കോഴിക്കോട്: കുറ്റ്യാടി ചുരത്തിൽ നിയന്ത്രണം വിട്ട ലോറി തുടർച്ചയായി വാഹനങ്ങളിൽ ഇടിച്ച് വൻ അപകടം (Kuttiadi Churam Accident). ചുരത്തിലെ മൂന്നാം വളവിനും നാലാം വളവിനും ഇടയിലുണ്ടായ അപകടത്തിൽ ഏഴ് പേർക്ക് പരിക്കേറ്റു. വയനാട് ഭാഗത്തുനിന്ന് വരികയായിരുന്ന കറി പൗഡർ കയറ്റിയ ലോറിയാണ് അപകടമുണ്ടാക്കിയത്.
നിയന്ത്രണം വിട്ട ലോറി ആദ്യം രണ്ട് കാറുകളിൽ ഇടിക്കുകയും പിന്നീട് വയനാട് ഭാഗത്തുനിന്ന് പശുവുമായി വന്ന പിക്കപ്പ് വാനിൽ ഇടിച്ച് അതിനെ തെറിപ്പിക്കുകയുമായിരുന്നു. ഇടിയുടെ ആഘാതത്തിൽ പിക്കപ്പ് വാൻ പത്തടി താഴ്ചയിലുള്ള കൽവർട്ടിനുള്ളിലേക്ക് മറിഞ്ഞു.
പിക്കപ്പ് വാനിനുള്ളിൽ കുടുങ്ങിപ്പോയ ഡ്രൈവറെ നാട്ടുകാരും അഗ്നിരക്ഷാസേനയും ചേർന്ന് ഏറെ നേരത്തെ പരിശ്രമത്തിനൊടുവിലാണ് പുറത്തെടുത്തത്. പരിക്കേറ്റ ഏഴ് പേരെയും ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു. അപകടത്തെത്തുടർന്ന് കുറ്റ്യാടി ചുരത്തിൽ അൽപ്പനേരം ഗതാഗതം തടസ്സപ്പെട്ടു.
Story Summary: Seven people were injured after a truck lost control and rammed into two cars and a pickup van at Kuttiadi Ghat road (Churam). The incident occurred between the 3rd and 4th hairpins. The pickup van, which was carrying a cow, fell 10 feet deep into a culvert following the collision. Fireforce and locals rescued the trapped driver. All injured are out of danger.
