ഹെല്‍മെറ്റിനെ ചൊല്ലി തര്‍ക്കം: യുവാവിനെ വളഞ്ഞിട്ട് ആക്രമിച്ചു
തൃശൂര്‍: ഹെല്‍മെറ്റിനെ ചൊല്ലിയുണ്ടായ തര്‍ക്കത്തില്‍ യുവാവിനെ ഒരു സംഘം വളഞ്ഞിട്ട് ആക്രമിച്ചു. മൂന്നുപീടിക സ്വദേശിയായ അശ്വിനാണ് മര്‍ദനമേറ്റത്. പിടിച്ചുമാറ്റാനെത്തിയ ജിതിനും പരിക്കേറ്റിട്ടുണ്ട്. പരിക്കേറ്റ യുവാക്കളെ ഇരിങ്ങാലക്കുട താലൂക്ക് ആശുപത്രിയില്‍ പ്രാഥമിക ചികിത്സ നല്‍കി വിട്ടു. തൃശൂര്‍ കയ്പമംഗലം മൂന്നുപീടികയില്‍ വ്യാഴാഴ്ച വൈകിട്ട് ആറോടെയാണ് സംഭവം നടന്നത്. ഏഴ് പേരടങ്ങുന്ന സംഘം അശ്വിനെ ആക്രമിക്കുകയായിരുന്നു.
മര്‍ദനമേറ്റ യുവാവും ആക്രമിച്ചവരും അയല്‍വാസികളാണ്. കുറച്ച് നാളുകള്‍ക്ക് മുന്‍പ് അശ്വിന്‍റെ ഹെല്‍മെറ്റ് അതുല്‍ എന്ന യുവാവ് കൊണ്ടുപോയിരുന്നു. ഹെല്‍മെറ്റ് തിരിച്ചു ചോദിച്ചിട്ട് നല്‍കിയില്ല. ഇതോടെ ഇയാളുടെ ബ്ലൂടൂത്ത് ഹെഡ്‌സെറ്റ് അശ്വിൻ തടഞ്ഞു വെയ്ക്കുകയും ഇതിനെ തുടര്‍ന്നുള്ള വൈരാഗ്യമാണ് സംഘം ചേര്‍ന്നുള്ള മര്‍ദനത്തില്‍ കലാശിച്ചതെന്നുമാണ് വിവരം.
നിലവില്‍ പരാതി ലഭിക്കാത്തതിനാല്‍ കേസെടുത്തിട്ടില്ലെന്ന് കയ്പമംഗലം പൊലീസ് പറഞ്ഞു.