കോതമംഗലം: വാരപ്പെട്ടിയിൽ ഹരിതകർമ്മ സേനാംഗങ്ങളെയും നാട്ടുകാരെയും ആകെ ഭീതിയിലാഴ്ത്തി മാലിന്യച്ചാക്കുകൾക്കിടയിൽ നിന്ന് കൂറ്റൻ മൂർഖൻ പാമ്പിനെ കണ്ടെത്തി (Cobra found in Kothamangalam). പഞ്ചായത്തിലെ വീടുകളിൽ നിന്നും സ്ഥാപനങ്ങളിൽ നിന്നും ശേഖരിച്ച് കൂട്ടിയിട്ടിരുന്ന അജൈവ മാലിന്യച്ചാക്കുകൾ തരംതിരിക്കുന്നതിനിടയിലാണ് ഹരിതകർമ്മ സേനാംഗങ്ങൾ അപ്രതീക്ഷിതമായി പാമ്പിനെ കണ്ടത്.
ഇന്ന് രാവിലെയാണ് സംഭവം നടന്നത്. മാലിന്യക്കൂമ്പാരത്തിനിടയിൽ ഭീതിജനകമായ സാഹചര്യത്തിൽ കൂറ്റൻ പാമ്പിനെ കണ്ടതോടെ തൊഴിലാളികൾ ഉടൻ തന്നെ വിവരം കോതമംഗലം ഫോറസ്റ്റ് ഓഫീസിൽ അറിയിക്കുകയായിരുന്നു. തുടർന്ന് വനംവകുപ്പിന്റെ നിർദ്ദേശപ്രകാരം സ്ഥലത്തെത്തിയ പ്രശസ്ത പാമ്പ് പിടിത്ത വിദഗ്ധൻ സേവി തോമസ് ഏറെ പ്രയാസപ്പെട്ട് പാമ്പിനെ സുരക്ഷിതമായി പിടികൂടി.
മഴക്കാലം ശക്തമായതോടെ പാമ്പുകൾ ജനവാസ മേഖലകളിലേക്കും ഇത്തരത്തിലുള്ള തണലുള്ള ഇടങ്ങളിലേക്കും ഇറങ്ങാനുള്ള സാധ്യത കൂടുതലാണെന്നും, മാലിന്യങ്ങൾ കൈകാര്യം ചെയ്യുമ്പോൾ ജാഗ്രത പാലിക്കണമെന്നും അധികൃതർ ഓർമ്മിപ്പിച്ചു. പിടികൂടിയ മൂർഖൻ പാമ്പിനെ പിന്നീട് ഉൾക്കാട്ടിൽ തുറന്നുവിടുമെന്ന് വനംവകുപ്പ് അധികൃതർ അറിയിച്ചു.
Story Summary: A large cobra was spotted among the waste bags collected by Haritha Karma Sena workers at Varappetty in Kothamangalam. Following an alert to the forest department, snake catcher Sevy Thomas rushed to the spot and safely captured the venomous snake.
