കൊച്ചി: സംസ്ഥാനത്തെ യു.ഡി.എഫ് സർക്കാരിന്റെ പുതിയ ബജറ്റിൽ സിനിമ മേഖലയ്ക്കായി പ്രഖ്യാപിച്ച വിപ്ലവകരമായ തീരുമാനങ്ങളെ പൂർണ്ണമായി സ്വാഗതം ചെയ്ത് ലേഡി സൂപ്പർസ്റ്റാർ മഞ്ജു വാര്യർ (Manju Warrier budget post). കൊച്ചിയിൽ ‘ചിത്രനഗരം’ എന്ന പേരിൽ അത്യാധുനിക ഫിലിം സിറ്റി സ്ഥാപിക്കുമെന്ന പ്രഖ്യാപനം ഏറെ സന്തോഷം നൽകുന്നതാണെന്നും, സിനിമയ്ക്ക് വ്യവസായ പദവി നൽകാനുള്ള തീരുമാനം ഒരു തൊഴിലിടത്തിനാകെയുള്ള വലിയ അംഗീകാരമാണെന്നും മഞ്ജു വാര്യർ ഫേസ്ബുക്കിൽ കുറിച്ചു.
“കൊച്ചിയിൽ ‘ചിത്രനഗരം’ എന്ന പേരിൽ ഒരു ഫിലിംസിറ്റിയെന്ന ബജറ്റ് പ്രഖ്യാപനം ഏറെ സന്തോഷം നൽകുന്നു. അത് മലയാള സിനിമയുടെ തുടക്കക്കാരനായ ശ്രീ. ജെ.സി. ഡാനിയേലിന്റെ ഓർമയ്ക്കുള്ള സമർപ്പണമാകുമ്പോൾ കൂടുതൽ അർഥവത്തുമാകുന്നു. അതോടൊപ്പം സിനിമയ്ക്ക് വ്യവസായ പദവി നൽകാനുള്ള തീരുമാനം ഒരു തൊഴിലിടത്തിനാകെയുള്ള അംഗീകാരമാണ്. നമ്മുടെ സിനിമാലോകത്തെ കൂടുതൽ വിശാലമാക്കുകയും അതിനെ അനന്തസാധ്യതകളിലേക്ക് നയിക്കുകയും ചെയ്യുന്ന തീരുമാനങ്ങളെടുത്ത സർക്കാരിന് ഒരു സിനിമാപ്രവർത്തകയെന്ന നിലയിൽ നന്ദിയറിയിക്കുന്നു. ആന്റി പൈറസി സെൽ വരുന്നതോടെ സിനിമയെ നശിപ്പിക്കുന്ന ഒരു വിപത്തിന് അവസാനമാകും എന്നും പ്രതീക്ഷിക്കുന്നു” – മഞ്ജു വാര്യർ തന്റെ കുറിപ്പിൽ വ്യക്തമാക്കി.
സിനിമയെ ഔദ്യോഗിക വ്യവസായമായി പ്രഖ്യാപിച്ച പുതിയ ബജറ്റിനെ ചലച്ചിത്ര ലോകം ഒന്നടങ്കം വലിയ ആവേശത്തോടെയാണ് വരവേൽക്കുന്നത്. ഇതിന് മുൻപ് പ്രമുഖ നടന്മാരായ മമ്മൂട്ടി, മോഹൻലാൽ, പൃഥ്വിരാജ്, ടൊവിനോ തോമസ് എന്നിവരെല്ലാം സർക്കാരിന്റെ ഈ ചരിത്രപരമായ ചുവടുവെപ്പിനെ സ്വാഗതം ചെയ്ത് സോഷ്യൽ മീഡിയയിലൂടെ രംഗത്തെത്തിയിരുന്നു. ഇതിന് പിന്നാലെയാണ് മഞ്ജു വാര്യരും സർക്കാരിന് അഭിനന്ദനങ്ങളുമായി എത്തിയത്. ഫിലിം സിറ്റിയും ആന്റി പൈറസി സെല്ലും യാഥാർത്ഥ്യമാകുന്നതോടെ മലയാള ചലച്ചിത്ര മേഖലയുടെ സാങ്കേതിക-സാമ്പത്തിക സുരക്ഷിതത്വം വർദ്ധിക്കുമെന്നാണ് സിനിമാ പ്രവർത്തകരുടെ പ്രതീക്ഷ.
Story Summary: Lady Superstar Manju Warrier welcomed the UDF Government’s budget announcement establishing ‘Chithranagaram’ Film City in Kochi, dedicated to J.C. Daniel. She described the move to grant industry status to cinema as a major recognition for the entire workspace. Thanking the government, she also pinned high hopes on the proposed Anti-Piracy Cell. Prominent actors including Mammootty, Mohanlal, Prithviraj, and Tovino Thomas had also recently lauded the budget.
