മൈസൂരു: തനതായ സ്വരമാധുരിയിലൂടെ തലമുറകളുടെ ഹൃദയം കവർന്ന തെന്നിന്ത്യയുടെ വാനമ്പാടി എസ്. ജാനകിക്ക് രാജ്യം കണ്ണീരോടെ വിട നൽകി (S Janaki funeral). ആറ് പതിറ്റാണ്ടുകാലം ഇന്ത്യൻ ചലച്ചിത്ര സംഗീത ലോകത്തെ വിസ്മയിപ്പിച്ച ഗായികയുടെ മൃതദേഹം പൂർണ്ണ ഔദ്യോഗിക ബഹുമതികളോടെ സംസ്കരിച്ചു. മൈസൂരുവിലെ കനിയനഗുണ്ഡി ഫാം ഹൗസിൽ വൈകിട്ട് അഞ്ചോടെയായിരുന്നു അന്ത്യകർമ്മങ്ങൾ നടന്നത്.
മൈസൂരു മഹാരാജാസ് കോളേജ് ഗ്രൗണ്ടിൽ രാവിലെ മുതൽ പൊതുദർശനത്തിന് വെച്ച മൃതദേഹത്തിൽ പ്രിയഗായികയെ അവസാനമായി ഒരുനോക്ക് കാണാൻ ആയിരങ്ങളാണ് ഒഴുകിയെത്തിയത്. കല, സാംസ്കാരിക, രാഷ്ട്രീയ രംഗങ്ങളിലെ പ്രമുഖരും വിവിധ സംസ്ഥാനങ്ങളിൽ നിന്നുള്ള സഹപ്രവർത്തകരും ആരാധകരും അന്ത്യാഞ്ജലി അർപ്പിച്ചു. മൈസൂരുവിലെ സ്വകാര്യ ആശുപത്രിയിൽ ചികിത്സയിലിരിക്കെ ശനിയാഴ്ചയായിരുന്നു ദക്ഷിണേന്ത്യയുടെ പ്രിയപ്പെട്ട ‘ജാനകമ്മ’ (88) അന്തരിച്ചത്.
1938 ഏപ്രിൽ 23ന് ജനിച്ച എസ്. ജാനകി കന്നഡ, മലയാളം, തെലുങ്ക്, തമിഴ്, ഹിന്ദി തുടങ്ങി 17 ഭാഷകളിലായി അമ്പതിനായിരത്തോളം ഗാനങ്ങൾക്ക് ശബ്ദം നൽകിയിട്ടുണ്ട്. കന്നഡയിലും മലയാളത്തിലുമായിരുന്നു ഏറ്റവും കൂടുതൽ ജനപ്രിയ ഗാനങ്ങൾ പിറന്നത്. ഭാവസാന്ദ്രമായ ആലാപനവും കുട്ടിക്കാലം മുതൽ വാർദ്ധക്യം വരെയുള്ള ഏത് പ്രായത്തിലുള്ളവർക്കും ഇണങ്ങുന്ന ശബ്ദവിന്യാസവും ജാനകിയുടെ മാത്രം സവിശേഷതയായിരുന്നു.
മലയാളത്തിൽ മാത്രം ആയിരത്തി ഇരുന്നൂറോളം അനശ്വര ഗാനങ്ങളാണ് ജാനകി പാടിയത്. ‘തുമ്പീ വാ തുമ്പക്കുടത്തിൻ’, ‘ആടി വാ കാറ്റേ’, ‘കിളിയേ കിളിയേ’, ‘തേനും വയമ്പും’, ‘നാഥാ നീ വരും’ തുടങ്ങിയ ഗാനങ്ങൾ ഇന്നും മലയാളികളുടെ ചുണ്ടുകളിൽ തങ്ങിനിൽക്കുന്നു. സംഗീതസംവിധായകൻ എം.എസ്. ബാബുരാജാണ് ജാനകിയെ മലയാള സിനിമയിലേക്ക് കൈപിടിച്ചുയർത്തിയത്. പ്രണയവും വിരഹവും വാത്സല്യവുമെല്ലാം ഒരുപോലെ മലയാളി മനസ്സുകളിൽ പതിപ്പിച്ച ആ ശബ്ദത്തിന്റെ വിയോഗത്തോടെ ഇന്ത്യൻ സംഗീതത്തിലെ സുവർണ്ണ യുഗത്തിനാണ് അവസാനമായത്.
Story Summary: The mortal remains of legendary playback singer S. Janaki were cremated with full state honors at Kaniyanagundhi farmhouse in Mysuru. Thousands, including prominent figures from cultural and political spheres, paid their last respects at the Maharaja’s College Ground where her body was kept for public view.
