തിരുവനന്തപുരം: കാത്തിരിപ്പുകൾക്ക് വിരാമമിട്ട് തെക്കുപടിഞ്ഞാറൻ കാലവർഷം (മൺസൂൺ) നാളെയോടെ കേരളത്തിൽ പ്രവേശിക്കാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു (Kerala monsoon arrival 2026). അറബിക്കടലിന്റെ കൂടുതൽ ഭാഗങ്ങളിലേക്കും ലക്ഷദ്വീപ്, തമിഴ്നാട് എന്നിവടങ്ങളിലെ ചില പ്രദേശങ്ങളിലേക്കും ബംഗാൾ ഉൾക്കടലിന്റെ വിവിധ മേഖലകളിലേക്കും കാലവർഷം അടുത്ത മണിക്കൂറുകളിൽ വ്യാപിക്കുമെന്നാണ് പ്രവചനം.
നിലവിൽ മധ്യ-കിഴക്കൻ അറബിക്കടലിനും അതിനോട് ചേർന്നുള്ള കർണാടക തീരത്തിനും മുകളിലായി ഒരു ചക്രവാതച്ചുഴി സ്ഥിതിചെയ്യുന്നുണ്ട്. ഇതിനുപുറമെ വടക്കൻ ആൻഡമാൻ കടലിന് മുകളിലും മറ്റൊരു ചക്രവാതച്ചുഴി രൂപപ്പെട്ടിട്ടുണ്ട്. ഇതിന്റെ സ്വാധീനത്താൽ ജൂൺ 5 മുതൽ 7 വരെ കേരള തീരങ്ങളിൽ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റടിക്കാൻ സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകി.
ഇന്നും നാളെയും സംസ്ഥാനത്ത് ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ മഴയ്ക്കും ശക്തമായ കാറ്റിനും സാധ്യതയുണ്ട്. ജൂൺ 7 വരെയുള്ള ദിവസങ്ങളിൽ കേരളത്തിലും മാഹിയിലും പരക്കെ ഇടിയും കാറ്റോടും കൂടിയ അതിശക്തമായ മഴയ്ക്കാണ് സാധ്യത പ്രവചിച്ചിരിക്കുന്നത്. കടൽ പ്രക്ഷുബ്ധമാകാൻ സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം.
വിവിധ ജില്ലകളിലെ അലർട്ട് വിവരങ്ങൾ:
ഓറഞ്ച് അലർട്ട് (അതിശക്തമായ മഴ മുന്നറിയിപ്പ്):
ഇന്ന് (ജൂൺ 3): ആലപ്പുഴ, കോട്ടയം, എറണാകുളം.
നാളെ (ജൂൺ 4): തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ.
ജൂൺ 5: തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്.
ജൂൺ 6: കോഴിക്കോട്, വയനാട്, കണ്ണൂർ, കാസറഗോഡ്.
ജൂൺ 7: കണ്ണൂർ, കാസറഗോഡ്.
യെല്ലോ അലർട്ട് (ശക്തമായ മഴ മുന്നറിയിപ്പ്):
ഇന്ന് (ജൂൺ 3): തിരുവനന്തപുരം, കൊല്ലം, പത്തനംതിട്ട, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്.
നാളെ (ജൂൺ 4): പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്.
ജൂൺ 5: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം.
ജൂൺ 6: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം.
ജൂൺ 7: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്.
പൊതുജനങ്ങളും മുൻകരുതൽ നടപടികളുടെ ഭാഗമായി ദുരന്തനിവാരണ അതോറിറ്റിയുടെ നിർദ്ദേശങ്ങൾ കർശനമായി പാലിക്കണമെന്ന് അധികൃതർ അഭ്യർത്ഥിച്ചു.
Story Summary: The India Meteorological Department (IMD) has announced that the southwest monsoon is likely to hit Kerala by tomorrow. Cyclonic circulations over the Arabian Sea and Andaman Sea will trigger heavy to very heavy rainfall, accompanied by strong winds up to 50 km/h, prompting orange alerts across several districts until June 7.
