കോഴിക്കോട്: കോഴിക്കോട് ഉള്ള്യേരിയിൽ ശക്തമായ കാറ്റിൽ മരം പൊട്ടിവീണ് സ്കൂട്ടർ യാത്രക്കാരനായ മധ്യവയസ്കന് ദാരുണാന്ത്യം (Kozhikode Ullyeri road accident). ഉള്ള്യേരി തെരുവത്തുകടവ് ലക്ഷംവീട് ഉന്നതിയിൽ ഹരിദാസനാണ് (54) അപകടത്തിൽ മരണപ്പെട്ടത്. ഇദ്ദേഹത്തോടൊപ്പം സ്കൂട്ടറിൽ യാത്ര ചെയ്തിരുന്ന സുഹൃത്ത് പടിഞ്ഞാറെ കക്കട്ടിൽ ശശിക്ക് മാരകമായി പരിക്കേറ്റു.
തിങ്കളാഴ്ച (ഇന്ന്) വൈകിട്ട് നാല് മണിയോടെയായിരുന്നു നാടിനെ നടുക്കിയ ഈ അപ്രതീക്ഷിത അപകടം സംഭവിച്ചത്. ഹരിദാസനും ശശിയും സഞ്ചരിച്ചിരുന്ന സ്കൂട്ടറിന് മുകളിലേക്ക് സമീപത്തുണ്ടായിരുന്ന വലിയ മരം ശക്തമായ കാറ്റിൽ പെട്ടെന്ന് ഒടിഞ്ഞു വീഴുകയായിരുന്നു. മരം വീണ് സ്കൂട്ടർ പൂർണ്ണമായും തകരുകയും ഇരുവരും അതിനടിയിൽപ്പെടുകയുമായിരുന്നു.
അപകടം നടന്നയുടൻ തന്നെ ഓടിക്കൂടിയ നാട്ടുകാരും മറ്റ് യാത്രക്കാരും ചേർന്ന് മരം വെട്ടിമാറ്റിയാണ് ഇരുവരെയും പുറത്തെടുത്തത്. ഹരിദാസനെ ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തലയ്ക്കേറ്റ കടുത്ത പരിക്കാണ് മരണകാരണമെന്നാണ് പ്രാഥമിക വിവരം. അപകടത്തിൽ ഗുരുതരമായി പരിക്കേറ്റ ശശിയെ കോഴിക്കോട്ടെ പ്രമുഖ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇദ്ദേഹം തീവ്രപരിചരണ വിഭാഗത്തിൽ അടിയന്തര ചികിത്സയിലാണ്. സംഭവത്തെ തുടർന്ന് ഉള്ള്യേരി റോഡിൽ കുറച്ചുസമയം ഗതാഗതം തടസ്സപ്പെട്ടു.
Story Summary: A scooter rider named Haridasan died and pillion rider Shashi sustained severe injuries after a tree fell on their vehicle due to strong winds in Ullyeri, Kozhikode. The tragic incident occurred on Monday evening around 4 PM. Shashi has been admitted to a private hospital for advanced treatment.
