കൊച്ചി: സാമ്പത്തികമായും സാമൂഹികമായും പിന്നാക്കം നിൽക്കുന്ന കുടുംബങ്ങളിലെ മിടുക്കരായ വിദ്യാർത്ഥികൾക്ക് മികച്ച വിദ്യാഭ്യാസ-കരിയർ അവസരങ്ങൾ ഒരുക്കുക എന്ന ലക്ഷ്യത്തോടെ ഗോദ്റെജ് ഫൗണ്ടേഷൻ ‘ടുമാറോ മേക്കേഴ്സ്’ (Tomorrow Makers) എന്ന പേരിൽ ദേശീയ പ്ലാറ്റ്ഫോം ആരംഭിച്ചു (Godrej Foundation Tomorrow Makers). സ്വതന്ത്ര ജീവകാരുണ്യ ട്രസ്റ്റായ ഗോദ്റെജ് ഫൗണ്ടേഷൻ്റെ ഈ പദ്ധതി വഴി 6 മുതൽ 12 വരെയുള്ള ക്ലാസുകളിലെ വിദ്യാർത്ഥികൾക്കും ബിരുദധാരികൾക്കും വിവിധ മേഖലകളിലെ പ്രമുഖ സംഘടനകൾ, കരിയർ മെന്റർമാർ, അധ്യാപകർ എന്നിവരുമായി നേരിട്ട് സംവദിക്കാനും കരിയർ കെട്ടിപ്പടുക്കാനും സാധിക്കും.
എട്ട് പ്രമുഖ പങ്കാളിത്ത സംഘടനകളുടെ സഹകരണത്തോടെ വിദ്യാർത്ഥികൾക്കായി നാല് പ്രത്യേക മേഖലകളാണ് പദ്ധതിക്ക് കീഴിൽ ഒരുക്കിയിരിക്കുന്നത്.
സൗജന്യ എൻട്രൻസ് കോച്ചിംഗ്: 10 മുതൽ 12 വരെയുള്ള ക്ലാസുകളിലെ ശാസ്ത്ര-ഗണിത അഭിരുചിയുള്ള വിദ്യാർത്ഥികൾക്ക് ജെ.ഇ.ഇ (JEE), നീറ്റ് (NEET) പരീക്ഷകൾക്കായി ‘ദക്ഷ്ണ’, ‘അവന്തി ഫെല്ലോസ്’ എന്നീ സംഘടനകൾ വഴി സൗജന്യ കോച്ചിംഗ് നൽകും.
റോബോട്ടിക്സ് & ഗണിത വർക്ക്ഷോപ്പുകൾ: 6, 7 ക്ലാസുകളിലെ കുട്ടികൾക്കായി ‘ജെൻവൈസ്’, ‘മേക്കർഘട്ട്’ എന്നിവയുടെ സഹകരണത്തോടെ റോബോട്ടിക്സ്, കമ്പ്യൂട്ടിംഗ്, ഉന്നത ഗണിതം എന്നിവയിൽ സമ്മർ ക്യാമ്പുകളും വർക്ക്ഷോപ്പുകളും സംഘടിപ്പിക്കും.
കലയും തിയേറ്ററും: സംഗീതം, നാടകം, എഴുത്ത് എന്നിവയിൽ താൽപര്യമുള്ള കുട്ടികൾക്ക് ‘സ്ലാം ഔട്ട് ലൗഡ്’ വഴിയും, നാടക രംഗത്ത് കരിയർ ആഗ്രഹിക്കുന്ന ബിരുദധാരികൾക്ക് ‘ഡ്രാമ സ്കൂൾ മുംബൈ’ വഴിയും പ്രൊഫഷണൽ പരിശീലനം ലഭിക്കും.
ഡിഫൻസ് കോച്ചിംഗ്: സായുധ സേനയിൽ (Armed Forces) ചേരാൻ ആഗ്രഹിക്കുന്ന ബിരുദധാരികൾക്ക് പ്രവേശന പരീക്ഷകൾക്കായി ‘ഡെൽറ്റ സ്ക്വാഡ് ഫൗണ്ടേഷൻ’, ‘യുവതേജസ്’ എന്നിവ വഴി പ്രത്യേക പരിശീലനം നൽകും.
പദ്ധതിയിലേക്ക് തിരഞ്ഞെടുക്കപ്പെടുന്നവരിൽ 80 ശതമാനവും കുറഞ്ഞ വരുമാനമുള്ള കുടുംബങ്ങളിൽ നിന്നുള്ള കുട്ടികളായിരിക്കും. ഇവർക്ക് ആവശ്യാനുസരണം സ്കോളർഷിപ്പുകളും ലഭ്യമാക്കും. താൽപര്യമുള്ള വിദ്യാർത്ഥികൾക്ക് www.tomorrow-makers.in എന്ന വെബ്സൈറ്റ് വഴിയോ അല്ലെങ്കിൽ +91 8655979118 എന്ന വാട്സ്ആപ്പ് നമ്പറിൽ ‘ഹായ്’ (Hi) എന്ന് അയച്ചോ അപേക്ഷകൾ രജിസ്റ്റർ ചെയ്യാവുന്നതാണ്.
Story Summary: Godrej Foundation has launched ‘Tomorrow Makers’, a national platform providing educational and career opportunities for talented students from underprivileged backgrounds. The initiative offers free JEE/NEET coaching, robotics workshops, arts training, and defense exam preparation for students from classes 6 to 12 and graduates.
