112.70 feet on Saturday, though it remains significantly lower by 20.05 feet compared to the same day last year. Tamil Nadu drew 256 cusecs of water as the dam’s catchment areas received moderate rainfall over the last 24 hours.
