കൊച്ചി: നഗരത്തിൽ സ്ത്രീസുരക്ഷയെക്കുറിച്ച് വൻ ആശങ്ക ഉയർത്തിക്കൊണ്ട്, ജോലി കഴിഞ്ഞ് പുലർച്ചെ നടന്നുപോവുകയായിരുന്ന പെൺകുട്ടികളെ റോഡിലിട്ട് ക്രൂരമായി മർദ്ദിച്ച സംഭവത്തിൽ മൂന്ന് യുവാക്കൾ പോലീസിന്റെ പിടിയിലായി (Kochi Kaloor women assault case). ആക്രമണത്തിന് നേതൃത്വം നൽകിയ മുഖ്യപ്രതി പാലക്കാട് സ്വദേശിയാണെന്ന് കൊച്ചി നോർത്ത് പോലീസിന്റെ അന്വേഷണ സംഘം കണ്ടെത്തിയിട്ടുണ്ട്.
കലൂർ ചക്കാലപ്പാടം റോഡിൽ ഇന്ന് പുലർച്ചെ 4.30-ഓടെയാണ് നാടിനെ നടുക്കിയ ഈ ഗുണ്ടാ വിളയാട്ടം അരങ്ങേറിയത്. നഗരത്തിൽ പാർട്ട് ടൈം (Part-time) ആയി ജോലി ചെയ്യുന്ന രണ്ട് പെൺകുട്ടികൾ പുലർച്ചെ ഷിഫ്റ്റ് കഴിഞ്ഞ് തങ്ങളുടെ താമസസ്ഥലത്തേക്ക് നടന്നുപോകുമ്പോഴാണ് വഴിയിൽ തങ്ങിനിന്നിരുന്ന സാമൂഹിക വിരുദ്ധ സംഘം ഇവരെ തടഞ്ഞുനിർത്തിയത്. തുടർന്ന് പെൺകുട്ടികൾക്ക് നേരെ ലൈംഗികച്ചുവയോടെ സംസാരിക്കുകയും അശ്ലീല പരാമർശങ്ങൾ നടത്തുകയും ചെയ്തു. അക്രമികളുടെ ഈ നടപടിയെ ധീരമായി ചോദ്യം ചെയ്ത പെൺകുട്ടികൾ, തെളിവുകളോടെ പോലീസിൽ പരാതി നൽകാനായി തങ്ങളുടെ മൊബൈൽ ഫോണിൽ ഇവരുടെ ദൃശ്യങ്ങൾ പകർത്താൻ ശ്രമിച്ചു.
ഇതോടെ അക്രമാസക്തരായ പ്രതികൾ പെൺകുട്ടികളുടെ കൈ തിരിച്ചുപിടിച്ച് ഫോൺ തട്ടിയെടുത്ത് റോഡിലിട്ടടിച്ചു തകർത്തു. തുടർന്ന് പെൺകുട്ടികളിൽ ഒരാളുടെ മുടിയിൽ കുത്തിപ്പിടിച്ച് റോഡിലൂടെ ദൂരേക്ക് വലിച്ചിഴയ്ക്കുകയും നെഞ്ചിലും വയറിലും ബൂട്സിട്ട് ക്രൂരമായി ചവിട്ടുകയും ചെയ്തു. തടയാൻ ശ്രമിച്ച സുഹൃത്തായ മറ്റൊരു പെൺകുട്ടിയെയും ഇവർ മർദ്ദിച്ചു. കഠിനമായ ആക്രമണത്തിനിടയിൽ പെൺകുട്ടികളുടെ വസ്ത്രങ്ങൾ പൂർണ്ണമായും വലിച്ചുകീറി അപമാനിക്കാനും പ്രതികളുടെ ഭാഗത്തുനിന്ന് ശ്രമമുണ്ടായി. സംഭവത്തിൽ നെഞ്ചിനും ആന്തരിക അവയവങ്ങൾക്കും ഗുരുതരമായി പര്യക്കേറ്റ ഒരു പെൺകുട്ടിയെ നിലവിൽ എറണാകുളം ജനറൽ ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.
അതേസമയം, ക്രൂരമായ അതിക്രമത്തിന് ഇരയായി ആശുപത്രിയിൽ കഴിഞ്ഞ പെൺകുട്ടിയുടെ മൊഴി രേഖപ്പെടുത്താൻ എത്തിയ കൊച്ചി നോർത്ത് സ്റ്റേഷനിലെ വനിതാ പോലീസ് ഉദ്യോഗസ്ഥ ഉൾപ്പെടെയുള്ളവരുടെ ഭാഗത്തുനിന്ന് ഉണ്ടായ മോശം പെരുമാറ്റം ഇരകളെ കൂടുതൽ മാനസിക ബുദ്ധിമുട്ടിലാക്കിയതായും പരാതി ഉയർന്നിട്ടുണ്ട്.
ഒരു ഭാഗത്ത് പ്രതികളെ പിടികൂടുമ്പോൾ തന്നെ, ‘പെൺകുട്ടികൾ എന്തിനാണ് ഇത്ര പുലർച്ചെ പുറത്തിറങ്ങി നടന്നത്’ എന്നും ‘അവർ ധരിച്ചിരുന്ന വസ്ത്രം ശരിയായിരുന്നില്ല’ എന്ന രീതിയിലുമുള്ള സദാചാര ചോദ്യങ്ങളാണ് പോലീസ് ഉദ്യോഗസ്ഥർ ചോദിച്ചതെന്ന് ഇരയായ പെൺകുട്ടിയുടെ സുഹൃത്ത് മാധ്യമങ്ങളോട് വെളിപ്പെടുത്തി. പോലീസിന്റെ ഈ വിവേചനപരമായ പെരുമാറ്റത്തിനെതിരെയും ഉന്നത ഉദ്യോഗസ്ഥർക്ക് പരാതി നൽകാനാണ് പെൺകുട്ടികളുടെ തീരുമാനം. അക്രമം നടന്ന പ്രദേശത്തെ സി.സി.ടി.വി (CCTV) ദൃശ്യങ്ങൾ പരിശോധിച്ച് വരികയാണെന്ന് പോലീസ് അറിയിച്ചു.
Story Summary: Three youths were arrested for brutally assaulting and dragging two working women on the road at Kaloor, Kochi, during the early hours of Tuesday. The victims also alleged that the police questioned their clothes and timings when taking statements at the Ernakulam General Hospital.
