കണ്ണൂർ: കേരളത്തിലെ നാടകവേദികളിലെ സജീവ സാന്നിധ്യവും പ്രശസ്ത നാടകസംവിധായകനും നടനുമായ രാധൻ കണ്ണപുരം (കെ. രാധാകൃഷ്ണൻ – 58) അന്തരിച്ചു (Radhan Kannapuram passed away Kannur). കടുത്ത അസുഖബാധിതനായി കണ്ണൂർ ചാലയിലെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ (ICU) ചികിത്സയിൽ കഴിയുന്നതിനിടെയായിരുന്നു അന്ത്യം.
കണ്ണൂർ ജില്ലയിലെ കണ്ണപുരം കുന്നമ്മൽ വീട്ടിൽ ചന്ദ്രമതിയുടെയും പരേതനായ ചുള്ളേരി വീട്ടിൽ കൃഷ്ണന്റെയും മകനാണ്. കഴിഞ്ഞ 40 വർഷത്തോളമായി കേരളത്തിലെ പ്രൊഫഷണൽ നാടകരംഗത്ത് സജീവമായി പ്രവർത്തിച്ചുവരികയായിരുന്നു. മികച്ച നാടകാഭിനയത്തിനും മികച്ച സംവിധാനത്തിനുമായി മൂന്ന് സംസ്ഥാന പുരസ്കാരങ്ങൾ ഉൾപ്പെടെ ഒട്ടേറെ പ്രാദേശിക, ദേശീയ ബഹുമതികളും അംഗീകാരങ്ങളും ഇദ്ദേഹത്തെ തേടിയെത്തിയിട്ടുണ്ട്.
പെരുന്തച്ചൻ, തീപ്പൊട്ടൻ, നവരസനായകൻ, കോടീശ്വരൻ, കിനാവിലൊരു കളിവീട്, ഉള്ളത് പറഞ്ഞാൽ തുടങ്ങിയവ രാധൻ കണ്ണപുരം പ്രധാന വേഷങ്ങളിൽ എത്തി തരംഗം സൃഷ്ടിച്ച പ്രശസ്ത നാടകങ്ങളിൽ ചിലതാണ്. കോഴിക്കോട് ചിരന്തന, വള്ളുവനാട് നാദം, കൊല്ലം കാളിദാസ കലാകേന്ദ്രം, തിരുവനന്തപുരം സോപാനം, കോഴിക്കോട് സങ്കീർത്തന തുടങ്ങി കേരളത്തിലെ എണ്ണപ്പെട്ട എല്ലാ പ്രമുഖ പ്രൊഫഷണൽ നാടക സമിതികളിലും അദ്ദേഹം പ്രധാന നടനായും അണിയറ ശില്പിയായും ദീർഘകാലം പ്രവർത്തിച്ചിട്ടുണ്ട്.
നാടകപ്രവർത്തനത്തിനൊപ്പം തന്നെ പൊതുരംഗത്തും രാഷ്ട്രീയത്തിലും അദ്ദേഹം സജീവമായിരുന്നു. യൂത്ത് കോൺഗ്രസിന്റെ മണ്ഡലം പ്രസിഡന്റ് പദവി ഉൾപ്പെടെയുള്ള ചുമതലകൾ അദ്ദേഹം വഹിച്ചിട്ടുണ്ട്. നാടകാഭിനയത്തിനും സംവിധാനത്തിനും പുറമേ ആകാശവാണിയിൽ ബി-ഗ്രേഡ് ആർട്ടിസ്റ്റായും, ശ്രദ്ധേയമായ ഏതാനും മലയാള സിനിമകളിൽ ഡബ്ബിങ് ആർട്ടിസ്റ്റ് ആയും അദ്ദേഹം തന്റെ പ്രതിഭ തെളിയിച്ചിട്ടുണ്ട്.
സംസ്ഥാന പുരസ്കാര ജേതാവും നാടക-സിനിമ രംഗങ്ങളിൽ സജീവ സാന്നിധ്യവുമായ മിനി രാധനാണ് ഭാര്യ. മക്കൾ: ആതിര (ആർട്ടിസ്റ്റ്), ആരതി (നഴ്സ്, യു.കെ). മരുമകൻ: വിവേക് (ഡെസ്ക് എഡിറ്റർ, ബാലരമ). സഹോദരങ്ങൾ: ഗിരിജ, ജിഷ, രജനി. രാധൻ കണ്ണപുരത്തിന്റെ വിയോഗത്തോടെ കേരളത്തിലെ നാടക സാംസ്കാരിക ലോകത്തിന് വലിയൊരു പ്രതിഭയെയാണ് നഷ്ടമായിരിക്കുന്നത്.
Story Summary: Renowned theater artist and director Radhan Kannapuram (K. Radhakrishnan, 58) passed away at a private hospital in Kannur while undergoing treatment. With a career spanning 40 years, he won three state awards and worked with top troupes like Kalidasa Kalakendram and Chiranthana. He is survived by his wife, Mini Radhan, and two daughters.
