ആലപ്പുഴ: കായംകുളത്ത് ജനവാസ മേഖലയോട് ചേർന്നുള്ള മൂന്ന് നിലകളുള്ള പ്രമുഖ ഷോപ്പിങ് കോംപ്ലക്സിൽ വൻ തീപിടിത്തം (Kayamkulam shopping complex fire accident). ഇന്ന് രാത്രി ഒൻപത് മണിയോടെയാണ് നാടിനെ നടുക്കിയ ദുരന്തമുണ്ടായത്. കോംപ്ലക്സിനുള്ളിൽ പ്രവർത്തിച്ചിരുന്ന ഫാൻസി ഷോപ്പ്, ടെക്സ്റ്റൈൽസ്, അത്യാധുനിക ജിംനേഷ്യം എന്നിവയുൾപ്പെടെയുള്ള നിരവധി സ്ഥാപനങ്ങൾക്ക് വൻ നാശനഷ്ടമുണ്ടായി. ലക്ഷക്കണക്കിന് രൂപയുടെ സാധന സാമഗ്രികൾ കത്തിയമർന്നതായാണ് പ്രാഥമിക കണക്കുകൾ.
ലഭ്യമാകുന്ന വിവരങ്ങൾ പ്രകാരം കെട്ടിടത്തിന്റെ താഴത്തെ നിലയിലാണ് ആദ്യം തീപിടിത്തമുണ്ടായത്. ഇവിടെ നിന്നും മറ്റ് നിലകളിലേക്ക് അതിവേഗം തീ ആളിപ്പടരുകയായിരുന്നു. തീപിടിക്കുന്ന സമയത്ത് ഷോപ്പിങ് കോംപ്ലക്സിലെ വിവിധ സ്ഥാപനങ്ങൾക്കുള്ളിൽ ആളുകൾ ഉണ്ടായിരുന്നുവെന്നും ഇവർ അകത്തു കുടുങ്ങിക്കിടക്കുന്നുണ്ടെന്നുമാണ് നിലവിൽ പുറത്തുവരുന്ന വിവരം. എന്നാൽ ഇതുവരെ ആർക്കും ജീവഹാനിയോ പരിക്കോ ഏറ്റതായി ഔദ്യോഗിക റിപ്പോർട്ടുകളില്ല.
കെട്ടിടത്തിൽ നിന്നും ഉയർന്ന കനത്ത പുക സമീപത്തെ മറ്റ് വ്യാപാര സ്ഥാപനങ്ങളിലേക്കും വീടുകളിലേക്കും പടർന്നത് വലിയ രീതിയിൽ പരിഭ്രാന്തി പരത്തിയിട്ടുണ്ട്. സംഭവമറിഞ്ഞ് ഫയർ ഫോഴ്സിന്റെ മൂന്ന് യൂണിറ്റുകൾ ഉടനടി സ്ഥലത്തെത്തി തീയണയ്ക്കാനുള്ള തീവ്രശ്രമങ്ങൾ നടത്തിവരികയാണ്. ഷോർട്ട് സർക്യൂട്ടാണോ അതോ മറ്റെന്തെങ്കിലും കാരണമാണോ അപകടത്തിന് പിന്നിലെന്ന് വ്യക്തമായിട്ടില്ല.
Story Summary: A massive fire broke out in a three-story shopping complex in Kayamkulam around 9 PM, causing heavy damage to several shops, including a textile store and a gym. Fireforce units are on the scene attempting to control the blaze amid fears of people trapped inside.
