കൊച്ചി: കേരളത്തിന്റെ അഭിമാനമായ കൊച്ചി വാട്ടർ മെട്രോയുടെ വിജയകരമായ മാതൃക പിന്തുടർന്ന് രാജ്യത്തെ വിവിധ നഗരങ്ങളിലേക്ക് ജലഗതാഗത ശൃംഖല വ്യാപിപ്പിക്കാൻ കേന്ദ്രസർക്കാർ ഒരുങ്ങുന്നു. ഗുവാഹത്തി, ശ്രീനഗർ, പട്ന, വാരാണസി, അയോധ്യ, പ്രയാഗ്രാജ് അടക്കം രാജ്യത്തെ 18 നഗരങ്ങളിൽ വിവിധ ഘട്ടങ്ങളിലായി വാട്ടർ മെട്രോ പദ്ധതി നടപ്പിലാക്കാൻ കേന്ദ്ര തുറമുഖ-കപ്പൽ-ജലഗതാഗത മന്ത്രി സർബാനന്ദ സോനോവാളിന്റെ അധ്യക്ഷതയിൽ ചേർന്ന ഉന്നതതല യോഗം തീരുമാനിച്ചു.(Kochi Water Metro Model Across India 18 Cities Union Government Plan KMRL Study)
ദേശീയ വാട്ടർ മെട്രോ നയത്തിന്റെ കരടുരേഖ തയ്യാറാക്കാനുള്ള നടപടികളുമായി കേന്ദ്ര സർക്കാർ മുന്നോട്ട് പോവുകയാണ്. രാജ്യവ്യാപകമായി ഇത്തരം നഗര ജലഗതാഗത സംവിധാനങ്ങളുടെ പ്രവർത്തനം, സുരക്ഷ, സാങ്കേതികവിദ്യ, അടിസ്ഥാന സൗകര്യങ്ങൾ എന്നിവയ്ക്ക് ഏകീകൃത ചട്ടക്കൂട് കൊണ്ടുവരാനാണ് ഇതിലൂടെ ലക്ഷ്യമിടുന്നത്. നഗരങ്ങളിലെ റോഡ് ഗതാഗതക്കുരുക്ക് കുറയ്ക്കുന്നതിനൊപ്പം ടൂറിസം മേഖലയ്ക്ക് വലിയ ഉണർവ് നൽകാനും ഈ പദ്ധതി സഹായിക്കും.
ഇൻലാൻഡ് വാട്ടർവേഴ്സ് അതോറിറ്റി ഓഫ് ഇന്ത്യ നൽകിയ ചുമതലയനുസരിച്ച് 18 നഗരങ്ങളിലെയും സാധ്യത പഠനം നടത്തിയത് കൊച്ചി മെട്രോ റെയിൽ ലിമിറ്റഡ് ആണ്. രണ്ട് ഘട്ടങ്ങളിലായാണ് പുതിയ നഗരങ്ങളിൽ പദ്ധതി യാഥാർത്ഥ്യമാക്കുക. ആദ്യഘട്ടം ഗുവാഹത്തി, ശ്രീനഗർ, പട്ന, വാരാണസി, അയോധ്യ, പ്രയാഗ്രാജ്, രണ്ടാംഘട്ടം അസമിലെ തന്ത്രപ്രധാന നഗരങ്ങളായ തേസ്പൂർ, ദിബ്രുഗഡ് എന്നിങ്ങനെയാണ്.
കുറഞ്ഞ നിർമ്മാണച്ചെലവും ഭൂമി ഏറ്റെടുക്കലിലെ എളുപ്പവുമാണ് മെട്രോ റെയിലിനേക്കാൾ വാട്ടർ മെട്രോ പദ്ധതികളിലേക്ക് കേന്ദ്രത്തെ ആകർഷിക്കുന്നത്. പരിസ്ഥിതി സൗഹൃദമായ ഇലക്ട്രിക് അല്ലെങ്കിൽ ഹൈബ്രിഡ് ബോട്ടുകളാണ് ഈ നഗരങ്ങളിലും സർവീസിനായി ഉപയോഗിക്കുക. മൂന്ന് വർഷത്തെ വിജയകരമായ സർവീസിനിടയിൽ 65 ലക്ഷത്തിലധികം യാത്രക്കാരാണ് വാട്ടർ മെട്രോയിൽ യാത്ര ചെയ്തത്. നിലവിൽ പ്രതിദിനം ശരാശരി 7,000 യാത്രക്കാരാണ് കൊച്ചി വാട്ടർ മെട്രോ ഉപയോഗിക്കുന്നത്. അടുത്തിടെ മട്ടാഞ്ചേരി റൂട്ടിലേക്ക് കൂടി സർവീസ് ആരംഭിച്ചതോടെ പ്രതിദിന വരുമാനം 2.5 ലക്ഷം രൂപ കടന്നിട്ടുണ്ട്. വരും ദിവസങ്ങളിൽ കൂടുതൽ റൂട്ടുകളിലേക്ക് സർവീസ് വ്യാപിപ്പിച്ച് പ്രതിദിന യാത്രക്കാരുടെ എണ്ണം 8,000 ആയി ഉയർത്താനാണ് കൊച്ചി വാട്ടർ മെട്രോ ലിമിറ്റഡിന്റെ ലക്ഷ്യം.
Story Summary
Following the grand success of the Kochi Water Metro, the Central Government has decided to replicate this eco-friendly transport model across 18 major cities in India. In a high-level meeting chaired by Union Minister Sarbananda Sonowal, a draft National Water Metro Policy was discussed. Cities like Guwahati, Srinagar, Patna, Varanasi, Ayodhya, and Prayagraj will get Water Metro in the first phase, based on the feasibility study conducted by Kochi Metro Rail Limited (KMRL). Meanwhile, Kochi Water Metro completed 3 years of service with over 6.5 million passengers.
