തിരുവനന്തപുരം: ജമാഅത്തെ ഇസ്ലാമിയെ അനുകൂലിച്ചുകൊണ്ടുള്ള വി.ഡി. സതീശന്റെ പ്രസ്താവനയെച്ചൊല്ലി ഭരണ-പ്രതിപക്ഷ നേതാക്കൾ തമ്മിൽ വാക്പോര് കനക്കുന്നു. ഇതിനിടെ, കാസർഗോഡ് നടക്കുന്ന നൂറാം വാർഷിക സമ്മേളനത്തിൽ ജമാഅത്തെ ഇസ്ലാമിക്കെതിരെ പ്രമേയം അവതരിപ്പിച്ച് സമസ്ത രംഗത്തെത്തി.(Jamaat-e-Islami controversy, War of words between VD Satheesan and MV Govindan)
ജമാഅത്തെ ഇസ്ലാമി മതരാഷ്ട്രവാദികളല്ല എന്ന വി.ഡി. സതീശന്റെ പ്രസ്താവന അവർക്ക് ‘ഗുഡ് സർട്ടിഫിക്കറ്റ്’ നൽകുന്നതാണെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ കുറ്റപ്പെടുത്തി. തീവ്രവാദ നിലപാടുകളെ വെള്ളപൂശാനാണ് കോൺഗ്രസ് ശ്രമിക്കുന്നതെന്നും അദ്ദേഹം ആരോപിച്ചു.
വി.ഡി. സതീശൻ: 42 വർഷക്കാലം ജമാഅത്തെ ഇസ്ലാമിയുമായി സഹകരിച്ച സി.പി.എമ്മിന് ഇപ്പോൾ മനഃപൂർവ്വമുള്ള മറവിരോഗമാണെന്ന് വി.ഡി. സതീശൻ തിരിച്ചടിച്ചു. യു.ഡി.എഫിനെ പ്രതിരോധത്തിലാക്കാൻ പഴയ നിലപാടുകൾ സി.പി.എം മറച്ചുവെക്കുകയാണെന്നും അദ്ദേഹം പറഞ്ഞു.
സമസ്ത അവതരിപ്പിച്ച പ്രമേയം തിരിച്ചടിയായി. മൗദൂദി ചിന്താധാരകൾ യുവാക്കളെ വഴിതെറ്റിക്കുന്നുവെന്നും ‘പാൻ ഇസ്ലാമിക്’ തീവ്രചിന്തകൾക്കെതിരെ ജാഗ്രത വേണമെന്നും സമസ്ത പ്രമേയത്തിൽ ആവശ്യപ്പെട്ടു. രാഷ്ട്രീയ ഇസ്ലാം എന്നത് അപകടകരമായ ആശയമാണെന്നും ഇത്തരം വിഘടന ചിന്തകളെ പണ്ഡിതന്മാർ പ്രതിരോധിക്കണമെന്നും ഇ.കെ. സുന്നി വിഭാഗം വ്യക്തമാക്കി.
