തിരുവനന്തപുരം: സംസ്ഥാനത്തെ കുടുംബാരോഗ്യ കേന്ദ്രങ്ങളുടെ പ്രവർത്തനം കൂടുതൽ കാര്യക്ഷമമാക്കുന്നതിനായി 152 പുതിയ തസ്തികകൾ വിവിധ ജില്ലകളിലായി അനുവദിച്ച് ആരോഗ്യവകുപ്പ് ഉത്തരവിറക്കിയതായി ആരോഗ്യം-ദേവസ്വം മന്ത്രി കെ. മുരളീധരൻ അറിയിച്ചു (Kerala Health Department PSC Recruitment). ആരോഗ്യ സേവനങ്ങൾ ശക്തിപ്പെടുത്തുന്നതിനും നിലവിലുള്ള ജീവനക്കാരുടെ ക്ഷാമം പരിഹരിക്കുന്നതിനുമാണ് നടപടി.
പുതുതായി അനുവദിച്ച തസ്തികകളിൽ ഫാർമസിസ്റ്റ് ഗ്രേഡ് II വിഭാഗത്തിൽ 60 പേരെയും നഴ്സിംഗ് ഓഫീസർ തസ്തികയിൽ 47 പേരെയും ലാബ് ടെക്നീഷ്യൻ ഗ്രേഡ് II വിഭാഗത്തിൽ 33 പേരെയും മെഡിക്കൽ ഓഫീസർ തസ്തികയിൽ 12 പേരെയും നിയമിക്കും. ആരോഗ്യവകുപ്പ് ഡയറക്ടറും ജില്ലാ മേധാവികളും ഒഴിവുകൾ ഉടൻ പി.എസ്.സിക്ക് റിപ്പോർട്ട് ചെയ്യുമെന്നും നിലവിലുള്ള റാങ്ക് ലിസ്റ്റുകളിൽ നിന്ന് നിയമനം നടത്തുമെന്നും അധികൃതർ അറിയിച്ചു.
മുൻ സർക്കാർ കാലത്ത് തസ്തികകൾ സൃഷ്ടിച്ചിരുന്നെങ്കിലും ജീവനക്കാരുടെ കുറവ് നേരിടുന്ന കുടുംബാരോഗ്യ കേന്ദ്രങ്ങളിലേക്ക് അവ അനുവദിക്കുന്ന നടപടികൾ പൂർത്തിയാകാതിരുന്നതിനാൽ ഫയലുകൾ നീണ്ടുനിന്നിരുന്നു. പുതിയ സർക്കാർ അധികാരത്തിലെത്തിയതിന് ശേഷം ഉദ്യോഗാർഥികൾ ഉന്നയിച്ച ആവശ്യങ്ങൾ പരിഗണിച്ചാണ് നടപടി വേഗത്തിലാക്കിയത്.
മെഡിക്കൽ ഓഫീസർമാരുടെ കുറവ് രൂക്ഷമായ ഒൻപത് ജില്ലകളിലെ കുടുംബാരോഗ്യ കേന്ദ്രങ്ങൾക്കാണ് 12 മെഡിക്കൽ ഓഫീസർ തസ്തികകൾ അനുവദിച്ചത്. കാസർകോട് ജില്ലയ്ക്ക് നാല് മെഡിക്കൽ ഓഫീസർമാരെയും കോട്ടയം, ഇടുക്കി, എറണാകുളം, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകൾക്ക് ഓരോ മെഡിക്കൽ ഓഫീസർമാരെയും അനുവദിച്ചു.
നഴ്സിംഗ് ഓഫീസർ, ഫാർമസിസ്റ്റ് ഗ്രേഡ് II, ലാബ് ടെക്നീഷ്യൻ ഗ്രേഡ് II തസ്തികകളുടെ ജില്ലാതല വിതരണം ഇപ്രകാരമാണ്: തിരുവനന്തപുരം (4,4,4), കൊല്ലം (3,3,1), പത്തനംതിട്ട (2,3,1), ആലപ്പുഴ (2,5,3), കോട്ടയം (4,4,2), ഇടുക്കി (1,2,1), എറണാകുളം (4,7,4), തൃശൂർ (4,5,3), പാലക്കാട് (2,5,2), മലപ്പുറം (4,6,2), കോഴിക്കോട് (4,4,2), വയനാട് (1,2,1), കണ്ണൂർ (5,6,3), കാസർകോട് (7,4,4).
സാധാരണ ജനങ്ങൾ ഏറ്റവും കൂടുതൽ ആശ്രയിക്കുന്ന കുടുംബാരോഗ്യ കേന്ദ്രങ്ങൾ ഉൾപ്പെടെയുള്ള പ്രാഥമിക ആരോഗ്യ സ്ഥാപനങ്ങളെ കൂടുതൽ ശക്തിപ്പെടുത്തുന്നതിനുള്ള നടപടികൾ തുടരുമെന്ന് മന്ത്രി വ്യക്തമാക്കി. ആരോഗ്യവകുപ്പിലെ വിവിധ റാങ്ക് ലിസ്റ്റുകളിൽ ഉൾപ്പെട്ട ഉദ്യോഗാർഥികൾക്ക് തൊഴിൽ അവസരം ലഭിക്കുന്നതിന് ഒഴിവുകൾ അടിയന്തരമായി പി.എസ്.സിക്ക് റിപ്പോർട്ട് ചെയ്യുന്ന നടപടികളും പുരോഗമിക്കുകയാണെന്നും അദ്ദേഹം കൂട്ടിച്ചേർത്തു.
Story Summary: The Kerala government has sanctioned 152 new posts across Family Health Centres to address staff shortages and improve healthcare services. Appointments will be made from existing PSC rank lists, benefiting both healthcare institutions and job seekers.
