കൊച്ചി: റെക്കോർഡുകൾ ഭേദിച്ച് കുതിച്ചുയർന്ന സ്വർണ്ണവിലയിൽ സംസ്ഥാനത്ത് വൻ ഇടിവ്. പവന് ഒറ്റയടിക്ക് 5,240 രൂപ കുറഞ്ഞതോടെ ഒരു പവൻ സ്വർണ്ണത്തിന്റെ വില 1,25,120 രൂപയായി. ഗ്രാമിന് 655 രൂപയാണ് കുറഞ്ഞത്. ഇതോടെ ഒരു ഗ്രാം സ്വർണ്ണത്തിന് 15,640 രൂപ എന്ന നിരക്കിലാണ് ഇന്ന് വ്യാപാരം നടക്കുന്നത്.(Kerala Gold price lowered, know about today’s rate)
ഇന്നലെ പവൻ വില 1,31,160 രൂപ എന്ന സർവ്വകാല റെക്കോർഡിൽ എത്തിയിരുന്നു. എന്നാൽ വൈകുന്നേരത്തോടെ വില കുറയാൻ തുടങ്ങുകയും ഇന്ന് രാവിലെയോടെ വലിയ ഇടിവ് രേഖപ്പെടുത്തുകയുമായിരുന്നു. ഡിസംബർ 23-നാണ് സംസ്ഥാനത്ത് സ്വർണ്ണവില ആദ്യമായി ഒരു ലക്ഷം രൂപ കടന്നത്. തുടർന്ന് വളരെ വേഗത്തിലാണ് വില 1.30 ലക്ഷത്തിന് മുകളിലേക്ക് എത്തിയത്.
അന്താരാഷ്ട്ര വിപണിയിലുണ്ടായ പെട്ടെന്നുള്ള മാറ്റങ്ങളാണ് ആഭ്യന്തര വിപണിയിലും പ്രതിഫലിച്ചത്. ഗ്രീൻലാൻഡിന്റെ നിയന്ത്രണവുമായി ബന്ധപ്പെട്ട് എതിരഭിപ്രായം പ്രകടിപ്പിക്കുന്ന യൂറോപ്യൻ രാജ്യങ്ങളിൽ നിന്നുള്ള ഉൽപ്പന്നങ്ങൾക്ക് മേൽ കൂടുതൽ തീരുവ ചുമത്തുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രഖ്യാപനം വിപണിയെ സ്വാധീനിച്ചു.
ഇറാനെതിരെ സൈനിക നീക്കം നടത്താൻ അമേരിക്ക ആലോചിക്കുന്നതായുള്ള റിപ്പോർട്ടുകൾ ആഗോള സാമ്പത്തിക വിപണിയിൽ വലിയ അസ്ഥിരതയ്ക്ക് കാരണമായിട്ടുണ്ട്. രാജ്യാന്തര വിപണിയിലെ ഡോളറിന്റെ മൂല്യത്തിലുണ്ടായ വ്യതിയാനങ്ങളും നിക്ഷേപകർ സ്വർണ്ണത്തിൽ നിന്ന് ലാഭമെടുപ്പ് (Profit booking) നടത്തിയതും വില കുറയാൻ കാരണമായതായി വിലയിരുത്തപ്പെടുന്നു. വില ഒന്നേകാൽ ലക്ഷത്തിൽ നിൽക്കുമെന്ന വിദഗ്ദ്ധരുടെ കണക്കുകൂട്ടലുകൾ തെറ്റിച്ചുകൊണ്ടാണ് സ്വർണ്ണവിലയിൽ ഈ വലിയ ചാഞ്ചാട്ടം പ്രകടമാകുന്നത്. വരും ദിവസങ്ങളിലും വിപണിയിൽ അസ്ഥിരത തുടരാനാണ് സാധ്യത.
