കണ്ണൂർ: സംസ്ഥാനത്തെ സർക്കാർ ആശുപത്രികളിൽ ഡോക്ടർമാരുടെ കുറവ് രൂക്ഷമാണെന്ന് സമ്മതിച്ച് ആരോഗ്യമന്ത്രി കെ. മുരളീധരൻ. കണ്ണൂരിൽ മാത്രമല്ല, കേരളത്തിന്റെ വിവിധ ജില്ലകളിലും ഡോക്ടർമാരുടെ ക്ഷാമം അനുഭവപ്പെടുന്നുണ്ടെന്നും ഒഴിവുകൾ നികത്തി ആരോഗ്യ സേവനങ്ങൾ ശക്തിപ്പെടുത്തുന്നതിനുള്ള നടപടികൾ സർക്കാർ സ്വീകരിച്ചുവരികയാണെന്നും മന്ത്രി വ്യക്തമാക്കി. (Kerala Doctor Shortage)
കണ്ണൂരിലെ സർക്കാർ ആശുപത്രികളിൽ ആവശ്യത്തിന് ഡോക്ടർമാരില്ലെന്ന വാർത്ത പുറത്തുവന്നതിന് പിന്നാലെയായിരുന്നു മന്ത്രിയുടെ പ്രതികരണം. ജില്ലയിലെ വിവിധ ആരോഗ്യ സ്ഥാപനങ്ങളിൽ ജനറൽ, സ്പെഷ്യാലിറ്റി വിഭാഗങ്ങളിലായി നിരവധി തസ്തികകൾ ഒഴിഞ്ഞുകിടക്കുന്നതാണ് നിലവിലെ പ്രതിസന്ധിക്ക് കാരണമെന്ന് റിപ്പോർട്ടുകൾ സൂചിപ്പിക്കുന്നു.
ജില്ലയിൽ ഏകദേശം 120 ഡോക്ടർ തസ്തികകളാണ് ഒഴിവുള്ളത്. ഇരിട്ടി, കൂത്തുപറമ്പ് താലൂക്ക് ആശുപത്രികൾക്ക് പുറമെ കല്ല്യാശേരി കുടുംബാരോഗ്യ കേന്ദ്രം (എഫ്.എച്ച്.സി), മാങ്ങാട്ടുപറമ്പ് സ്ത്രീകളുടെയും കുട്ടികളുടെയും ആശുപത്രി എന്നിവിടങ്ങളിലും ഡോക്ടർമാരുടെ സേവനക്കുറവ് തുടരുകയാണ്.
വർഷങ്ങൾക്ക് മുമ്പ് രൂപീകരിച്ച സ്റ്റാഫ് പാറ്റേൺ നിലവിലെ രോഗിഭാരത്തിന് അനുസൃതമല്ലെന്നും, ഒഴിവുകൾ ദീർഘകാലമായി നികത്താത്തത് ആശുപത്രികളുടെ പ്രവർത്തനത്തെ സാരമായി ബാധിച്ചിട്ടുണ്ടെന്നും ആരോഗ്യരംഗത്തെ സംഘടനകൾ ചൂണ്ടിക്കാട്ടുന്നു. നിലവിലുള്ള ഡോക്ടർമാർക്ക് അധിക ജോലിഭാരം ഏറ്റെടുക്കേണ്ടി വരുന്നതോടെ മഴക്കാല രോഗപ്രതിരോധ പ്രവർത്തനങ്ങളും ദൈനംദിന ചികിത്സാ സേവനങ്ങളും പ്രതിസന്ധിയിലാണെന്നാണ് വിലയിരുത്തൽ. അതേസമയം, അടിയന്തരമായി ഒഴിവുകൾ നികത്തി ആരോഗ്യ മേഖലയുടെ പ്രവർത്തനം സുഗമമാക്കണമെന്ന് കേരള ഗവൺമെന്റ് മെഡിക്കൽ ഓഫീസേഴ്സ് അസോസിയേഷൻ (കെജിഎംഒഎ) ആവശ്യപ്പെട്ടു. പ്രശ്നത്തിന് വേഗത്തിൽ പരിഹാരം കണ്ടില്ലെങ്കിൽ ശക്തമായ സമരപരിപാടികളിലേക്ക് നീങ്ങുമെന്നും സംഘടന മുന്നറിയിപ്പ് നൽകിയിട്ടുണ്ട്.
Summary: Kerala Health Minister K. Muraleedharan has acknowledged a statewide shortage of doctors and said the government is taking steps to fill vacancies. The issue gained attention after reports highlighted severe staff shortages in government hospitals in Kannur.
