കൊല്ലം: വസ്ത്രധാരണത്തിന്റെ പേരിൽ കൊട്ടാരക്കര നെടുവത്തൂർ ഈശ്വരവിലാസം ഹയർ സെക്കൻഡറി സ്കൂളിൽ പ്രധാന അധ്യാപികയെ തടഞ്ഞത് നാടകീയ രംഗങ്ങൾക്ക് കാരണമായി. ചുരിദാർ ധരിച്ച് സ്കൂളിലെത്തിയ പ്രധാന അധ്യാപികയെ സെക്യൂരിറ്റി ജീവനക്കാർ ഗേറ്റിൽ തടയുകയായിരുന്നു.(Headmistress stopped at school gate for wearing churidar, Protest)
സ്കൂളിലേക്ക് പ്രവേശനം നിഷേധിച്ചതോടെ പ്രധാന അധ്യാപിക സ്കൂൾ ഗേറ്റിന് മുന്നിൽ കുത്തിയിരുന്ന് പ്രതിഷേധിച്ചു. മാനേജരുടെ കർശന നിർദ്ദേശമുള്ളതിനാലാണ് പ്രവേശിപ്പിക്കാത്തതെന്നായിരുന്നു സെക്യൂരിറ്റിയുടെ വിശദീകരണം.
പോലീസ് സ്ഥലത്തെത്തുകയും അവരെ സ്കൂളിനുള്ളിലേക്ക് പ്രവേശിപ്പിക്കുകയും ചെയ്തു. ഏത് വസ്ത്രം ധരിച്ചും സ്കൂളിലെത്താമെന്നും ആരെയും തടയാൻ പറഞ്ഞിട്ടില്ലെന്നുമാണ് സ്കൂൾ മാനേജ്മെൻറിൻറെ വിശദീകരണം.
