തിരുവനന്തപുരം: മുൻ യു.ഡി.എഫ് സർക്കാർ പ്രഖ്യാപിച്ച ‘പ്രിയദർശിനി സൗജന്യ യാത്രാ പദ്ധതി’ കെ.എസ്.ആർ.ടി.സിയുടെ ഓർഡിനറി വിഭാഗം ബസുകൾക്ക് മാത്രമാണെന്നും സിറ്റി ഫാസ്റ്റ് സർവീസുകൾക്ക് ഈ ആനുകൂല്യം ബാധകമല്ലെന്നും വ്യക്തമാക്കി കെ.എസ്.ആർ.ടി.സി അധികൃതർ (KSRTC Priyadarshini free travel scheme). പദ്ധതിയെക്കുറിച്ച് സമൂഹ മാധ്യമങ്ങളിലൂടെയും ചില മുൻനിര വാർത്താ മാധ്യമങ്ങളിലൂടെയും വ്യാപകമായി തെറ്റിദ്ധാരണാജനകമായ പ്രചാരണങ്ങൾ നടക്കുന്ന പശ്ചാത്തലത്തിലാണ് ഔദ്യോഗിക വിശദീകരണവുമായി മാനേജ്മെന്റ് രംഗത്തെത്തിയത്.
തിരുവനന്തപുരം നഗരത്തിലൂടെ നിലവിൽ 384 സിറ്റി ഫാസ്റ്റ് ബസുകളും ജില്ലയിലാകെ 687 ഓർഡിനറി ബസുകളുമാണ് കെ.എസ്.ആർ.ടി.സി സർവീസ് നടത്തുന്നത്. ഓർഡിനറി ബസുകളെ അപേക്ഷിച്ച് സിറ്റി ഫാസ്റ്റ് ബസുകൾക്ക് താരതമ്യേന സ്റ്റോപ്പുകൾ കുറവായതിനാൽ യാത്രക്കാർക്ക് വളരെ വേഗത്തിൽ ലക്ഷ്യസ്ഥാനത്ത് എത്താൻ സാധിക്കും. ഫാസ്റ്റ് പാസഞ്ചർ വിഭാഗത്തിന് സമാനമായ സർവീസായതിനാലാണ് ഇവയെ സൗജന്യ പദ്ധതിയിൽ നിന്നും ഒഴിവാക്കിയിട്ടുള്ളത്. സിറ്റി ഫാസ്റ്റ് സർവീസുകൾ ഈ പദ്ധതിയിൽ ഉൾപ്പെടുന്നില്ലെന്ന കാര്യം സാധാരണക്കാരായ യാത്രക്കാർക്ക് എളുപ്പത്തിൽ മനസ്സിലാക്കുന്നതിനായി കോർപ്പറേഷൻ പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ട്.
പ്രിയദർശിനി പദ്ധതി പ്രകാരം സ്ത്രീകൾക്ക് സൗജന്യ യാത്ര അനുവദിച്ചിട്ടുള്ള ഓർഡിനറി ബസുകളുടെയും, പദ്ധതിയിൽ ഉൾപ്പെടാത്ത സിറ്റി ഫാസ്റ്റ് ബസുകളുടെയും മുൻവശത്തും പ്രവേശന വാതിലുകളുടെ ഇരുവശങ്ങളിലുമായി വ്യക്തമായി തിരിച്ചറിയാൻ സാധിക്കുന്ന വലിയ സ്റ്റിക്കറുകൾ പതിപ്പിച്ചിട്ടുണ്ട്. യാത്രക്കാരായ സ്ത്രീകൾക്ക് ബസ് കയറുന്ന സമയത്ത് യാതൊരുവിധ ആശയക്കുഴപ്പവും ഉണ്ടാകാതിരിക്കാനും ജീവനക്കാരുമായി തർക്കങ്ങൾ ഒഴിവാക്കാനുമാണ് ഈ അടിയന്തര നടപടിയെന്ന് കെ.എസ്.ആർ.ടി.സി അധികൃതർ വ്യക്തമാക്കി.
Story Summary: KSRTC clarified that the ‘Priyadarshini Free Travel Scheme’ introduced by the UDF government is applicable only to Ordinary category buses and not to City Fast services. The official clarification aims to counter misleading campaigns on social media. To avoid confusion for women passengers, KSRTC has placed distinct stickers on both ordinary and city fast buses.
