കൊച്ചി: മുഖ്യമന്ത്രി വി.ഡി. സതീശൻ തന്റെ മനസ്സിൽ എന്നും ഒരു അടുത്ത ചങ്ങാതിയുടെ സ്ഥാനത്തുള്ള വ്യക്തിയാണെന്ന് നടൻ മോഹൻലാൽ. സത്യസന്ധതയും സുതാര്യതയും ഇഴചേർന്ന വ്യക്തിത്വമായതിനാലാണ് വി.ഡി. സതീശനെ മുഖ്യമന്ത്രിയാക്കാൻ നാട് മുഴുവൻ തെരുവിൽ ഇറങ്ങി മുറവിളി കൂട്ടിയതെന്നും ആ ജനവികാരം തന്നെ അമ്പരപ്പിച്ചെന്നും മോഹൻലാൽ പറഞ്ഞു (Mohanlal Speech on CM VD Satheesan). മുഖ്യമന്ത്രിക്ക് പറവൂരിൽ നൽകിയ പൗരസ്വീകരണത്തിൽ പങ്കെടുത്ത് സംസാരിക്കുകയായിരുന്നു അദ്ദേഹം. ജവഹർലാൽ നെഹ്റുവിനെപ്പോലെ വായനയും ചിന്തയുമുള്ള ഒരു ‘ഡ്രീമർ’ ആണ് വി.ഡി. സതീശനെന്നും അദ്ദേഹത്തിന്റെ സ്വപ്നങ്ങളിലൂടെ കേരളം കൂടുതൽ ഉയരങ്ങളിലേക്ക് വളരുമെന്ന് പ്രത്യാശിക്കുന്നതായും മോഹൻലാൽ കൂട്ടിച്ചേർത്തു. വി.ഡി. സതീശനെ ‘സതീശൻ സാർ’ എന്ന് അഭിസംബോധന ചെയ്ത താരം, സിംഗപ്പൂരിന്റെ വികസന ശില്പിയായ ലീ കുവാൻ യുവിനെപ്പോലെ കേരളത്തിൽ വലിയ മാറ്റങ്ങൾ കൊണ്ടുവരാൻ പുതിയ മുഖ്യമന്ത്രിക്ക് സാധിക്കട്ടെ എന്നും ആശംസിച്ചു. ചടങ്ങിൽ നടൻ സലിം കുമാർ, ശ്രീകുമാരൻ തമ്പി തുടങ്ങിയ പ്രമുഖരും സന്നിഹിതരായിരുന്നു.
കേരളത്തിന്റെ വികസനവുമായി ബന്ധപ്പെട്ട ചില പ്രധാന ആവശ്യങ്ങളും ആകുലതകളും മോഹൻലാൽ മുഖ്യമന്ത്രിക്ക് മുന്നിൽ എണ്ണിപ്പറഞ്ഞു. സംസ്ഥാനത്തെ റോഡുകൾ ആളുകളെ കൊല്ലുന്ന അവസ്ഥയ്ക്ക് അടിയന്തരമായി മാറ്റമുണ്ടാകണമെന്നും മാലിന്യങ്ങൾ രോഗങ്ങൾക്ക് വഴിമാറുന്ന സ്ഥിതി തുടരരുതെന്നും അദ്ദേഹം ആവശ്യപ്പെട്ടു. തന്റെ പ്രശസ്തമായ ‘നാർക്കോട്ടിക്സ് ഈസ് എ ഡേർട്ടി ബിസിനസ്’ എന്ന മാസ് ഡയലോഗ് വേദിയിൽ ഓർമ്മിപ്പിച്ച താരം, സംസ്ഥാനത്തെ ലഹരി മാഫിയയ്ക്കെതിരെ സർക്കാർ കർശനമായ നടപടികൾ സ്വീകരിക്കണമെന്നും അഭ്യർത്ഥിച്ചു. തനിക്ക് കക്ഷിരാഷ്ട്രീയമല്ല, മറിച്ച് രാഷ്ട്രബോധമാണ് പ്രധാനമെന്നും എല്ലാ രാഷ്ട്രീയ നേതാക്കളുമായും സൗഹൃദമുണ്ടെന്നും വ്യക്തമാക്കിയ മോഹൻലാൽ, ഒരു കലാകാരൻ എന്ന നിലയിൽ സർക്കാരിന് ആവശ്യമായ എല്ലാ പിന്തുണയും വാഗ്ദാനം ചെയ്തുകൊണ്ട് ‘ധീരമായി ഞങ്ങളെ മുന്നിൽ നിന്ന് നയിക്കുക’ എന്ന് മുഖ്യമന്ത്രിയോട് ആഹ്വാനം ചെയ്തു.
Summary: Actor Mohanlal attended the grand reception held for Chief Minister V.D. Satheesan in Paravoor, describing him as a close friend and a transparent leader. Highlighting the high expectations of Malayalis, Mohanlal urged the new government to address critical infrastructure issues like unsafe roads, poor waste management, and the rising drug menace. Delivering his iconic dialogue “Narcotics is a dirty business,” the actor promised his full support to the government and envisioned Kerala’s development on the lines of Singapore’s progress.
