കൊച്ചി: പൂർണ്ണമായും ഹരിത ഊർജ്ജത്തിൽ പ്രവർത്തിക്കുന്ന വിമാനത്താവളമെന്ന ഖ്യാതിക്ക് പിന്നാലെ, ഹൈഡ്രജൻ ഫ്യൂവൽ സെൽ ഇലക്ട്രിക് ബസുകൾ അവതരിപ്പിക്കുന്ന രാജ്യത്തെ ആദ്യ വിമാനത്താവളമെന്ന നേട്ടവും കൊച്ചി അന്താരാഷ്ട്ര വിമാനത്താവളം സ്വന്തമാക്കുന്നു. പദ്ധതി നടപ്പിലാക്കുന്നതിനായി കേരള ഹൈഡ്രജൻ വാലി ഇന്നൊവേഷൻ ക്ലസ്റ്റർ ഫൗണ്ടേഷനും സിയാലും ധാരണാപത്രത്തിൽ ഒപ്പുവച്ചു.(Hydrogen buses at Kochi Airport for the first time in the country)
ആദ്യ ഘട്ടത്തിൽ മൂന്ന് ഹൈഡ്രജൻ ഫ്യൂവൽ സെൽ ഇലക്ട്രിക് ബസുകളാണ് നിരത്തിലിറങ്ങുക. ഒരു ബസിന് 2.90 കോടി രൂപ വീതം ആകെ 8.7 കോടി രൂപ സിയാലിന് നൽകും. സിയാലും ബി.പി.സി.എല്ലും ചേർന്ന് വിമാനത്താവളത്തിൽ നിർമ്മിച്ച ഗ്രീൻ ഹൈഡ്രജൻ പ്ലാന്റിൽ നിന്ന് തന്നെ ബസുകൾക്ക് ആവശ്യമായ ഇന്ധനം ലഭ്യമാക്കും.
ഒരു വർഷത്തിനുള്ളിൽ ബസുകൾ വാങ്ങി സർവീസ് ആരംഭിക്കും. ബസുകളുടെ ഉടമസ്ഥാവകാശവും പരിപാലനവും സിയാലിനായിരിക്കും. ഇതിലൂടെ കാർബൺ പുറന്തള്ളൽ പൂർണ്ണമായും ഒഴിവാക്കാം. ഇലക്ട്രിക് ബസുകൾ ആയതിനാൽ ശബ്ദ മലിനീകരണം ഉണ്ടാകില്ല. യാത്രക്കാർക്ക് കൂടുതൽ സുഖകരവും പരിസ്ഥിതി സൗഹൃദവുമായ യാത്രാ അനുഭവം ഉറപ്പാക്കും.
സിയാലിലെ 0484 ഏറോ ലോഞ്ചിൽ നടന്ന ചടങ്ങിൽ വൈദ്യുതി മന്ത്രി കെ. കൃഷ്ണൻകുട്ടിയും വ്യവസായ മന്ത്രി പി. രാജീവും ചേർന്നാണ് കരാർ കൈമാറിയത്. സിയാൽ എം.ഡി. എസ്. സുഹാസ് ഉൾപ്പെടെയുള്ള പ്രമുഖർ ചടങ്ങിൽ പങ്കെടുത്തു. ദേശീയ ഗ്രീൻ ഹൈഡ്രജൻ മിഷന്റെ പിന്തുണയോടെയാണ് ഈ പദ്ധതി നടപ്പിലാക്കുന്നത്.
